Thatlai hun Lalpa tan
Thuhriltu 11:9-10; I Tim 4:12
Mitin hian he khawvelah hian vawikhat chauh hun kan nei a, kan piang nawn leh ngai tawhlo ang. Hei hi ngaihtuah reng a tha; vawikhat chauh tleirawl, thalai i ni dawn a, nu leh pa i nih hunah chuan nula tlangval, tleirawl i ni leh ngai tawh lovang. I hun hman englai mah hi kohkir (rewind) leh theih a ni tawh lo. He khawvelah hian vawikhat chauh hun i nei a, I piang nawn tawh dawn lo a nih si chuan I nun kha tu tan nge hmang la tha ber ang?
Sap hovin ‘Youth’ an tih ai chuan mizo tawnga ‘Thalai’ kan tih hi a chiang zawk fe awm e. Mihring dam hun chung a kawng emkima a that lai hun a nih avangin hmel, thluak, chakna leh thildangah kan that lai leh kan chak vanglai a ni a, chumi hun chu tleirawl lai hian kan hmang tan a ni.
1. VAWIKHAT CHAUH (ONE CHANCE):
Mitin hian he khawvelah hian vawikhat chauh hun kan nei a, kan piang nawn leh ngai tawhlo ang. William Shakespeare-a chuan, he khawvel hi lemchan tual (stage) ang a ni a. Lemchan tual zawlah mahni chan hun theuh a lemchangtu te an lo lang thin ang hian, he khawvelah hian mihringte hi kan in lan chhawk a, mahni chan hun kan hman zawh chuan kan lang nawn leh ngai tawh lovang a ti a, a dik hle awm e. Keini pawh hian hei hi kan ngaihtuah reng a tha- vawikhat chauh tleirawl, thalai kan ni dawn a, nu leh pa kan nih hunah chuan nula tlangval, tleirawl kan ni leh ngai tawh lovang. Kan hun hman englai mahhi koh kir (rewind) leh theih a ni tawh lo. He khawvelah hian vawikhat zel chauh hun i nei a, I piang nawn tawh dawn lo a nih si chuan I nun kha tu tan nge hmang la tha ber ang tih ngaihtuah ngun ang che.
2. THATLAI HUN A REI DAWN LO:
Pathian thu chuan thatlai hun hi a rei dawn loh avangin Pathian hre reng turin min fuih a. Tin, kan nunna hi chhum reilo te lo lang a, ral leh ta mai thin ang hi a ni tih min hrilh bawk.A rei loh em avang hi a ni ang, thufing pakhat chuan hetiang hian a sawi a “Thalaite hian min ngaithla theuh dawn ta se la, tawngkam khat lek ka hrilh duh chu ‘nangmah a thil awm zawng zawng te kha a tha thei ang berin hmang rawh’ tih hi a ni” a ti a. Hla phuahtu pawhin, “Kan vanglai te hi a rei lo ang, he khawvel a kan cham chhung hian, chuvangin vanglai hunte hmang thain Lalpa tan I thawk zel ang u,” tiin a phuah a. A dik tak zet a ni, Thatlai hun hman dan tha ber chu Lalpa tan hman hi a ni e. Tu tan nge I nun I hman mek? Nangma tan chuah nge ? Khawvel tan nge? I chhandamtu Isua tan?.
3. TUN HI HUN THA BER A NI:
Kan Bible chuan , “Tun hi hun lawmawm leh chhandamna ni a ni”a ti a. Thalai te tan a dik leh zual ang. Thatlai hun hi pianthar nan hun tha ber a ni a. Lalpa rawngbawl nan pawh in buatsaihna hun tha ber a ni. Nakina ti a khek ho tan pianthar a har tial tial a ni. Pathian tan nun hlan tur a hun duhawm ber lai chu tleirawl lai hi a ni e. Kum upat lam a tih atan khek suh, khua I tlai palh ang e. Tin, Lalpa tana thawh kan duh pawhin thatlai hun hi kan thawh hlawk theih hun lai ber a ni bawk. Hemi kawngah hian Mizo Kristiante kan than harh a hun tak zet a ni. Kan puitling har lutuk fo, sual lamah erawh kan thar rang hle thung si.
Pathian rawngbawltu ropui tak tak te hi Lalpa tan an lo inhmang hma khawp mai. Rev. Dr. Billy Graham-a chu kum 16 a nihin a piangthar a, kum 32 a tlin meuh chuan khawvel a rawngbawltu pawl ropui ber zing a mi Billy Graham Evangelistic Association a din fel der tawh. Mizoram missionaries lo kal hmasa te Pu Buanga (JH Lorrain) chu mizoram a lo thlen khan kum 24 mi a ni a, Sap Upa (FW Savidge) kha kum 25 chauh a la ni. ‘Thuhriltu Lalpa’ ti a an koh hial, CH Spurgeon-a chu kum 23 a nihin Waterbeach Pastor a tan nemngheh a ni der tawh. Martin Luther-a chu kum 24 a nihin an ordain tawh. John Knock-a chu kum 22 anih in an ordain bawk. India rama missionary ropui tak William Carey chu kum 24 a nih chuan hun puma rawngbawl turin a in pe fel der tawh. David Livingstone chu kum 27 a nih chuan mi kawlh sa kawlh tawn turin Africa ramthimah a lut der tawh bawk. Ulrich Zwingli chu kum 24 nih chuan Pastor a tan ordain a ni tawh bawk. Harhna hmahruaitu ropui George Whitefield chu kum 22 mi a nihin ordain a ni bawk.
Engpawh nise, kum 22 – 24 bawr vel a Pastor a tana nem ngheh ni tur leh hmun ralti tak, entirnan Mizoram, lu la hnam zinga rawngbawl a chhuak nalh tur chuan eng emaw chen in buatsaih a ngai a, an tleirawl lai pawhin an lo inbuatsaih nasa hle tawh ang tih a chiang reng mai. Thatlai hun Lalpa tan a hmang tur leh dam chung a Isua Krista tan a thawh tam kan duh a nih chuan ‘Tun hun’ tleirawl lai hi in buatsaihna hun tha ber a ni. Sual lamah chuan nausen ang ni la, Pathian rawngbawlna kawngah chuan puitling hma turin in buatsaih ang che.