Pastoral Committee-in Pro Pastor 18 la thar

Pastoral Committee-in Pro Pastor 18 la thar                                                    

Nov. 30 a Synod Pastoral Committee thukhawm chuan Synod Inkhawmpuia chhawp chhuah turin Pro Pastor 18 an la thar a, Mizoram chhunga mi 14, Manipur Area-a mi 1 leh Synod Mission Board hnuaia thawk tur mi 3 lak an ni. Pro. Pastor lak tharte hi December 5, 2012 (Nilaini)-ah Synod Rorelna Floor-ah inlan theuh tura beisei an ni. Tun tumah hian mi 54 Interview turin an inlan a ni. Hmarphei Presbytery huam chhunga Pro-Pastor hna dil pathum zingah mi pahnih, Tv. H. Lalrinmawia S/o Lalrammawia Sakawrdai chhimveng leh Tv HD Ramngaihawma S/o H.D. Vanlalruata Ratu te chu lakthar an ni.

Editorial - Tawnhriat

TAWNHRIAT

Pathian hruainain Kum khata Thla tawp ber, December Thla chu kan lo thleng leh ta reng mai. Kohhran hoten kum dang ang thovin, kawng chi hrang hrangah hma kan la a,hmasawnna pawh kan nei hle reng mai. Kan bial chhungah phei chuan Hmar Veng Branch Church, Sakawrdai ah kan nei thar a,  Bial leh Kohhran mal ang pawhin hma lakna leh hmasawnna chi hrang hrang kan nei awm e.Tin, rawngbawlna peng hrang hrang, KTP leh Hmeichhia ahte, leh Committee peng hrang hrang ah pawh danglamna leh hmalakna thar, Project tharte pawh a awm ngei ang. heng kan hmalakn chi hrang hrang ah hian rawngbawltute, a hlawhtlinna  phurchhuaktu leh a thawktute hian hlawkpuina kan nei ve em tih i in en ila, Central lama thuchhuak, Hmeichhe lamah a ni emaw, KTP lamah a ni emaw, zawma tihhlawhtlin a ni thina,  heng kan inkhawmahte hian, kan Paper zir leh kan hma lakna hrang hrang hian, kan rilru a hruai em tih hi inen ila, kan nitin hun hmanna lamah, kohhrana kan thil hriat thar leh a pawl anga hma kan lakve hi, kan rawngbawlna leh kohhran chhungkua mai bakah khawtlangah danglamna thlentu nih tum ila, kan rawngbawlna hlawhtlin lanna a ni ngei ang.

Kan dam tlang em?

=> Tv. Ramthianghlima, Pu Zokhawsanga fapa Malaria PV vangin CHC ah admit a ni a, Zirtawpni khan dam takin a chhuak leh ta.

=> Nov. 26&28 khan Krismas Thing ek hnatlang neiin, Nilaini khan a tul ang chu ek zawh a ni ta a ni.

=> Nov. 29(Ningani) zan khan Pu Thasiama Inah Kristian Chhungkua Fehchhuah Programme hman a ni. Inkhawm hi T.Upa Zothangkhuma’n a kaihruai a, Upa Lalramhluna hnen atangin Pathian thuchah ngaihthlak a ni.

Tun kar Damdawiin

Tunkar chhungin  CHC ah mi  12 admit thar an ni a. Tun dinhmunah mi 2 enkawl an ni a, kan Kohhran chhungkua atangin damlo 1 enkawl niin dam takin a chhuak leh a ni. Naupiang  3 an awm  a. naute 1 erawh Nov 25, 2012 khan a boral. Damlo Aizawla refer 1 a awm bawk. Dr Shahnaz Zothanzami MO, Training  a hun engemaw chen thang tawh chu kar leh  khian a rawn chho beisei a ni.  

Branch Committee kohna

Dt. 3.12.2012 (Pathianni) chawhma inkhawm banah Kohhran Sunday School Hall-ah Branch KTP Committee pawimawh tak koh a ni a. Branch Committee member-te leh ex-officio te kim taka kal tura hriattir kan ni.

Inkhawm

KOHHRAN  PROGRAMME :

Vawiin- 02.12.2012
Pathianni Chawhma: (9:45 - 10:15 a.m)
Sunday School
Zirlai 44-na : Levia chite chenna tur leh inhumhimna khua
Tantu : Pi Lalhlimpuii (Kristian chhungkua & Buhfaitham)
Pathianni Chawhnu: (1:00 - 1:30 p.m)
Hruaitu : T.Upa Zothangkhuma
Thusawitu : Upa Lalramhluna
Thupui : Pathian thu chu a nung
Pathianni Zan:  (5:30 - 6:00 p.m) 
Hruaitu : T.Upa Zothangkhuma
Thu sawitu : Upa Lalsangzuala
Thupui : Pathian thu chuan thil a ti thei

Naupang S.S Programme
Pathianni Chawhma: 
Tantu : Laldinsangi
Thawhlawm khawntu turte:
 1. Lalrinhlui 2. Lalramchhuangi
Thawhlawm hlantu - Nl. Lalrinchhungi

Hmeichhe inkhawm

Kohhran Hmeichhia Programme :
Dt. 04/12/2012: (5:30 - 6:00 p.m)
Hruaitu : Pi Sumneihzovi
Tantu : Pi Lalengzauvi
Tu leh fate tana tawngtai rual

KTP Inkhawm

KTP  Inkhawm  Programme : 

Dt. 03/12/2012: (5:30 - 6:00 p.m)
Group Budget lakkhawm (hlanna) inkhawm hun a ni a. Programme erawh kan tarlang hman rih lo a ni
Dec. thla chhung thawhlawm khawntu tur te :
1. Lalhmunsiami 2. Nl. Gospel Ramkinlovi

Lawrkhawm

KTP Group Budget hlan : Dec. 3, 2012 (thawhtanni) zan hi Group Budget lakkhawm hun alo ni leh ta. Group tinte Budget tlak theuh thei turin i inbuatsaih ang u.

BSI,Sakawrdai Area: Dt. 26.11.2012 khan Bible Society of India, Sakawrdai Area te chuan Salvation Army C.O Quarter, Sakawrdai ah Budget chungchangte, Area Zaipawl chungchangte leh a tul dangte ngaihtuahin Committee an nei a, chawhlui buatsaih nghal a ni bawk.

PES Zirtirtu Training: Presbyterian English School Zirtirtute tan Pre-School Teachers Training, SCERT-ah neih a ni. Nov. 20 - 23 chhung khan a tum khatna neih a ni a, hetah hian zirtirtu 39 an tel. A tum hnihna chu Nov. 27 - 30 chhung khan neih leh a ni a, hetah hian PES hmun hrang hrang atangin 41 in training hi an chhim leh a ni. 

ATC Day 2012: November 23 khan Aizawl Theological College Centenary Building Quadrangle-ah Aizawl Theological College Day vawi 105-na hman a ni.

Consultation on Evangelism: Central KTP buatsaihin Nov. 28 khan nilengin Mission Veng Kohhran Hall-ah thalaite rawngbawlna peng pakhat Evangelism lama rawngbawlna tihchak dan tur chungchanga inrawnkhawmna (Consultation on Evangelism) hun hman a ni a, Branch tin aiawh mi pakhat theuh tel tura sawm an ni a, mi 400 zet an kal. Chawhma dar 9:30-10:00 chhungin registration tihfel a ni a, dar 10:00-12:00 chhung chu chawhma session niin Tv. V.L. Muanchhana, Asst. Secretary, CKTP-in a kaihruai a, Upa Lalrinmuana, General Secretary, CKTP-in puan tur pawimawh a puan hnuah “Evangelism awmzia leh Evangelical Cell kalphung” tih thupui hmangin Rev. Lalrinmawia, Leader, CKTP-in thu a sawi a, hei hi sawihonain a zui a ni.

Chawhnu session hi chawhnu dar 1:30 atanga tanin tlai lam dar 3:30 thleng hman a ni leh a. Chawhnu session hi Pu Lalnghinglova, Committee Member, CKTP-in a kaihruai a, “Thlarau lam inbuatsaihna” tih thupui hmangin Tv. Vanlalvuana, Venghluiin thu a sawi a, sawihonain a zui leh a ni.

Presbyterian Kohhrana Kristian Thalai Pawl hian hun rei tak atang tawh khan thalaite zingah Evangelism lam hawia rawngbawlna hi an lo kalpui tawh a, tun thleng hian thalaite sual kawng zawh lo tura chhanchhuahna hmanraw 

Rawngbawlna lam

Presbyterian English School Rawngbawlna

Dt. 25.11.2012 (Pathianni) zan inkhawm-ah Presbyterian English School (PES) naupangte chuan kan kohhran-ah thu leh hla hmanga rawngbawlna hun an hmang. School naupangte hian items pathum- Pathian thu, Quartet, leh Zaipawl hmangin rawngbawlna an nei a, Kohhran ta an nih anga zirtirtute leh  zirlai naupangten rawngbawlna hun an nei thei hi a lawmawmin an fakawm hle a, beng an titlai hle a ni.

Kohhran Hmeichhe Ni vawi 16-na hman a ni

November 30 (Zirtawpni) kha Kohhran Hmeichhe Ni a ni a, Presbyterian Kohhran Hmeichhiate chuan hemi pual hian programme an hmang. Kohhran Hmeichhe Ni hi kum 1997 atangin hman tan a ni a, kumin hi vawi 16 an hmanna tur a ni ta. Central Kohhran Hmeichhe Committee chuan hemi pual hian programme duangin, Chawhma Inkhawmah ‘Tunlai huna naupangte venhim Chhungkaw mawhphurhna’ tih thupui zirho a ni a, Chawhnuah erawh Bial/Kohhranin tha an tih angin programme hi hman a ni. Kan Kohhran-ah pawh chawhma leh chawhnu hun hi hman a ni a, chawhnu-ah Group 3 te Lengkhawm zaia intihsiakna neih a ni a, heng bakah hian Special Items, Solo, Drama & Dance hmanga intihhlimna neiin hun hlimawm tak an hmang bawk.

Bible Sunday Pual

December 2 (Pathianni) hi Bible Sunday a ni a, Bible Society of India (BSI) zawmtu Kohhran hrang hrangten hemi pual hian programme an hmang ang. Presbyterian Kohhran chuan thupui pahnih a siam a, Kohhran thenkhat tum hnih programme siam theite tan ruahman a ni. Inkhawm tum khat hmangte tan a eng zawk zawk emaw, a pahniha kaihkawpin emaw hman theih a ni bawk. Bible Society puala thilpek lak khawm tur a ni a, Branch Treasurer hnenah theh luh tur a ni.

Kumin Bible Sunday thupui turte chu -

1 Pathian thu chu a nung (Johana 1:1-3; Isaia 55:9-11)

2 Pathian thu chuan thil a ti thei (Hebrai 4:12)

Kristian Chhungkua Fehchhuah 

Dt. 29.11.2012 (Ningani) zan khan Pu Thasiama Inah Kristian Chhungkua Fehchhuah Programme hman a ni. Inkhawm hi T.Upa Zothangkuma’n a kaihruai a, Upa Lalramhluna hnen atangin Pathian thuchah ngaihthlak a ni bawk.

Pastor-te pual Counselling Traning khar

Mizoram Synod, Family Guidance & Counselling Centre-in Nov. 14 atanga Pastor-te puala Intensive Residential Pastoral Care & Counselling Training vawi 22-na, Synod Conference Centre-a a buatsaih chu Nov. 27 zan khan khar a ni. A kharna hun hi Rev. Zosangliana Colney, Synod Executive Secretary-in hmanpuiin training chhuakte hnenah certificate a hlan. He training-ah hian kum 2010-a nemngheh Pastor 17 an tel a ni. FG&CC hian kum tinin Pastor leh Upa te tan Pastoral Care & Counselling Training hi a buatsaih thin a, Pastor 376 hnenah training Certificate hlan tawhin, kum 2002 atanga Lay Leader puala vawi 17 a neih tawhah Lay Leader 315 hnenah Training Certificate a hlan tawh bawk.

Synod Executive Commitee Vawi 241&242-na

Nov. 28 -29 khan SEC vawi 241&242-na neih a ni a, SEC member 125 an kal a ni. Thu ngaihtuah 19 neiin, hengte hi Synod Board leh Committee dangin an thlir tawh hnua lo lut lehte an ni hlawm. Kum 2016-a Puitling Sunday School zir tur thupui atan “Thlarau Thianghlim” tih thlan a ni a, a ziaktu atan Rev. Dr. Tlanghmingthanga, ATC ruat a ni. Presbyterian Church in America (PCA) chu thawhpui atan thaa hriain Synod Inkhawmpuia thlen tura tih a ni a. Synod hnuaia thawktute hlawh enthatu Pay Commission din rawtna pawm a ni a, Synod Inkhawmpuia ngaihtuah tura tih a ni bawk. Bawngkawn Synod ramah hian Hall lian mi 5000 leng, Out patient clinic, Youth Recreation Centre, Parking leh Pastor Quarters awm thei tura ruahmanna chu pawm a ni. SEC 242-na thukhawm hian Budget chungchang bik an rel a. Finance Committee-in Synod Department hrang hrang atanga Additional Budget dilna a lo ngaihtuah tawh chu thlir hovin a pawm a, Synod Budget (2013 -2014) Finance Committee-in a lo siam rem hmasak tawh chu SEC hian thlir nawnin Synod Inkhawmpuia thlen turin a ruahman a ni.


Pastoral Committee-in Pro Pastor 18 la thar                                                    
Nov. 30 a Synod Pastoral Committee thukhawm chuan Synod Inkhawmpuia chhawp chhuah turin Pro Pastor 18 an la thar a, Mizoram chhunga mi 14, Manipur Area-a mi 1 leh Synod Mission Board hnuaia thawk tur mi 3 lak an ni. Pro. Pastor lak tharte hi December 5, 2012 (Nilaini)-ah Synod Rorelna Floor-ah inlan theuh tura beisei an ni. Tun tumah hian mi 54 Interview turin an inlan a ni. Hmarphei Presbytery huam chhunga Pro-Pastor hna dil pathum zingah mi pahnih, Tv. H. Lalrinmawia S/o Lalrammawia Sakawrdai chhimveng leh Tv HD Ramngaihawma S/o H.D. Vanlalruata Ratu te chu lakthar an ni.

Synod Inkhawmpui vawi 89-na hmang mek

Nov. 28 - Dec 9, 2012 chhung hian Chanmari Kohhran Biak Inah Synod Inkhawmpui vawi 89-na hman mek a ni. Nov. 28 ah Synod Executive Committee an thu a, Nov. 29 ah SEC budget session neih a ni. Nov. 30 ah Pastoral Committee thu in, Pro Pastor hna dilte interview neih a ni a. Dec. 3 (thawhtanni) ah Pastoral Committee chhunzawm leh a ni ang. Dec. 4 ah Nomination Committee an thu ang a, Dec. 5 - 8 (Nilaini - Inrinni) thleng Synod Rorel Inkhawm neih a ni ang. Inrinni zan-ah Thlarau lam thupui ‘A ram leh a felna zawn hmasak’ (Mat. 6:33) hmangin Rev. C.Chawnghmingliana, Lunglei hnen atangin ngaihthlak a ni ang a. Pathianni chawhma-ah Pastor leh Pro Pastor dahngheh inkhawm neih a ni ang. Pathianni chawhnu-ah Rev. Lalramliana Pachuau, Moderator-in Lalpa zanriah Sakramen a theh ang a, Pathianni zan-ah Moderator kalchhuak Rev. Thangzauva hnen atangin Valedictory sermon ngaihthlak a ni bawk ang.

Sermon - Kristian nun nghet

Kristian nun Nghet

1 Korinth 10:12

Milem ziaktu pakhat hian Lal Isua lem ziak a tum a, Isua ang ber tura a hriat zawng turin mipui tamna bazaar hmunah a kal a. Lal Isua ang bera a hriat tlangval pakhat chu a thuttir a, a lem chu a ziak ta mawlh mawlh mai a. Chumi hnu thla khat velah chuan a mantirtu Juda Iskariota lem ziak a duh leh ta a. A hma ang bawk khan mipui tamna hmunah bawk a kal a, Juda Iskariota ang ber tura a rin, mantirtu ni âwm reng, sual hmel tak tlangval pakhat chu a thuttir a, a lem chu a ziak leh dawn a. Chu tlangval chuan, “Ka pu, hmanni lawk khan helai hmunah bawk hian keima lem hi i ziak tawh a, a va mak teh sek ve, i ziak sual palh em ni?” tiin a zawt a. Lemziaktu chuan chu tlangval chu en vang vang chungin, “Tlangval, a va mak tak ve mawle, hmanni khan Lal Isua i an teh lul nen, tunah erawh chuan a mantirtu i lo ang leh hman tawh a nih hi,” a ti ta ngawt mai a.

Kan ram Kristiante nun nghet lo lutuk hi kan vei tlâng theuh va, a dik tak chuan a veitute nun pawh hi a nghet bik hek lo va. Chuvangin tumah inhmusit lova kan ngheh lohna lai hi invei tawn a, nun nghet nei tura tan kan lak a pawimawh a ni. He pa ang hian a changin Isua kan ang viau va, a changin a mantirtu kan ni leh mai bawk a. kan tha viau emaw kan intih laiin kan lo sual leh phut a, kan sual viau emaw tih laiin kan lo tha thar leh phut phut bawk a. Pathian thua kan tui lai rau rau chuan da leh mai  mai thei hmel pawh kan pu lo va, no thum bela no ruk chhum an sawi ang maiin kan khat a. Nimahsela kan dâk leh vek vek chuan tui leh thei hmel kan pu hek lo. Hmana tui kha tunah an ro der a, hmana tui lo kha tunah kan tui thar a, tumah hi inhmusit tur kan awm rih lo a ni.

Vawi khat chu tuai pakhat hian hian hmeichhia emaw intiin hmeichhe hnute lem hi a insiam chawp a. Chu chu mi dangin an sut palhsak ta a, a khamphei kha a tung chho zâwngin a awm ta hah mai an ti a. He tuai ang hian Kristian thenkhat chu kan piangthar fuh viau emaw  kan tih lai hian min sutu azirin kan danglam leh mai mai thin. He tuai hnute hi a sutu hian a su na hle pawh a ni lo va, siam chawp a nih avangin a danglam hma hrim hrim a ni zawk. Kan Kristian nun hi siam chawp leh hawh chawp a nih phei chuan, sut kher loh pawhin a danglam leh mai thin. Naupang pakhat chu a piangthar ve a, a nu chuan a tirh dawn apiangin, “I piangthar tawh si,” a ti ziah mai a. Nakinah chuan naupang chuan a nu tirhna chu a ning ta deuh va, “Ka nu, ka piangthar peih tawh lo,” a ti ta hlawl mai a. Pianthar chu kan duh e, nimahsela piangthar nuna nun aiin piangthar lo nuna nun hi kan peih zawk si. Kan ram Kristiante hian kan kawngte hi chhut ngun kan mamawh a ni.

Zirtirna dik lo lo pian chhuahna chhan pakhat pawh hi nun nghet nei lote vang a ni. Chutiang mite chuan chhandam nih an duh ve si a, chhandamte nun dan turin an nung peih si lo va. A hahdam thei ang berin Pathian thu an sawi a, chu chu mi thatchhiate bawkin an lo pawm a. An zirtirna chu lung tileng tak, hahdam tak, awih awlsam tak a ni zel ang. Chu zirtirna chu an pawm tak tak a ni lo va, an sual thupna leh mahni an inthiam chawpna a ni. Nun nghet neih an peih lo va, an zawh tawkin Pathian thu an sawi awlsam ta a, an tui phian a, an thinlung a chawl chuang reng reng lo.

Kan ramah hian Pathian thu ril pui pui kan sawi a, thuthlung mak pui pui kan luhchilh hlawm a. Inlarna mak tak tak kan hre tam a, Pathian aw hria eng emaw zat kan awm tawh a. Khawhar inah thlarau mi kan fuan khawm a, kan thinlunga thu thleng thar (Thuthlung Thar ni lo) sawi tur kan nei reng a. “Ka sawi lo vang ka ti a, mah se...” tiin kan ding chhuak leh nge nge thin a. Mahni testomony hi mi dangte hriatah kan sermon nghek nghek a, mi dangte chawmna emaw kan ti tlat zel a. Kan nun erawh chu a nghet mawh em em si hi a mak a ni.

Nghet takin i ding ang, Beram No thisena inbualin;              

Lalber sipaite kan ni,  A thu min tiam ang zelin;               

Lallukhum ropui kan hlawh ang a.

PES rawngbawlna

Dt. 25.11.2012 (Pathhianni) zan inkhawmah Presbyterian English School te chuan Sakawrdai Kohhran Biak Inah Worship service hun hmangin rawngbawlna an nei. Items hi chithum neiin, Pathian thu, Bible chang sawirual, Quartet leh Zaipawl-te an present thei a, hetianga School naupangten rawngbawlna hun an han hmang thei hi a lawmawmin beng an titlai hle a ni.

Krismas thing phurh hnatlang neih a ni...

Dt. 24.11.2012 (Inrinni) khan Tinghmun kawngah kan Kohhran Krismas Thing phurh hnatlang neih a ni a, mi 42 kan thawkchhuak thei a ni. Hnatlang hi Zingkar chaw ei hma Dar 7:00 a.m velah chhuakin Pu Lalrinngheta Motor-in kal a ni a. Hnathawhna hmunah Chaw ei siamin chhun Dar 12:00  velah Tukthuan ei a ni a, thawkchhuak ten hlimawm an ti hle. Beisei aiin thawkchhuak kan thahnem a, a lawmawm hle a ni. Thing ek hnatlanga thawk chhuak leh turin lo inbuatsaih ang u.