Thlen chin atang khan hma sawn
Phil 3:16
- Pro Pastor Ngurthanmawia Sailo
Pathain Kohhran, a thisen a a din kan nih avang hian kohhran te hi awm mai mai tur kan ni lova, Pathian hian mawhphurhna leh tih tur tam tak kan ko ah a nghat tlat avang hian tun kan dinhmun atang a hmasawn zel tur kan ni.
Rawngbawlna ah hian tan lakna tur kawng tam tak kan nei, kan lo tih tawh pawh tam tak a awm ngei ang. Nimahsela, kan tih tawh ah lungawi leh duhtawk mai lo in hma lam pan a kan thlen chin atanga kal zel tur erawh kan ni tih hi kan hriat fo a tul awm e. Kan kohhran 2010-2011 leh 2011- 2012 bial khawmpui report a a lan dan hetiang hian lo thlir thuak ta ila.
2010-11 2011-12 Khumna
1. Kohhran member zat 380 379 -1
2. Dan zawhkim zat 239 247 +8 3. Chhungkua in zat 64 74 +10
4. Pawl dang atang a lo pakai zat 1 19 +18
5. Thunun zat 8 10 +2 6. Naupiang zat 10 6 -4
7. Synod a sum chhun luh zat 451905 4949911 +43086
Kan kohhran dinhmun en chuan a tlangpui chuan hma kan sawn rualin tan lakna tur tam tak kan nei tih kan hre awm e. Kohhran member an pun leh zual theih nana tan lak hi kan tih mak mawh chu a ni. Hemi kawngah hian Pastor-te leh Upa te mai ni lovin kohhran mimal tin ten mawhphurhna lian tak kan nei a ni. Inhawng takin, fel tak leh dik takin, kan Kohhran mi leh sa lo ni tawh te la kir leh tur a hma kan lak nasat pawh a tul awm e.
Kum kal ta en in naupiang kumin ah hian kan tlem zawk a,he lamah pawh hian Kohhran mipui ten tan kan lak a tul awm e. Kohhran mipui te fa nei tam tur a kan in fuih thar sauh sauh pawh a tul tak meuh meuh a ni.
Thilpek lamah chuan kan Kohhran hi kan bial ah chuan kan sang fal hle a, mahse hei hi kan duh tawk mai tur a ni lo. Kohhran mipuiten sawma pakhat pek kan uar sauh sauh tur a ni ang. Oswalt J. Smith chuan " Nikuma i pek ang zat i pek a, i tawngtai zat i tawngtai chuan Pathian ram hi zau zel suh se i tihna a ni" a ti.Kumhlui aia tam zawk Pathian tan i pe ang u. Lal Isuan " Pe rawh u, chutichuan pekin in awm ang, thahnamngai taka teh a, beng muk a, liam zawih zawihin, in mal chungah an pe ang che u. In tehna ngai bawkin an teh sak leh dawn si che u a," a ti (Lk. 6:38).
Kan Kohhran mipuite Pathian biak inkhawm lamah tan kan lak nasat a tul khawp mai. A tlangpui in nu lam chu an tha tlangpui a, thalai leh pavalai te a bik in inkhawm lamah tun aia tan kan lak nasat a tul awm e. Inkhawm hi thlarau lam chaw tha miin kan dawnna hmun a ni a. Miin chaw eitur a dawhkan a pan peihloh chuan riltam in a awm mai thin. Chutiang bawk chuan miin biakin a hlamchhiah viau chuan a thlarau nun a riltam a, a chau mai thin. " Thenkhat tih dan anga kan inkhawmte bansan lovin, infuihtawn zawk ang u; ni chu lo hnai telh telha in hriatin infuih tawn nasa leh zual zauh rawh u" (Heb. 10:25)
Kan kohhran hian inpumkhatna tha nei tur zawng a hma kan sawn a tul hle awm e. Kohhran committee inkar ah te, thalai inkar ah te, kohhran hmeichhe inkar ah te tun aia inpumkhatna tha a awm theihnana tan kan lak atul hle. Ram leh ram an indo a ram a ding chhuak theilo ang hian, Kohhran leh Kohhran inkar a in lungrualna thalo hian Kohhran than a ti thu thei a ni.
Heng bakah hian sawi tur tam tak a awm thei awm e. Engpawh nise tuna kan dinhmun a lungawi mai lo hian kan thlen chin atanga hmasawn tumin Kohhran hoten Kumthar lo awmtur ah hian tan ila thar leh ang u.
