Kohhran Hmeichhia Inkhawm

Kohhran Hmeichhia Programme :

Dt. 23/10/2012: (5:45 - 6:15 p.m)
Hruaitu : Pi Lalhlimpuii
Tantu : Pi Lalhmangaihi
Thusawitu : Pi Sumtuahthangi

Kan dam tlang em?

=>Pi Dartuahkhawli w/o Upa Lalngurliana(L) chu thisen sang vangin thawhtanni khan Sakawrdai CHC ah admit niin, enkawl mek a ni.

=>Salemmawii kum 15, Vanhmunmawiia fanu chu Nerve thalo vangin Zirtawpni khan CHC ah admit a ni.

=>P/P Ngurthanmawia Sailo chu Dt.18&19.10.2012 chhung khan ATC a  Pro-Pastor Exam nei chu Inrinni khan dam takin a rawn haw leh ta.

=>Dt. 28.10.2012 (Pathianni) zanah Kristian Chhungkaw puala programme hman a ni dawn a, Upa Lalsangzuala hnen atangin Pathian thuchah ngaihthlak a ni ang.

Editorial - Inpumpekna

INPUMPEKNA

Khawvel thilah pawh, tihtakzeta thilti mi leh ti thin chu mi hlawhtling, mi chung en an ni thin.An hnathawhna ah leh an thiltihna ah te, an inpumpekna rah chu a lang chhuak thin a, a zarzotu chu an mahni leh mi dang an ni thin a, an inpumpekna rah chu mi dangte tan malsawmna a ni thin a ni.. Kan Pathian pawh hian ama rawng kan bawlna kawngah pawh hian ‘Inpumpek’ a phutin, kan theihna zawng zawngin a mah kan zui hi a phut a ni. Chutiang chiah chuan, amah laka bo tawh te, amah hlata awmte  pawhin, Pathian kan hmuh leh theihna tur chuan , rilru dang pulova, tih tak zeta a mah zui tum hi a ngai ta. Synod Revival Team te chuan kan Kohhranah rawngbawlna an nei mek a, Kohhran ten he hun  hi hlawk taka hman tumin rilru kau ila, inpumpeknain he hun hi hman tum ang u. Tunlai ah mahni eizawnna theuhah kan buai ta hle a, Amaherawhchu, Van lam thil kan zawnna lamah hian Lei lam thil, min tibuaitu leh, kan nitin khawsakna kaihhnawihte hi kan dah that ngam a ngai. Kan chatuan ro hlu zawnna ah hian, kan theih tawpin inpumpekna nen inb uatsaih ila, chu chu Pathianin mihring min beiseina a ni tih i hre nawn leh ang u.

SMTC Hriattirna

HRIATTIRNA

Synod Multipurpose Training Centre, Mission Vengthlang, Aizawl-ah a hnuaia Trade-ahte hian training hawn a ni leh dawn a. Dilna chu Programme Director hnenah Kohhran lehkha thil telin thehluh theih a ni. Zir hun chhung chu 15th Jan - 15th Dec, 2013 a ni ang.

1. Tailoring mipa - Seat 20
2. Tailoring hmeichhia - Seat 40
3. Shoe making, mipa - Seat 5
4. Dil theih hun chhung - November 2012
5. Interview - December 12, 2012 (10:00 a.m.)
Zir tura lakte chu thla tin stipend ‘ 500/- pek an ni ang.

Sunday School awm dawn lo

Sunday School awm dawn lo
Kan Kohhranah Crusade neih mek a nih avangin Naupang & Puitling Sunday School Programme siamsa chu hmang lovin, Pathianni zan thleng Crusade Programme chhunzawm a ni ang.

Rawngbawlna lam

SKD, Bial Hruaitute leh Bial Zaipawlte

Hmarphei Presbytery, Darlawn Venghlun Kohhran a neih zawh takah, Sakawrdai Pastor Bial chhung atangin member kal kan tha hle a, Bial Hruaitute a tam zawk an kal thei a, Bial Zaipawl member pawh mi 27 an kal thei bawk a ni. Pu Lalringheta, Asst. Leader, SKD Branch chuan man pawh awm lovin Bial Zaipawlte hi a motor-in a dah a, memberte an lawm hle. Bial Zaipawl member lo ni tawh, Nl. Lalthazuali (TZ-i) pa Pu R. Darmawia, chuan Dt. 13.10.12 (Inrinni) tlai ah Bial Hruaitute leh Bial Zaipawlte chawhlui buatsaih sakin hun hlimawm tak an hmang a ni. 

2013 Hmarphei Presbytery Darlawn-ah

October 11 - 14 chhung Hmarphei Presbytery Inkhawmpui Darlawn Venghlun Kohhran Biak Inah tluang taka hman a ni. Kan Bial chhung atanga member kal zat hi kan hrechiang chiah thei lova, mi 80 chuang kan kal thei a, Presbytery Inkhawmpui a kan Bial kal tam ber tum a ni. Presbytry rorel palai 190 an kal, Upa 121 kalin 29 an kal thei lo. Presbytery ah hian Upa 2 sun a ni a, Upa 2 nemngheh an ni bawk. Kum 2013 Hmarphei Presbytery Inkhawmpui chu diltu an awm loh avangin Darlawn Kohhran Biak Inah nghah a ni a, Puipate chu hetia’ng hi an ni. Moderator : Upa HK Zathuama, Secretaries : Upa C Chawngkhuma(Sr), Upa Lalramhluna(Jr), Treasurer: Upa Rokamlova(2012-15), Statistician: Upa Lalsailova. Thlarau lam thupui, I Pathian tawk turin inpeih rawh(Amosa 4:12) tih hmangin Rev. K Lianmunga, Ratu  hnen atangin ngaihthlaka ni ang. Presbytery Huap KTP Meet 2013 neih rel niin, OB leh CM te ruat fel an ni bawk.

NEICC Pual Tawngtai rual rampum huapin

October 21, 2012 (Pathianni) hi Rampum huapa NEICC puala tawngtai rual hun a ni a, a hnuai a mi hi tawngtai thupui hrang hrangte an ni:-

1. NEICC member kohhran 51 te inpumkhat zelna atan leh chumi atanga miten Pathian ram nun an hmuh theih nan.

2. NEICC hotute leh a hnuaia Thalai leh Hmeichhe lam hruaitute leh Office-a thawkten Pathian ram rawngbawl hna thawk rilru an put zel theih nan.

3. NEICC kal tlanga kristianten zirna hmanga rawng kan bawlhona Meghalaya-a Union Christian College-a thawktu Principal, thawktu dang hnam hrang hrang te, state hrang hrang atanga zirlai lo kalte leh College enkawltu Board member-te inpumkhatna atan.

4. NEICC hmalakna kal mek- Research Centre, Pathian thua Doctorate course zirna, UCC-a Higher Secondary course, Jubilee Building leh thil dang ruahman mekte an lo hlawhtlin zel theih nan.

Aizawl Theological College Doctoral Centre

Aizawl Theological College chu nikum (2011) Synod Inkhawmpuiin Doctoral Centre (Pathian thua Doctor zir theihna) atana siam tura a rêl chu bawhzuiin Senate of Serampore College atangin a endiktu ‘Commission’ Member mi 6 ten an rawn tlawh a, Oct. 19 (Zirtawpni)-ah lo thlengin, Mizoram State Guest House-ah hêng Commission memberte hi lo lawmna neih a ni. He hunah hian Synod Theological Education Board member te, ATC Principal lo ni tawh te, Synod Officer te bâkah Mizoram University Registrar leh MBSE President te sawm an ni. Oct. 20 (Inrinni) nilengin ATC-ah Library te enin Zirtirtute leh Zirlaite an kawm a, Tlaiah ATC zirlaiten anmahni lawmna buatsaih in,  ATC Faculty ten Zanriah an kilpui bawk. Oct. 21 (Pathianni) hian Aizawl Khawpui Kohhran hrang hrangah an inkhawm ang.

Sunday School awm dawn lo
Kan Kohhranah Crusade neih mek a nih avangin Naupang & Puitling Sunday School Programme siamsa chu hmang lovin, Pathianni zan thleng Crusade Programme chhunzawm a ni ang.

Crusade hun hman mek a ni
Dt. 19.10.2012 Zirtawp zan atanga tanin kan Kohhran ah Synod  Revival ‘Hnehna puangtu Team’ Speaker Pu C.Lalzahawma hmangin Crusade neih tan a ni a. Crusade hi Pathinni zan thleng neih ani dawn a, hemi zawh hian Thingsat Kohhranah neih chhunzawm tura beisei a ni bawk. Crusade-ah hian Kohhran chhungkua te duhangin kan inkhawm thalo hle a. Kan mamawh dik tak chharchhuak thei turin chhungtinte inbuatsaih ila, tan ila tlang ang u.
Tawngtai rual beihpui : Dt. 20 .10.12 (Inrinni) zan khan rampum huap Synod Revival Team rawngbawlna puala Tawngtai rual beihpui chu kan Kohhran ah pawh hman a ni.

Music Committee din a ni
Synod-in Kohhran tinah Music Committee din tura a tih angin, kan Kohhran ah pawh hetiang hian Music Committee din a ni:-
Chairman : T.Upa Zothangkhuma
Secretary : Pu Ronald Lalramsanga
Members : Pu Lallungkhama,
Pu Lalnghakliana, Pu HP Lalhnunliana

Pastor Nupuite Intawhkhawm
Oct. 24 (Nilaini) chawhma dar 10:00 hian Pi Zaii Hall, Synod Conference Centre-ah Presbyterian Pastor Nupuite Intawhkhawmna neih a ni ang. Presbyterian Kohhran Pastor Nupuite hian kum tin intawh khawmna hun an hmang thin a, mithiamte ruaiin thuchah ngaihthlak bakah thupui thlan bik paper te an zirho thin a, an pasalte rawng-bawlna an tawiawm theih dan tur leh Kohhran tana Nu nih tling an nih theihna tura theih tawp a hma la tura infuihna hun te hman a ni bawk thin.

KTP Inkhawm

KTP  Inkhawm  Programme : 

Dt. 22/10/2012: (5:45 - 6:15 p.m)
Hruaitu : Pu Lalbiaktluanga
Tantu : Tv. Lalhumhima
Thusawitu : Pu Ronald Lalramsanga
Oct. thla chhung thawhlawm khawntu tur te :
1. Nl. Lalnghatzovi 2. Nl. Lalhriatpuii

Tun kar Damdawi In

He thu buatsaih lai hian  CHC ah mi 10 admit an ni a. mi 7 enkawl an ni. Kan Kohhran chhungkua atangin damlo 2 enkawl mek an ni bawk. Naupiang an awm lo. Dental Department ah he thu buatsaih lai hian mi 9 tunkar chhungin)enkawl an ni. Dt. 17.10.2012 (Nilaini) khan Dr. Shamim, Dental Surgeon  hovin Medical Staff ten Primary School I ah School Health Check up an nei a, Naupang 21 Ha leh Mit an endik sak a ni. 

Lawrkhawm

Damdawi In Inentirman ti sang : Sakawrdai CHC a Rogi Kalyian Samiti(RKS) Meeting, Dt. 20.10.2012 a neih chuan Inentirna man, Out Patient Department(OPD) leh Emergency Fund a tisang. OPD Fee Rs 5 ni thin chu, Rs 10 ah a tisang a, Emergency Fee Rs 10 ni thin chu Rs 20 ah a ti sang bawk. Inentirna man thar hi Ni 22.10.2012(Thawhtanni) atanga hman tur a ni ang. 

Manipur Area Committee: Oct. 17 - 20 chhung khan Manipur Area Committee a tel turin Rev. Thangzauva, Synod Moderator; Rev. Dr. Lalhmangaiha, Finance Officer; Rev. Vanlalzuata, Senior Executive Secretary; Rev. Lalchhuanliana, Committee Member; Rev. C. Vanlalhruaia, Committee Member; Rev. C. Laltanliana, Committee Member leh Upa C. Lalmuankima, Committee Member te an kal.

Synod Committee: Mizoram Presbyterian Church Synod hnuaia Committee leh Board peng hrang hrangte Synod Inkhawmpui atana inbuatsaihin an thu tan dawn a. October 22 (Thawhtanni) hian Pension Board Committee an thu ang a, October 23 (Thawhlehni) hian Presbyterian Communications (PRESCOM) Board Committee an thu leh ang a, October 24 (Nilaini) hian Sunday School Comittee an thu ang a, October 25 & 26 hian Synod Mission Board Committee an thu leh ang.

KTP : 2012 General Conference thurel, ‘Mental Health, Work Ethics leh Value System Inzirtirna neih ni rawh se’ tih chu bawhzuiin mithiamte sawmin Doordarshan (DDK) leh All India Radio (AIR) ah te sawihona leh inkawmhona te neih tawh a ni a. Tunah hian hemi chungchanga hmalakna pakhat atan Branch tina zir tur Booklet thawnchhuah mek a ni a, hemi hmu lo te chuan KTP Office-ah ngaihven theih a ni.

Student Christian Movement (NEI) Jubilee: October ni 15 -17 chhung khan India ram chhunga Kristian zirlaite inzawmkhawmna pawl, SCMI Centenary lawmna leh India Hmarchhaka an din kum 75 tlin lawmna Aizawl Theological College-ah an hmang a. An jubilee thupui atan “Witnessing Christ in a Pluralistic World” tih an hmang a, “Economic Justice” tih chungchang thuziak an zirho bawk.

Sermon - Krista avanga mi â

Krista avanga mi â

Keini zawng Krista avangin mi â kan ni (I Kor. 4:10)

Vawi khat chu London khawpuiah khuan mi danglam tak mai pakhat a awm a. Ni khat chu “Krista tana mi â ka ni e,” tih hi a kawr hmaah a tar kulh mai a, chuti chung chuan bazaar lun laiah a tei a tei kual a. Mite chuan hmusit takin an nuih ru tet tet hlawm a. A tuk lehah phei chuan a kawr hnung lamah chuan thuziak dang a rawn tar belh chhah leh a. Mite chuan nimin lam aia â zual sauhva ngaiin an nuih a za lehzual a. Amaherawhchu a hnung lama thuziak chuan mi thenkhatte thinlung a khawih ta riau mai a, chuta thuziak chu, “Nang tu tana â nge i nih ve?” tih hi a ni. Mite chuan Krista tana â kan nih loh vek vek chuan Setana tan kan â lo thei lo a ni tih an ngaihtuah zui ta a.Chu pa chu nuihzat ngawt tur a nih lohzia an man ta a.

Tirhkoh Paula ngei pawh kha thiamna lamah chuan Gamaliela ke bula sei lian ngat a ni a, tunlaia Phd. kan tih ang hi chu a ni ngei ang. Nimahsela, “Keini zawng Krsta avanga mi â kan ni e,” a ti tlat mai. Krista avanga tuar ngam a nihna te, chân ngam a nihna te, thi ngam a nihna te a sawina a ni. Khatiang khawpa mi thiam kha, Isua avangin hmuhsit leh endawng a tuar nasa hle a, lung inah vawi eng emaw zat a tâng a, khawvel mite ngaih chuan a va han â tak em!!

Krista avanga Petera-te âtziate kha khawvel mite chuan an nuih zat hle ang. Galili dilah khan lawng pahnih pil lek lek khawpa sangha tam lutuk an man khan, Lal Isuan  amah zui turin a sawm a. An sangha man zo zaite leh an len te kalsanin Lal Isua an zui ta daih mai a. An sangha mante kha han zuar sela, a man chu an nupui fanaute pe te te sela chuan a dik deuh tur. Nimahsela an kalsan daih mai si a, an va â tak em !! â tak an ni e. A hmusit duhtute tan phei chuan mi â let tawp an ni a, mi â ward-a dah mai chi an ni e.

Zirtirte kha Chanchin Tha hrila an zin chhuah lai khan chaw an fun lo va, iptê an ak lo va, pawisa an keng lo va, inthlakna silhfen an keng lo va. Saruakin an chhuak tawp mai a, an va han â tak em ! Nimahsela an lo hawn hnu khan Lal Isuan, “Tangka ip lo va, ipte lo va, pheikhawk lova ka tirh chhuah che u khan tlakchham in nei em?” tiin a lo zawt a. Anni chuan, “Engmah kan tlachham lo,” an ti a nih kha. Chuvangin miten mi â an tih thinte hian an tifuh tlat zel si a, Krista avanga â ngamte hi an lo fing ber nge nge si thin. Engmah keng lova zinte khan tlakchham an nei lo va, keini chu kan inkeng tam lutuk hi kan tlakchham phah thin a ni lawm ni?

He khawvelah hian thiamna leh finna a sang zel a; chumi rualin Krista avanga mi â nih ngam hi a harsa tial tial dawn niin a lang. Rualawhna leh mahni hmasialna an inkawmngeih tial tial a, kan nei tam tial tial a, kan duhamna a zual tial tial bawk. Taimak hi a tha a, Kristian nih nen a inrem a; nimahsela taimakna hi duhamna nen a inthian tawh chinah chuan sualna khur pui lam min pantirtu a ni. Chutiang mite chu khawvel thilah an fing râm a, Krista avanga tuar leh chân te hrehin khawvel thilah an â but thung a. An hlawkna tur a nih dawn phawt chuan an rawngbawlna pawh an zah zo lo va, an sakhaw vawn zirtirna ngei pawh thlah an duh hial thin a ni.

Krista avanga mi â te chuan Pathian thu a nih phawt chuan, ‘ta se, ta lo se’ tih chhut si se lovin, an thu hriat chu a takin an nunpui hmiah a, chu chu ‘Thlarau mi’ kan tih awmzia hi a ni ber a. Pathian thu hi hriat tam aiin zawm tam an tum ber a. An hriat apiangte chu mawl takin an zawm bur mai a, an hriat belh tam chuan an zawm tam a ni mai a, an zawm tam poh leh an hlawkna a tam bawk a. Pathian thu hi a hre tamte ai chuan a zawm tamte hian an tifuh zel zawk a ni. Pathian thu zirnaah pawh hian a kaw tawp thleng pawhin zir ila, kan hriat apiang zawm zel bâk chu zir chhuah tur hranpa hi a awm chuang hauh lo.

A dik tak chuan kan buaina tam ber hi mahni hamthatna ngaihtuaha kan hmanhlelh vang a ni ber thin a, chu chu Kohhranah ngei pawh hian a dik tlat. Mi thenkhatten an lawina Kohhran an sawi chhiat chiam chiam chuan, an beisei angin Kohhranah chanvo tha an chang lo a ni duh phian. Krista avanga mi â te chu mite tlin lohna laiah an tui hman lo va, Pathian thu hi an tuipui tawp mai a, chanvo tha leh chhiaah an buai ve lo va. Mite nunah an tlu ve lova, mi an tlukin an alh phah zâwk a. Mite fak derna lakah an tawlhthlu ve ngai lo va, miten an sawiselin an hnual ve hek lo. An â em em a, an fing bawk si a ni.

Kal la thawk rawh a la tawk lo, Hlohna hi van hlepna a ni;                       

Mihringin an fak lo che a, Lalpan a fak loh che ring suh.