Pathian Ram

Pathian Ram thawhlawm - OCT. 2012
Pathian Ram : Rs  18155/-
Ramthar         : Rs 13155/-
Tualchhung : Rs  13335/-
Building         : Rs  15515/-
Total        : Rs 60240/-

Inkhawm Programme

KOHHRAN  PROGRAMME :

Vawiin- 28.10.2012
Pathianni Chawhma: (9:45 - 10:15 a.m)
Sunday School
Zirlai 40-na : Ral lak sum insem thu
Tantu : Pi Lalhmunhluni

Pathianni Chawhnu: (1:00 - 1:30 p.m)
Hruaitu : Upa Lalhluna
Thusawitu : Pu Zokhawsanga

Pathianni Zan:  (5:45 - 6:15 p.m) 
Hruaitu : Upa Lalhluna
Thu sawitu : Upa Lalsangzuala
           Kristian Chhungkaw Programme

Hmeichhe Inkhawm

Kohhran Hmeichhia Programme : 

Dt. 30/10/2012: (5:45 - 6:15 p.m)
Hruaitu : Pi Lalhlimpuii
Tantu : Pi Buanthahniangi
Kristian Chhungkua leh Buhfaitham puala tawngtai rualna hun atan hman a ni ang.

Tun kar Damdawi In

He thu buatsaih lai hian  CHC ah mi 21 admit an ni a. mi 10 enkawl an ni. Kan Kohhran chhungkua atangin enkawl an awm lo. Naupiang 1  awmin damlo Aizawl a refer 1 a awm bawk.Pi Zonunthari, Kum 63, Pu Sawithanga nupui, Khawdungsei khua chu Inrinni khan Zawng Rulin a chuk avangin CHC panpui niin enkawl mek a ni.

Kan dam tlang em?

=> Pi Dartuahkhawli w/o Upa Lalngurliana(L) damlo chu thawhtanni khan Aizawl lamah refer niin, Investigation tih nghal a ni a, tunah hian Civil Hospital, Female Medical Ward ah enkawl mek a ni.

=> Upa Hrangkhupa Biate, Aizawl lama in checkup tura kal pawh tluang takin a rawn haw leh ta.

=> Dt. 27.10.2012 khan Kohhran Committee te chuan Pastor Quarter-ah thlatawp Committee an nei.

Editorial - Tawngkam khat chauh

Tawngkam khat chauh

Mihringte hi kan pianphungte, kan hmelte a in an loh ang bawk in, kan duh zawngte, ngaihdante kan thlirdante leh kan vei zawngte hi a inang lo thei hle a. Amaherawhchu, mahni chauh a hringnun hman a har fo thin.Chuvangin, kan khawsakhona kawngah te, rawngbawlhona kawngah te hian chutiang ze hrang hrang nei mihringte chuan enge kan mamawh? tih hi zawhna pawimawh tak a ni.

Rawngbawlna hrang hrang ah hian, kan tuipui lohna lam leh ngaihpawimawh lohna lam a nih vang maiin, a tuipuitute leh ngaipawimawhtu te hmalakna leh thiltihte awm hmunah kan sawisel mai thin em? Keimahnin thahnem ngai taka kan thawh peih loh, midangin thahnem ngai taka an thawhna kawngah, an thiltihte ngainepa tithuanawptu leh tihnualtu ah kan awm em?

Hetiang hringnun ze hrang hrang awmkhawm, rawngbawlna kawnga kan intihchak tawnna atana thil pawimawh tak mai chu. Kan rawngbawlpuiten thahnem ngai taka an thawhna kawngah, kan tawiawm theilo a nih pawhin, an thiltihah lawm thiam ila. Tawngkam khat chauh pawha support kan pek avang khan a let tam takin chakna thahrui kan pek belh thei a ni tih hi i hre nawn leh theuh ang u.

Lawrkhawm

PWF 14th Biennial Conference : October 26 - 28 chhung hian Presbyterian Church of India hnuaia Kohhran Hmeichhe inzawmkhawmna Pawl, Presbyterian Women Fellowship (PWF) Biennial Conference vawi 14-na, Khliehriat Presbyterian Church-ah neih  mek a ni a, thlarau lam thupuiah ‘Rah chhuah turin’ (To be fruitful) - John 15:16 tih an hmang. Mizoram atangin palai Central leh Bial Hmeichhia aiawh mi 73 vel an kal a ni.

Synod Revival Thingsat ah: Synod  Revival ‘Hnehna puangtu Team’ te chuan Speaker Pu C.Lalzahawma hmangin kan bial chhungah rawngbawlna an la hmang chho mek zel a, thawhtanni zan atanga tanin tunah hian Thingsat Kohhran-ah hun an hmang mek a ni. Bial chhunga Crusade Programme hman zawh hnu ah a mamawhte tan Camping la buatsaih an tum niin 

Transformer thleng ta : Sakawrdai Chhimveng Line Transformer chhiat avanga hun eng emaw chen Vengpui leh Chhimveng Current in enchhawk in kan awm hnuah Inrinni khan Transformer rawn thlengin, a pangngai angin Current kan nei thei dawn tawh tih thu kan dawng.

HRIATTIRNA

Synod Multipurpose Training Centre, Mission Vengthlang, Aizawl-ah a hnuaia Trade-ahte hian training hawn a ni leh dawn a. Dilna chu Programme Director hnenah Kohhran lehkha thil telin thehluh theih a ni. Zir hun chhung chu 15th Jan - 15th Dec, 2013 a ni ang.

1. Tailoring mipa - Seat 20

2. Tailoring hmeichhia - Seat 40

3. Shoe making, mipa - Seat 5

4. Dil theih hun chhung - November 2012

5. Interview - December 12, 2012 (10:00 a.m.)

Zir tura lakte chu thla tin stipend ‘ 500/- pek an ni ang.

KTP Inkhawm

KTP  Inkhawm  Programme :

Dt. 29/10/2012: (5:45 - 6:15 p.m)
Hruaitu : Tv. H. Lallungmuana
Tantu : Nl. Lalrinchhungi
Thusawitu : Pu HD Lalthanzuala
Oct. thla chhung thawhlawm khawntu tur te :
1. Nl. Lalnghatzovi 2. Nl. Lalhriatpuii

Branch KTP Committee Kohna

Branch KTP Committee Kohna
Vawiin Dt. 28.10.2012 Pathianni chawhma inkhawm ban hian Kohhran Sunday School Hall-ah Branch KTP Committee koh a ni a. Committee member te leh ex-officio te kim taka kal tura hriattir kan ni.

Rawngbawlna lam

Advance Krismas cum Open Air Concert 

Dt. 26.10.2012 khan Sakawrdai Pastor Bial KTP chuan Pastor Quarter ah Committee an nei a. Conference thurel bawhzuiin Advance Krismas Cum Open Air Concert neih dan tur chungchang an ngaihtuah a. Dec 20  zanah Sakawrdai Chhimveng ah neih a ni dawn. Items neitu tur te pawh ruat fel nghal a ni tawh a. Performance tha zawk mipui hma a show a nih theih nan Items nei turte Reharsal (enlawkna) nei turin Musician te nen hemi ni zing chaw eikhamah a hmunah kalkhawm tura tih a ni bawk.  

Kristian Chhungkaw pualin hun hmang dawn 

Kohhran Committee in a din angin, Kristian Chhungkua Committee chuan hma lain, vawiin Dt. 28.10.2012 (Pathianni) zanah Biak Inah Kristian Chhungkaw pual hun hman a ni dawn a, Upa Lalsangzuala hnen atangin Pathian thuchah ngaihthlak a ni ang. Kristian Chhungkaw committee chuan a tul angin Fehchhuah Programme pawh siam chhunzawm zel tur a ruahmanna siam a tum bawk a ni.. Kristian Chhungkua hi a pawimawh hle a, mi dang tih turah dah mai lovin, Kohhran chhungkua ten he hmalakna hi tha takin thlawpin, tan i la tlang ang u.

Naupang S.S Nau hualna
Vawiin Pathianni hian kan Kohhran Naupang Sunday School chuan Nau hualna hun a hmang dawn. Nau hualna hi Nausen, Sunday School la kal theilo te an lo len deuh huna Sunday School kal tura lo hual /hauhlawkna hun atana hman thin a ni.

Krismas lam i thlir ang
Krismas & Kumthar Ruai budget khawn mek zel a ni a, kan ngenna te ngaipawimawha budget pe tlak tawh chhungkaw engemaw zat an awm tawh a, an chungah Committee chuan lawmthu a sawi a. Chutih rualin, Chawpchilh taka thil buaipui a nih loh nan budget la pe tlak lo te pawhin thahnem ngai takin tan la leh i la leh zual ang u.

Presbyterian Pastor Nupuite Intawhkhawm

Nimin (Oct. 24) khan nilengin Synod Conference Centre-ah Mizoram Presbyterian Kohhrana Pastor nupuite chuan thlarau lam nun intuaitharna hun an hmang a. Thupui atan ‘Pastor chhungkua thlarau lam nun’ tih a ni a, Kulikawn Bial vawngtu Pastor Lalsangberan a sawi. Chawhma hun hi dar 10:00-ah tan in, Pi R. Lalnunmawii, Rev. Thangzauva, Synod Moderator nupuiin a kaihruai a, Chawhnu lam hun chu dar 1:00-ah tan in, Pi Lalrinpuii, Rev. Zosangliana Colney nupuiin a kaihruai.  Programme hman zawh hian tlai lamah chawhlui an kilho nghal a ni. Pastor nupuite hi kum tinin an pasalte rawngbawlna an tawiawm dan chungchangah hlawk zawka rawng an bawl theihna turin intuaitharin an inhmu khawm thin a, kohhranhoten nasa takin an chhawr thin a ni.

Synod Revival Beihpui chhunzawm zel

Synod Revival Committee ruahmanna angin October 26 & 27 khan Aizawl khawpui chhungah Revival Beihpui neih leh a ni a, thupuiah ‘Ram chu Lalpa ta a ni’ (Sam 22:28) tih an hmang. October 26 (Zirtawpni) zanah Aizawl khawpui chhung Pastor Bial tinah Bial huapin Beihpui Thawh khatna, Open Air Service neih a ni a, Synod Revival Speaker ten thu an sawi a, tawngtai rualna neih a ni bawk. October 27 (Inrinni) 11:00 a.m. - 2:30 p.m. thleng A.R. Ground-ah Beihpui Thawh hnihna neih leh a ni a, Rev. Zosangliana Colney, Executive Secretary-in kaihruaiin, tawngtairual hun hman a ni a, sermon tum hnih a awm bawk. Synod Revival Beihpui programme atan hian hmun (area) hrang hrang 34 ah hun hman a ni.

Synod hnuaia Committee & Board meeting

Mizoram Presbyterian Church Synod hnuaia Committee leh Board peng hrang hrangte Synod Inkhawmpui atana inbuatsaihin an thu mek a. October 22 (Thawhtanni) khan Pension Board Committee an thu a, October 23 (Thawhlehni) khan Presbyterian Communications (PRESCOM) Board Committee an thu leh a, October 24 (Nilaini) khan Sunday School Comittee an thu a, vawiin leh naktuk (Oct. 25 & 26) hian Synod Mission Board Committee an thu leh ang.

Department/Board Committee hrang hrang neih chhoh dan tur hetiang a ni:

October 29 - Theological Education Board

October 30 - Hospital Board

October 31 - Pastoral Committee

November 1 - Education Board

November 2 - SL & PB

November 6 - Social Front Committee

November 7 - Music Committee

November 13-15 - Synod Executive Committee

November 20-22 - Finance Committee

Sermon - Thatlai hun Lalpa tan

Thatlai  hun  Lalpa  tan

 Thuhriltu 11:9-10; I Tim 4:12

Mitin hian he khawvelah hian vawikhat chauh hun kan nei a, kan piang nawn leh ngai tawhlo ang. Hei hi ngaihtuah reng a tha; vawikhat chauh tleirawl, thalai i ni dawn a, nu leh pa i nih hunah chuan nula tlangval, tleirawl i ni leh ngai tawh lovang. I hun hman englai mah hi kohkir (rewind) leh theih a ni tawh lo. He khawvelah hian vawikhat chauh hun i nei a, I piang nawn tawh dawn lo a nih si chuan I nun kha tu tan nge hmang la tha ber ang?

Sap hovin ‘Youth’ an tih ai chuan mizo tawnga ‘Thalai’ kan tih hi a chiang zawk fe awm e. Mihring dam hun chung a kawng emkima a that lai hun a nih avangin hmel, thluak, chakna leh thildangah kan that lai leh kan chak vanglai a ni a, chumi hun chu tleirawl lai hian kan hmang tan a ni.

1. VAWIKHAT CHAUH (ONE CHANCE):

Mitin hian he khawvelah hian vawikhat chauh hun kan nei a, kan piang nawn leh ngai tawhlo ang. William Shakespeare-a chuan, he khawvel hi lemchan tual (stage) ang a ni a. Lemchan tual zawlah mahni chan hun theuh a lemchangtu te an lo lang thin ang hian, he khawvelah hian mihringte hi kan in lan chhawk a, mahni chan hun kan hman zawh chuan kan lang nawn leh ngai tawh lovang a ti a, a dik hle awm e. Keini pawh hian hei hi kan ngaihtuah reng a tha- vawikhat chauh tleirawl, thalai kan ni dawn a, nu leh pa kan nih hunah chuan nula tlangval, tleirawl kan ni leh ngai tawh lovang. Kan hun hman englai mahhi koh kir (rewind) leh theih a ni tawh lo. He khawvelah hian vawikhat zel chauh hun i nei a, I piang nawn tawh dawn lo a nih si chuan I nun kha tu tan nge hmang la tha ber ang tih ngaihtuah ngun ang che.

2. THATLAI HUN A REI DAWN LO:

Pathian thu chuan thatlai hun hi a rei dawn loh avangin Pathian hre reng turin min fuih a. Tin, kan nunna hi chhum reilo te lo lang a, ral leh ta mai thin ang hi a ni tih min hrilh bawk.A rei loh em avang hi a ni ang, thufing pakhat chuan hetiang hian a sawi a “Thalaite hian min ngaithla theuh dawn ta se la, tawngkam khat lek ka hrilh duh chu ‘nangmah a thil awm zawng zawng te kha a tha thei ang berin hmang rawh’ tih hi a ni” a ti a. Hla phuahtu pawhin, “Kan vanglai te hi a rei lo ang, he khawvel a kan cham chhung hian, chuvangin vanglai hunte hmang thain Lalpa tan I thawk zel ang u,” tiin a phuah a. A dik tak zet a ni, Thatlai hun hman dan tha ber chu Lalpa tan hman hi a ni e. Tu tan nge I nun I hman mek? Nangma tan chuah nge ? Khawvel tan nge? I chhandamtu Isua tan?.

3. TUN HI HUN THA BER A NI:

Kan Bible chuan , “Tun hi hun lawmawm leh chhandamna ni a ni”a ti a. Thalai te tan a dik leh zual ang. Thatlai hun hi pianthar nan hun tha ber a ni a. Lalpa rawngbawl nan pawh in buatsaihna hun tha ber a ni. Nakina ti a khek ho tan pianthar a har tial tial a ni. Pathian tan nun hlan tur a hun duhawm ber lai chu tleirawl lai hi a ni e. Kum upat lam a tih atan khek suh, khua I tlai palh ang e. Tin, Lalpa tana thawh kan duh pawhin thatlai hun hi kan thawh hlawk theih hun lai ber a ni bawk. Hemi kawngah hian Mizo Kristiante kan than harh a hun tak zet a ni. Kan puitling har lutuk fo, sual lamah erawh kan thar rang hle thung si. 

Pathian rawngbawltu ropui tak tak te hi Lalpa tan an lo inhmang hma khawp mai. Rev. Dr. Billy Graham-a chu kum 16 a nihin a piangthar a, kum 32 a tlin meuh chuan khawvel a rawngbawltu pawl ropui ber zing a mi Billy Graham Evangelistic Association a din fel der tawh. Mizoram missionaries lo kal hmasa te Pu Buanga  (JH Lorrain) chu mizoram a lo thlen khan kum 24 mi a ni a, Sap Upa (FW Savidge) kha kum 25 chauh a la ni. ‘Thuhriltu Lalpa’ ti a an koh hial, CH Spurgeon-a chu kum 23 a nihin Waterbeach Pastor a tan nemngheh a ni der tawh. Martin Luther-a chu kum 24 a nihin an ordain tawh. John Knock-a chu kum 22 anih in an ordain bawk. India rama missionary ropui tak William Carey chu kum 24 a nih chuan hun puma rawngbawl turin a in pe fel der tawh. David Livingstone chu kum 27 a nih chuan mi kawlh sa kawlh tawn turin Africa ramthimah a lut der tawh bawk. Ulrich Zwingli chu kum 24 nih chuan Pastor a tan ordain a ni tawh bawk. Harhna hmahruaitu ropui George Whitefield chu kum 22 mi a nihin ordain a ni bawk.

Engpawh nise, kum 22 – 24 bawr vel a Pastor a tana nem ngheh ni tur leh hmun ralti tak, entirnan Mizoram, lu la hnam zinga rawngbawl a chhuak nalh tur chuan eng emaw chen in buatsaih a ngai a, an tleirawl lai pawhin an lo inbuatsaih nasa hle tawh ang tih a chiang reng mai. Thatlai hun Lalpa tan a hmang tur leh dam chung a Isua Krista tan a thawh tam kan duh a nih chuan ‘Tun hun’ tleirawl lai hi in buatsaihna hun tha ber a ni. Sual lamah chuan nausen ang ni la, Pathian rawngbawlna kawngah chuan puitling hma turin in buatsaih ang che.