SCIENCE LEH PATHIAN THU
1 Kor. 2:5
Science leh Technology lama mihringte finna sang chho zel hian Pathian hmel a hliah thei a, a tiropui thei bawk a. Kan Bible chuan, “Mihring rilruah chuan chatuan a dah a, mahse chuti chung pawhin anni chuan Pathianin a tir ata a tawp thlenga a thiltih chu an hmuchhuak thei chuang lo,” tiin min hrilh a. Bible hian Scientist-te finna hi a lo lehkhalh daih tawh a, Bible-in a sawi ang zelin mi fingte hian thil an hmu chhuak zawk thin a, Bible kal pelin finna an nei lo a ni. Kum 1969-a Neil Armstronga leh a thian pahnihte thlaa an lawn dawn khan Pathian ropuizia an hmuchhuak nasa hle a, “Lalpa, i thil siam awmzia kan lo hriat phak loh lutuk avangin min ngaidam ang che,” tiin an tawngtai hial a ni. Russia-ho van sang lawn ve thung chuan, “Pathian awmna reng reng kan hmu lo,” an ti thung a. Charles Darwin-a chuan mihring tobul a chhui a chhuina lamah mihringte hi Zawng thlah kan nih theih dan a hmuchhuak a.
Khawvel finna hmangin Pathian thu hi hriat fuh theih a ni lo va, Pathian thu atang erawh chuan khawvel finna hi a thlir thiam theih thung a. Chu chu sawiin Paula chuan, “Pathian finnaah chuan khawvelin finna hmanga Pathian an hriat theih loh hnuin, thu hril âtthlak hmanga a ringtute chhandam chu Pathianin \ha a ti hle si a,” tiin min hrilh a. Scientist-te zingah pawh mihring finna ringawta thil chhut mi an awm a, Pathian finna hmanga thil zir chhuak an awm bawk a. Thlasik kawng khi a chhunga arsi maktaduai tam takte nen second khata km. 600 vela chakin chhun leh zan chawl lovin a thlawk fua fua a. Chutiang bawkin arsi bawm pui dang maktaduai têlte pawh chu an ban tur ban hman loh hlau ni âwm fahranin mahni kawng theuhvah an thlawk fua fua bawk a. Kan awmna lei pawh hian ni khi eng lai pawhin a hel ve reng a, kum khat chhungin vawi khat a hel chhuak a. Chutih laiin ni hel reng chungin amah hi a vir reng bawk a, darkar 24-ah vawi khat a vir chhuak a, chu chu ni khat kan tih hi a ni a.
Heng arsi chhiar sen rual lohte, anmahni kawng theuhvah insu buai hauh lova an thlawk fur fur reng mai hian Siamtu thiltihtheihzia a lantir nasa hle mai. Heng zawng zawngte pawh hi kan Bible bawkin a lo sawi zo vek tawh. Sam 19-na pum pui hi han chhiar chhuak ila a ngaihnawm em em a ni. “Vante khian Pathian ropuizia a hriattir a,” tiin a tan a. Thusawi reng reng leh tawng reng reng awm si lovin, chhun hian chhun hnena thu a sawi chhawn dan te, zanin zan hnena thu a sawi chhawn dan te a tar lang a. Mi chak tak anga a tlan thu leh, a tlan kualna chu kawlkil tawp atanga a tawp lehlam thleng a nih thute kan hmu a, chungho zawng zawng tlan kual velna ruahmantu Lalpa dan leh a remruatna chu a tak a, a fel vel vekzia kan hmu a. A tlangkawmnaah chuan, “Ka kâa thu chhuakte leh ka ngaihtuahnate hi i mithmuhah lawmtlak takin awm rawh se,” tiin Pathian kutah a inpumpek tawp mai a ni. Lal Davida chuan zan thla engah chung lam arsite khi a han thlir vang vang a. A puan inah a lut leh a, a tingtang a va kaih mar sauh sauh va, a lo chhuak leh a. Van lam thlir chungin, “I van i kut chhuak te, thla leh arsi i ruat hote khi ka ngaihtuah chang chuan, mihring hi eng nge maw a niha i hriat reng thin ni?” tiin hla thar, ruah tham loh a phuah chhuak ta zawih zawih mai a. A hla phuah tlang kawm nan chuan, “Aw Lalpa, kan Lalpa, lei chung zawng zawngah hian i hming chu a va tha em!!” tiin lai khuma zâl turin a puan inah a lut leh ta a ni. Pathian mite hian chung lam leh hnuai lam an thlir hian Pathian kut hnu ropuizia an hmu a, Pathian an fak thin a ni.
A tawp berah chuan kan sawi tum ber chu thil engkim hi Pathian hriatna tel lo chuan engmah lo mai a ni tih hi a ni. Mi thenkhatten Science subject kan han zir ve dek dek a, Bible aiin scientist-te theory eng emaw kan ring zawk mah a. Chutiang mite thiamna chu ‘thiamna kebai’ a ni lo thei lo vang. Scientist-te thil thlir dan chu a nghet lo va, a danglam leh mai thin a, Bible erawh chu kum sang tam tak kal liam hnuah pawh a ding nghet a, a la danglam ve lo va, a zirtirna hi a thar deuh deuh zawk a ni.
