(Rom 7:6)
Rawngbawlna ah hian, rawngbawltu atana thlan an awm a, rawngbawl tura kohna dawng an awm bawk a, kohna bik dawng lem lova tulna avang zawka rawngbawl tura inpe an awm bawk. Rawngbawl tura kan inpekna ki chu eng ang pawh lo ni sela, Krista tana pasaltha ni tura inpe te hian kan rawngbawlnaah hian Thlarau Thianghlim hruaiin rawng kan bawl thin em tih erawh kan inzawh nawn fo a tul thin.
Kristian nun hi Thlarau lamah chuan hlimawm leh nun thlakhlelhawm tak ni mahsela, khawvel thlirna lam atang chuan harsatna tam tak paltlang ngaihna nun a ni. Chuvangin rawngbawltute chuan kan nun hi Thlarau lamah kan tah hriam fo loh chuan Setanan thiam takin min bei a, a duhna lam lamah hnuk kawi kual vel tawh mai thin a ni. Chuvangin thlarau thara rawngbawl thei turin tan ila sauh sauh ang u.
Paula chuan, ‘Tunah erawh chuan min chelhtu lakah thi tawhin, Dan ata thlahin kan awm ta, lehkha ziak hlui ang mai ni lova, thlarau thara rawng kan bawl theih nan’ a ti a. Mihringte hi a hma chuan sual thuneihna hnuaia awm kan ni a, kan nuna Dan avanga duhzawng sual lo chhuakte chuan kan taksa pengah te, thihna khawpa rah turin a thawk thin a. Amaherawhchu Krista tlanna avangin min chelhtu lakah thi tawhin, Pathian lama kan rah theihna turin Dan ata thlahin kan awm ta a, lehkha ziak hlui ang mai ni lova, thlarau thara rawng kan bawl theih nan. Pawn lam lang thei chin chauh nilo, chhungril lama Krista nena inzawmna hi a pawimawh hle a ni. Chhungril nuna Krista’n lalna a chan chiahin miin thlarau tharin rawng a lo bawl thin a ni.
Rawngbawltute hi an in fit vang leh an thiamna leh theihna in a tlin avanga rawngbawl an ni lova, Lalpa’n a khawngaihna avang zawkin min chhandam a, min chhandam mai chu duhtawk lovin, chu chhandamna chanchin tha chu hril zel turin min ti zawk a ni. Paula chuan Thlarau thara rawngbawl a pawimawh zia hriain, ‘Krista hmangaihna chuan min tirlui a ni’ tiin a sawi a ni.
Kan rawngbawlna han thlir hian Thlarau thara rawngbawl tur chuan inpekna tak tak bakah thawhrimna leh taimakna hi a pawimawh tial tial dawn a ni. Rawngbawltu thawkrim leh rimlo chu rawng kan bawlsaka te hian an hre thuai mai thin a ni. Rawngbawltu tam tak mahni tuina, chakna, a nuam chin leh a langsar chin chiaha rawngbawlte avang hian kan rawngbawlna hian rah tha chhuah thei lovin a thuanawp phah fova, a pawi thin hle mai. Thawk tha peih silo, mahse thil hre si, tawng lama chak bawk si ai chuan thiamna lamah pawh sang lemlo, mi pangngai ve mai pawh ni se, inpekna tak tak nena rawngbawltu hi Lalpan a mamawh zawk a ni.
Kawng hrang hrangah hma kan sawn lai mek hian rawngbawlna kawng ah pawh hma kan sawn ve zel a ngai dawn a ni. Tunlai huna rawngbawlna kan mamawh ber pakhat chu harsatna tam tak nena hun hmang thin, mi lungngai mangang leh nun beidawngte nun luhchilh rawngbawlna hi a ni. Rawng kan bawl saka te hmangaihna leh an harsatna hriatthiampui thin tur khawpa rawngbawl hi Thlarau thara rawngbawl nen a inkawp tlat a ni. Tih tak takna nena rawngbawltu chuan midangte nun a vei tlat a, chhandamin an awm lovang tih a hlau a, an mamawhna zawna puih theih dan tur awm ang ang ngaihtuahin theihtawp a chhuah thin a ni. Keini pawh inenfiah theuh ila, rawng kan bawlna kawng hrang hrangah te hian rah chhuak thei tur khawp hian kan rawngbawlnaah hian kan inpe tawk em? tih in zawt ila, inpekna tak tak nen thlarau thara rawng bawl turin tan ila zel ang u.
