Editorial - Krismas thawhlawm

KRISMAS THAWHLAWM

Kan nghahfak, Krismas chu kan hma lawk ah khian a lo awm leh ta reng mai a, he hunpui lo thleng turah hian chhungkaw tinte, kan phak ang tawkin kan inpuahchah thin a, he hunpui lo thleng hi Mizoten Krismas kan hman tan atangin Ruai nena lawm ngei kan tum thin a, kan hriat angin he hunpuia ruai buatsaih na tur hian thawhlawm, Chhungkaw tin te’n kan thawhkhawm thin. Krismas leh Kumthar thawhlawm hi Ruai Committee chuan kum bul atanga intukin, khawn a ni bawk a, he thawhlawm hi tun thlengin a la tlingkhawm tam lo hle. Krismas leh Kumthar Committee te’n ran an zawnna leh ruahmanna an siam tih puitlina turin, chhungkaw tinte’n thawhlawm min tuk ang kan ngaihpawimawh a, kan tlak vat vat a tul ta hle a ni. Committee hian tun kum ruai hi phai lama ran zawng lovin, Aizawl lamah, ran tha zawk leh tuhnai zawk dap an tum a, kan thawhlawm tlingkhawm te a la beitham avangin an duh angin hma an la la theilo niin a lang. Tin, he hun hi kan hriat theuh angin, hun hautak, kan tu leh fate tana thawmhnaw thar neih sak ngei kan tum hunlai a ni a, tepter taka kan thawhlawmte tlak aiin, he hunpui hautakna pehhel zawngin a hma thei angin tlak tum theuh ila a duhawm hle. ang.

Kan Damtlang em?

=> Tv. Lalthlamuana, Pu Laldinliana fapa chu a Kala lungte awm avangin zirtawpni khan Civil Hospital-ah zai a ni a, a that chhoh zel kan beisei.

=> Vanlalchhuangi, Pi Lalroluti fanu Nau nei zo chu a ke che thei lova, In lamah theih ang anga enkawl mek a ni.

=> Dt. 24.11.2012 khan Kohhran Sunday School Hall-ah Kohhran thlatawp Committee neih a ni.
=> Dt. 24.11.2012 Inrinni zan khan Ramthar pual inkhawm neih a ni a, Pi Lalneihthangi hnen atangin Pathian thuchah ngaihthlak a ni.

=> November 28 & 29-a SEC Budget Session a thu turin Upa Hrangkhupa Biate a kal ang.

Hmeichhe inkhawm

Kohhran Hmeichhia Programme :

Dt. 27/11/2012: (5:30 - 6:00 p.m)
Hruaitu : Pi Mangthankungi
Tantu : Pi Lalhmunhluni
Kristian chhungkua leh Buhfaitham pual tawngtairual

Tun kar Damdawi In

Tunkar chhungin  CHC ah mi  3 admit thar an ni a. Tun dinhmunah mi 3 enkawl an ni. Kan Kohhran chhungkua damlo enkawl mek an awm lo. Naupiang   an awm lo bawk. CHC a dah tur Tui thianghlim dah vawhna (Water Cooler) thar, RKS pawisa a lei chu tunah hian a lo thleng tawh a,  hman theih thuai beisei a ni. AYUSH Doctor thar  Dr. Shalom-i chuan a hna a zawm fel a, a post ah a rawn chhoh thuai beisei a ni. Tin, CHC tan Gypsy thar pek kan ni ta bawk.

Inkhawm

KOHHRAN  PROGRAMME :

Vawiin- 25.11.2012
Pathianni Chawhma: (9:45 - 10:15 a.m)
Sunday School
Zirlai 43-na : Ramri leh ram semtu turte
Tantu : Pi Buanthahniangi

Pathianni Chawhnu: (1:00 - 1:30 p.m)
Hruaitu : T.Upa Zothangkhuma
Thusawitu : Pu Lalsangzuala

Pathianni Zan:  (5:30 - 6:00 p.m) 
Hruaitu : T.Upa Zothangkhuma
Thu sawitu : Upa Lalringliana

Naupang S.S Programme
Pathianni Chawhma: 
Tantu : Uniky Lalsangzovi
Thawhlawm khawntu turte:
 1. Lalbiakveli 2. Lalthazuali
Thawhlawm hlantu - Pu HP Lalhnunliana

KTP Inkhawm

KTP  Inkhawm  Programme : 

Dt. 26/11/2012: (5:30 - 6:00 p.m)
Hruaitu : Tv. H.Lallungmuana
Tantu : Nl. Lalhmunsiami
Thusawitu : Pu Lalrinngheta
Dec. thla chhung thawhlawm khawntu tur te :
1. Lalhmunsiami 2. Nl. Gospel Ramkinlovi

Lawrkhawm

Bethesda Camping: Kan Kohhran-in Gospel Camping nei tura ruahmanna a siam chu Team lam remchan loh avangin kan nei leh thei dawn ta lova, amaherawhchu kan unau EFCI Kohhran Sakawrdai chuan Dec. 3. atangin Bethesda Camping a buatsaih dawn a, he huna tel tur hian Kohhranhote min sawm angin, mimal tinte inhlantharna atan Camping ah hian lut ve turin i inbuatsaih ang u. 

Mizo Bible Endik mek: Bible Society of India (BSI) Vice President Rev. C. Rosiama chu Mizo Bible (OV) endikin Shillong-ah a cham mek. Bible endik hna hi Nov. 19 atang khan tan a ni a, November 27-ah BSI Translation Centre-a thawktu tur interview an nei nghal ang. Rev. C. Rosiama hi BSI Aizawl Auxiliary President a ni reng thin a, tunah hian Rev. Vanlalbelan a thlak ta a, India ram pum BSI hotu Third Vice President a nih bakah Translation Committee Chairman a ni bawk.

Synod Mission Board : Rev. Lalchhuanmawia, Synod Mission Board Secretary chu Nov. 22 khan Interserve Core Meeting, Delhi-ah a tel a, November 24 & 25 chhung hian Mission Consultation-cum-Convention, Shillong Mizo Church-a neih mek ah Resource Person a ni a, Speaker atan Rev. Lalthankhuma, MTC Lecturer hman a ni.

RSBY Scheme Job Card neite tan: Dt. 23 11.2012 khan Health Care Scheme dan thar hman dan tur ah Training, Darlawn BRC Hall ah neih a ni a, Sakawrdai Main Centre bial atangin HW leh VC thahnem tak an tel a ni. Nakum atanga hman tan tum, RSBY Scheme ah hian Job Card nei te  Damdawi In awmna senso Rs 30000/- aia tam lo chu Sorkarin a tum sak ang a, hemi aia tam senso BPL  leh APL chhungkuate  tana claim theihna dan tur te pawh duan a ni. Rs 30000 aia tam senso claim turin BPL in pawisa pek belh hran a ngai lova, APL tan erawh a ngai thung ang. R 30 in Registration tih theih a ni a, Thalak leh finger Print thla te lak a la ngai ang. Hre chiang duh chuan mahni bialtu HW te zawh fiah theih a ni.

Nurse Capping & Lamp Lighting vawi 39-na:
Presbyterian Hospital chuan Hospital Campus-a Nursing School Auditorium-ah November 19 (Thawhtanni) khan Nurse zir turte Capping & Lamp Lighting vawi 39-na an hmang a. Inkhawm hi Dr. Remthanga, Director-in a kaihruai a, Rev. Thangzauva, Synod Moderator chu Khuallian a ni. Rev. Z.D. Lalhmachhuanan hunserh a hmang a, Nursing School Principal Pi C. Lalrintluangin Reports a pe a. Pi Ramfangzauvi, Nursing Superintendent-in Nurse zir chhuakte lukhum a khumtir zawhin Lamp Lighting a buatsaih nghal bawk. He inkhawmah hian Khuallian Rev. Thangzauva chuan Magazine a tlangzarh a, Nurse zirlai tithate hnenah chawimawina a hlan hnuah thuchah a sawi zui nghal. Nurse zir chhungte atangin a duh apiang thusawi hun hman a nih hnuah Dr. Vanlalruata, Medical Superintendent-in lawmthu a sawi a, Chaplain Rev. C. Lalbiakhluna’n Malsawmna sawiin hun a khar a ni. He Programme-ah hian Master of Ceremony chu Ms. Rongurliani leh Dr. Lalbiaksanga Hnamte te an ni. Synod Hospital hi kum 1928-a din kha a ni a, din a nih rual hian Nursing School hi din ve nghal a ni. Kum 1993 atang khan Principal neih tan a ni a, Principal hmasa ber chu Pi Ramfangzauvi a ni a. December 2002 khan Nursing Superintendent-ah a kaisan avangin Pi C. Lalrintluangi chu Principal a ni ta a, tun thleng hian he hna hi a la chelh a ni.
Presbyterian Nursing School-a zir chhuak tawh zawng zawng hi an vaiin mi 913 an ni tawh a. Kum 2012 hma lamah chuan GNM course kum 3 leh a chanve zir chhuakte chu intuai hriam nan thla ruk chhung practical-a thawh zuitir an ni thin a. Mahse Indian Nursing Council thuchhuah thar a lo awm tak avangin GNM course zir chhuakte hi kum 2012 atang hi chuan an zir zawh rualin chhuahtir nghal zel a ni dawn ta a ni.
Tunah hian Principal pakhat, Vice Principal pakhat, Sister Tutor sawm an awm mek a, Sister Tutor zinga pathumte hi tunah hian zirna sang zawk chhunzawmin an awm bo mek a ni. Tunah hian Internship Year hmang mek 31, GNM kum 3-na zir mek 29, GNM kum 2-na zir mek 28, GNM kum khatna zir mek 32, an vaiin zirlai 120 an awm mek a ni. Kum 2012 course-a zir mekte result neih tawh chinah GNM kum khatna zir 30-ah 22 an passed a, Mizoram pum puia top 10-ah pahnih an lang phak a, chungte chu 3-na leh 10-na te an ni. GNM kum 2-na zir 30-ah 29 an passed a, Mizoram Top 10-ah pakhat a lang a, chu chu 8-na a ni. GNM kum 3-na zir 31-ah 30 an passed a, an zinga 4 chu Top 10-ah an lang a, chungte chu 4-na, 6-na, 7-na leh 10-na te an ni.

Rawngbawlna lam

Kristian Chhungkua Fehchhuah Programme

Kan Kohhran a Kristian Chhungkua Committee hmalakna in, Dt. 22.11.2012 (Ningani) zan khan Pu T.Lalhmangaiha Inah Kristian Chhungkua Fehchhuah Programme hman a ni. Inkhawm hi Upa Raltawnphunga’n a kaihruai a, Pro Pastor Ngurthanmawia Sailo hnen atangin Pathian thuchah ngaihthlak a ni bawk. Fehchhuah Programme ah hian Puitling 20 leh naupang 4 an tel thei a ni. Karthar Dt. 29.11.2012 Ningani zan ah Pu Thasiama Inah neihleh a ni ang.

Kohhran Hmeichhe Ni
Nov. 30 (zirtawpni) khi Kohhran Hmeichhe Ni a ni a. Ram pumah Presbyterian Kohhran Hmeichhia te chuan he hun hi an hmang dawn a. Kan Kohhran-ah pawh he hun hi awmni khama hmang turin Kohhran Hmeichhiate chu an inbuatsaih mek a, Group hrang hrangte Lengkhawm zai a intihsiakna nei turin programme ruahman a ni. He Group intihsiakna atan hian Group tin ten tan la in, an inbuatsaih mek bawk.

Kristian Thalai Pawl
Central KTP Committee chuan Branch tina Evangelical Cell/Sub-Committee te’n tangkai leh hlawk zawka hma an lak theih nan tiin. Hemi kawnga hmalakna atan November 28 (Nilaini) hian Mission Veng Kohhran Hall-ah Consultation buatsaih a ni dawn a. Hetah hian Branch tin aiawh mi pakhat theuh tel tura hriattir an ni a, hriattirna la hmu lo chuan hei hi hriattirna anga ngaih mai tur a ni e.

Buddhist puithiam-in a taksa pumpui a donate

Marpara South-a Buddhist puithiam pakhat D.J. Bhikkhu, ‘Bhante’ an tih bawk chuan Synod Hospital tan a taksa pumpui a donate. D.J. Bhikkhu (Bhante) hi Marpara leh a chhehvelah chuan Buddhist sakhaw zuituten an ngaisangin an zah em em a, a tan hian engmah ui an nei lova, bial fanga a rawn kal tawh chuan an thil neih tha leh hlu tak tak te an hlan thin a ni. Kum 2004 leh 2008 khan Synod Hospital-ah Malaria avangin enkawl a lo ni tawh a, damdawi ina a awm laia thawktute enkawlnaah a lawm em em a, khual tha ang maia enkawl niin a inngai a, chuvang chuan a thih hunah a taksa chu Synod Hospital-in a tul ang anga an hman atan a hlan a ni.

Synod Multipurpose Training Centre Inthlahna

Synod Multipurpose Training Centre chuan Nov. 16 khan SMTC Lecture Hall, Mission Vengthlangah Vocational Trainee-ho thlahna hun an hmang a, zanriah kilho nghal a ni. SMTC hi kum 1993 Synod Inkhawmpui Rorel No. 48-na in a din a ni a, January 12, 1996-ah Pathian hnenah hlanin hawn a ni. A tira a hming chu Christian Multipurpose Centre (CMTC) tih a ni a, kum 2001 Synod chuan Synod Multipurpose Training Centre (SMTC) tiin a hming a thlak a ni. He Centre-a zir chhuak tawh mi 965 an awm a, tuna zir chhuak tharte hi mi 60 niin Puanthui leh Pheikhawk siam zirte an ni a, computer zirlai mi 30 an nei mek bawk. Tuna thlah tak te hi Puanthui zir (Hmeichhia) 36, Puanthui zir (Mipa) 20 leh Pheikhawk siam zir (mipa) 4 an ni. Zirlaite hi Synod chuan thla tinin stipend Rs.500 a pe a, Hostel-a awmte chu an thlatin Mess Fee chanve Rs.500/- a tum sak bawk a. Computer zirlaite erawh chuan Admission fee Rs.100/- leh thlatin fee Rs.50/- an chawi ve thung a, an zir chhuahin Incentive Prize Rs.1200/- theuh pek an ni thung.

Synod Finance Committee neih zawh a ni ta

Mizoram Presbyterian Kohhran Synod Finance Committee vawi 102-na chu ni thum awh tura ruahman a nih laiin ni hnihah zawh fel a ni a, Nov. 21 khan zawh fel a ni ta. Synod Finance Committee hian Tangka Kum kal mek chhunga Additional Budget dilna a ngaihtuah a, Pastoral-ah Additional Budget Rs.4,55,04,300/- a pawm a, Mission lamah Additional Budget Rs.3,65,33,000/- a pawm bawk. Kum 2013-2014 Synod Budget thar tur pawh thlir hovin Synod Finance Committee hian Kum 2013-2014 Synod Budget thar atan Pastoral-ah Rs.97,07,71,200/-, Mission-ah Rs.49,64,17,500/-, a vaiin Rs.1,46,71,88,700/- rawtna siamin Synod Executive Committee pawmpui turin a thlen dawn a ni. Synod Budget pum pui hi kum kaltaah khan Rs.1,25,15,86,000/- a ni a, kum 2013-2014 Budget thar hi kum kalta Budget aiin Rs. 215,602,700/- in a tam zawk a ni. Tun tum Synod Finance Committee meeting hian Synod Reserve Fund-ah Rs.5,00,00,000/- (Vaibelchhe nga) leh Mission Reserve Fund-ah Rs.2,00,00,000/- (Vaibelchhe hnih) dah belh turin a rawt bawk. Hengte leh rawtna dang an thlente hi November 28 & 29-a Synod Executive Committee thut khawm leh hunah ngaihtuah a ni ang.

Sermon - I CHUANNA LAWNG KHA A LA PIL DAWN

I CHUANNA LAWNG KHA A LA PIL DAWN

Tirh. 27:10,11

British lawng lian ‘Titanic’ an tih kha mihring thil siam zinga ropui ber pawla an sawi a ni a, A chhung chu block li-ah an then phawk a, pindan pakhatah tui lut thei mah se, pindan danga lut tlang thei lo tura duan a ni a, chhawng 11 a ni. A chhungah chuan mi 2000 chuang an chuang a, chung mite chu mi hausa sumdawng te, nuam chen tur te, innei thar honey moon hmang tur te, sipai te an chuang a, mi thenkhat chuan, ‘Nawm chenna lawng’ tiin an vuah hial a; Pathian ringtu mi tlem te an chuang ve bawk. Southampton an chhuahsan dawn chuan Pi Albert Carwell-i chuan, “In lawng hi a pil thei lo tak tak ang maw?” tiin a zawt a. Anni chuan, “Ka pi, i Pathian meuh pawhin a tipil thei lo vang,” tiin an chhang a. New Founland vaukam vel an hrut kual lai chuan California lawng chawlhna hmun atangin “I lawng khalh kha khalh zawi deuh rawh, i hmaah khan vur tlang sut tur a tam hle a ni,” tih thuthawn (message) an dawng a. Nimahsela lawng khalhtu Hichen Robert-a chuan an lawng chu a ring tâwk lutuk a, a khalh zawi duh chuang hauh lo va. Thuthawn chu vawi thum lai an dawng a; nimahsela an ngaihthah luih tlat avangin a thawntute chuan an wireless bawm an khar a, an mutsan ta hmak mai a.

New York atanga Atlantic tuipuiah mel 1600 vel an kal hnu chuan Lawng chuan a khamphei zâwngin vur tlang a su phei ta mai le!! Lawng chu a te tuar mai a, a laiah a tliak a, a mawng lam chu a bungbu ta vuah mai a. W.T. Operator Philip-a chuan hmanhmawh takin a hmaa message rawn thawntu California lawng chawlhna kha, “Min tanpui turin hmanhmawh rawh u,” tiin a va thawn a. Nimahsela anni chuan an W.T chu an off daih tawh a, an muhil tawh si a. An rin em em Titanic Lawng chuan mi tam tak hlau leh khur chungin Tuipuiah chuan a pilpui ta ruah ruah mai a ni. Chutihlaiin, Lawnga chuangte zingah chuan Pathian ring tlat mi, a tul phawt chuan thih pawh huama Krista tana râl dopuitu an awm a. Chung mite chu an dang zak mai. Rimawi an tum a, “I lamah min hip rawh aw ka Pathian, Kraws hrehawm pu pawhin ka lo hnai ang,” tih hla hi muang fân ruihin an sa a. An hmelah zâm hmel a awm ve lo.

Keini ngei pawh hi i inngaihtuah ve ang u. Englai pawhin kan chuanna lawng khawvel hi chhe thut thei a ni a, Kan chuanna chhungkaw lawng hi chhe rup thei a ni bawk. Kan chuanna lawng, kan taksa hi second khat lekah pawh natna hri te tak te avangin khawvel chhuahsan mai thei dinhmunah a ding reng bawk. Chuti chung chuan mi thenkhatte chuan kan chuanna lawng hi chapopuiin kan la hlim phian lehnghal a. A dik tak chuan kan chuanna lawng ngheh lohzia hre chiang apiangte chu an chapo hman lo va, ruk an ru hman lo va, zu an rui hman lo a ni. Keimahni theuh hi lawng khalhtu chu kan ni a, Pathian thu hi fimkhur tur thu min thawntu (message) chu a ni. Mihring tana thil rapthlak ber chu thih mai inring lo kan thi thut thut hi a ni. Nimahsela Pathian thu atang chuan thih thut (accident) a awm ve lo va, engkim hrilh lawk vek kan ni si a. Titanic lawng khalhtu khan California lawng chawlhna atanga thuthawn a hmuh kha a hun laiin zawm sela chuan an him ngei ang, a hun tawh loh hnuah an ngaihven a, an muhil tawh si a. Chutiang bawk chuan keini pawh hian a hun lai takin Pathian thu hi kan ngaihven a pawimawh a, kan thaw chauh an en tawh hnuah chuan a tlai lutuk tawh thin a ni. Hetih lai mek pawha rualawhna leh duhamna avanga Pathian pawh pâwl hman lo khawpa buaina kan la nei tam tial tial a nih chuan Titanic lawng khalhtu kha kan thiam lo thei bik lo vang.

Titanic lawnga pil turte khan tlai khaw hnuah Pathian hming lamin an buai leh si a. Thuhriltu Harpera-te khan Pathian thu an hrilh kim hman tawh reng reng lo. Khatiang bawk khan mi thenkhatte chuan tunah hian Pathian hming kan lam ngai lo va, amah be turin Biak In kan pan hek lo va, Bible kan chhiar ngai bawk hek lo. Nimahsela ngai teh, chutiang mite chuan kan ngam loh pa kan la su ngei dawn si. Doctor-ten, “I cancer-na a rei tawh a, i thin a khawih tawh a nih hi,” an tih chinah chuan a hming kan lam ngai loh Lal Isua hming hi a ni kan lam thin ni. Thi ngei tur nia kan inhriat a, kan khum bulah chhungkhat lainate an thut laih tawh chinah “Eng nge i duh ber?” min tih se, sorkar hna kan thlang tawh reng reng lovang. Chuvangin a tlai hma hian Pathian chu hnaih la, a thupek chu zawm mai rawh, I chuanna lawng kha ala pil ngei dawn si a.