Editorial - Krismas thawhlawm

KRISMAS THAWHLAWM

Hun leh ni te a liam a,Kristian ten kan hunpui  leh kan nghahhlelh, Krismas pawh Thla tamin min dang leh ta lo.Thlarau lam leh Tisa lamah pawh Kohhran Chhungtin  te kan inbuatsaih a,Krismas lo thleng tur hi kan theih anga ropuiin, tu leh fate, Thawmhnaw thar nen ngeia hman tir tumin chhungtinte kan inbuat saih leh ngei ang. December Thla hi chhungtin te Sum hman tam Thla a ni tila kan sawi sual lovang. Tun kum hian Krismas leh Kumthar Ruai Committee chuan tih dan a thlak a,Thawhlawm lo pek lawk theih turin Bial tinah a khawntu tur a ruat a, kan tih dan thin a ni lova, amaherawh chu, Committee hian chhungtinten, he hun a sum lama kan indaihlohna leh kan phurrit te hria a,kan zangkhai theih na tura ruahmanna a siam a ni tih hria ila. Kan thil duh leh kan awh te,tum khata pawisa pe tla lova, tlem tlem pek theih (Installment System) a nih hian pawisa neih sa in a tlin loh te kan nei thei ve thinin kan zangkhai phah bawk a ,Harsa zawkte te tan a tha hle. Committee in tlem tlem a Thawhlawm pek theih tura ruahmanna a siam hi a tha in, Pawisa kan mamawh tam hun a, Thawhlawm kan lo tlak fel chuan Kan phur rit tur chi khat ah kan fihlim tihna a ni ang.

Kan damtlang em?

Ö*Þ Ni 24-30 Sept, 2012 chhung hian Beihrual ‘Kristian Chhungkaw Hapta’ chu Biak Inah hman chhunzawm leh a ni ang.

Ö*Þ Branch Asst. Leader Pu Lalrinngheta te chuan fapa thar duhawm tak, Ningani khan Synod Hospital Durtlang ah an nei a, KTP AW chuan a lawmpui tak zet a ni.

Ö*Þ Dt. 22.9.2012 (Inrinni) khan kan Kohhran Biak In-ah Bial Zaipawl ten Presbytery inbuatsaih nan Pathian fakna hla an zir.

Tunkar Damdawi In

Tunkar chhungin CHC ah mi 10 admit an ni a. kan Kohhran chhungkua atangin admit an awm lova, tun dinhmunah  mi 3 enkawl mek an ni a, naupiang 3 a awm. Dt. 19.9.2012 khan Dr. Shahnaz Zothanzami Medical Officer leh Dr Shamim P Zohmingthanga  Dental Surgeon te chu Aizawl ah Review Meeting hmangin an chhuk a, an rawn haw chhoh hun tur a la chiang rih lo.

Pathian Ram thawhlawm - Sept. 2012

Pathian Ram thawhlawm - Sept. 2012

Pathian Ram : Rs  27495/-
Ramthar         : Rs  22460/-
Tualchhung : Rs  13965/-
Building         : Rs  19190/-
Total      : Rs 83110/-

Beihrual- Kristian Chhungkaw hapta

Beihrual Programme 

Dt. 24.9.2012  (Thawhtanni) Zan
Hruaitu : T.Upa Zothangkhuma
Thupui : Kristian chhungkua
leh Kohhran
Hawngtu : Pu Ronald Lalramsanga

Dt. 25.9.2012  (Thawhlehni) Zan
Hruaitu : T.Upa Zothankhuma
Thupui : Kristian Chhungkua leh rawngbawlna I-na
Hawngtu : Pu Lalbiaktluanga

Dt. 26.9.2012  (Nilaini) Zan
Hruaitu : T.Upa Zothankhuma
Thupui : Kristian Chhungkua leh rawngbawlna II-na
Hawngtu : Pu Lalrinngheta

Dt. 27.9.2012  (Ningani) Zan
Hruaitu : Upa Lalramhluna
Thupui : Kristian Chhungkua leh thilpek
Hawngtu : Pu HP Lalhnunliana

Dt. 28.9.2012  (Zirtawpni) Zan
Hruaitu : Upa Lalramhluna
Thupui : Nitin Chhung Inkhawm
Hawngtu : Pi Ethel Lalliansangi

Dt. 29.9.2012  (Inrinni) Zan
Hruaitu : Upa Lalramhluna
Thupui : Kohhran Inkhawm
Hawngtu : Pi Lalneihkimi

Programme

KOHHRAN PROGRAMME :

Vawiin- 23.9.2012
Pathianni Chawhma: (9:45 - 10:15 a.m)
Sunday School
Zirlai 35-na: Ram in rochun dan leh hruaitu a Josua ruat thu
Tantu : Pi Chhingpuii

Pathianni Chawhnu: (1:00 - 1:30 p.m)
Hruaitu : Upa Lalhluna
Thupui : Van khua leh tui kan nih dan
Sawitu : Upa Raltawnphunga

Pathianni Zan:  (6:00 - 6:30 p.m)
Hruaitu : Upa Lalhluna
Thupui : Van khua leh tuite mawhphurhna.
Sawitu : Upa Lalringliana
................................................................................

Lawrkhawm

Tawngtai Bu lam theih: Tawngtai Bu chhut thar leh a ni a, kar leh atangin Synod Office-a Mamawh lamna-ah Kohhran/Bial copy tur a lak theih leh ta e.

KTP Inhruaina Dan: KTP Inhruaina Dan 2009 Edition chu chhut nawn leh a ni a, KTP Office-ah a duh tan ‘10/- in lei theih reng a ni.

      Chhawmdawlna pual thilpek: KTP General Conference, 2012 a thurel pakhat ‘Chhawmdawlna pualin Inkhawm thawhlawm vawi hnih lakkhawm ni rawh se,’ tih chu August 2012 thleng Bial 125 atangin ‘4,73,603/- CKTP in a dawng tawh a, Bial 44 atangin hemi pual hi la dawn loh a ni. Central KTP Committee hnuhnung ber chuan Chhawmdawlna pual hman dan tur ruahmantu tur ruatin hma an la tan mek bawk.

KTP YRC pual: Youth Recreation Centre (YRC) puala member pakhatin ‘5/- hisapa thawh tur tih pawh August 2012 thleng khan Bial 67 atangin ‘2,78,298/- CKTP-ah a lut tawh a, hei hi October 2012 chhunga pek kim tur a ni. KTP in Youth Recreation Centre puala sum a lo khawl tawh zawng zawng chu ‘1,953,915/- a ni.

Job Card inhlawhna: Dt. 18.9.2012 khan MGNREGS, Sakawrdai Zone huamchhunga khaw 14 hnenah Job Card ni 14 inhlawhna pek chhuah a ni a. Social Audit neih huna senso tur leh kalkhawm te hnena sem leh turin ni 1 inhlawhna lakthlak sak an ni bawk.

SDO(C) & VC Meeting: Dt. 19.9.2012 khan Pu R. Lalnghakliana, SDO (C) leh Sakawrdai Zone huamchhunga Village Council/ Court 14 te chuan SDO(C) Office, Sakawrdai ah Meeting an nei. Meeting neih zawh hian SDO(C) chuan V.C te hnenah, MGNREGS Work Agency, Contingency Fund Rs. 3000/- theuh a hlan bawk a ni.

Rawngbawlna lam

SKD Pastor Bial Inter-Senior inkhawmpui..

Dt. 15-16 Sept chhung khan Sakawrdai Chhimveng Kohhran Biak Inah Sakawrdai Pastor Bial, Inter - Senior Inkhawmpui chu tluang taka hman a ni. Inkhawmpui ah hian Bial chhung Kohhran 7 atangin thu leh hla hmanga intihsiakna neih a ni a. Intihsiakna a pumpuia tithate: 1st  - Sakawrdai Chhimveng, 2nd - Vaitin, 3rd - Khawdungsei te an ni. Lawmman hi Bial Chairman Rev. Dr. Hmingthansanga, Bialtu Pastor in a sem a ni. Kum 2013 Sakawrdai Pastor Bial, Inter-Senior Inkhawmpui chu Khawpuar Kohhran ah nghah a ni bawk.

Beihrual Fehchhuah Hapta hman zawh a ni ta..

Kum 2012 Beihrual Fehchhuah Hapta chu tluang taka hman zawh a ni ta, Thawhtanni zan khan KTP Fehchhuah - Pu Zokhawsanga Inah hman a ni a, mi 23 an inkhawm. Kohhran Hmeichhia Fehchhuah - Pu Lalhmingsanga Inah neih a ni a, mi 15 an tel thei bawk a ni. Fehchhuah ah hian Pathian thuchah ngaihthlak niin, tawngtairualna hun hman a ni bawk. Ningani zan khan kan Kohhran Fehchhuah chu  Chhimveng Kohhran nen a huhovin, Pu Laldinliana VCP Inah, VC Memberte nena inkawmhona neih a ni a, Zirtawpni zan khan kan Kohhran Sunday School Hall-ah NGO hrang hrang hruaitute nena inkawmhona neih a ni bawk.

Bial Zaipawl te Khawpuar Kohhran ah

Khawpuar Branch KTP in Bial KTP kaltlanga Bial Zaipawlte an sawmna chu Bial Committee in a rel angin Dt. 28-29 Sept, 2012 chhung khian Khawpuar Kohhran Biak Inah Sakawrdai Pastor Bial Zaipawl ten Pathian fakna hla hmanga zaia rawngbawlna an nei dawn a ni. He rawngbawlna hi thu leh hla lama hmasawnna leh chak tharna chan beiseina avanga buatsaih a ni.

Synod Rescue Home Day (Silver Jubilee)

Sept. 21 zirtawpni dar 2:00 pm khan Synod Rescue Home chuan kum 25 (Silver Jubilee) an tlin lawmna leh Pathian hnena lawmthu sawina, Rescue Home Chapel, Durtlangah an hmang a, Rev. Lalzuithanga, Executive Secretary i/c Social Front in programme a kaihruai a, Synod Moderator Rev. Thangzauvan Rescue Home Day Address a pe in, Rescue Home Day lawmna ruai theh a ni bawk, hemi zan vek hian Praise and Worship programme hlimawm tak hman chhunzawm a ni bawk.

CKTP One Day Mission Seminar neih a ni...

September 22 (Inrinni) khan Interserve India leh Central KTP tangkawpin One Day Mission Seminar, Pi Zaii Hall, Synod Conference Centre, Mission Vengah a buatsaih a, thupuiah Stand Apart an hmang. Seminar 1st Session hi Rev. Lalrinmawia, CKTP Leader in a kaihruai a. 2nd Session hi T.Upa Dr. Samuel Vanlalthlanga, CKTP Asst. Leader in a kaihruai a ni. 

Interserve India leh Synod Mission Board tangkawp chuan 2011 August thla khan Aizawl khawpui huam chhunga Pastor, Pro. Pastor leh Kohhran Upate pualin tunlaia rawngbawlna hmanraw pawimawh tak mai Tent-Making Ministry chungchang Seminar an nei a. Chuta an sawi ho leh rawtna atang chuan zau zawkin thalaite puala neih ve nise, tih chu bawhzuiin One Day Mission Seminar hi buatsaih a ni ta a ni.

Upa te pual Counselling Training khar a ni ta

Mizoram Synod, Family Guidance & Counselling Centre-in September 5 atanga Kohhran Upa te puala Pastoral Care & Counselling Training vawi 17-na, Synod Multipurpose Training Centre -a a buatsaih chu September 18 zan khan ‘Final Evaluation & Graduation Service’ neiin khar a ni a. Aizawl khawpui chhunga Bial 6 atangin Kohhran Upa 20 an tel a ni. Synod Moderator chuan training chhuakte fuihna thu sawiin, ‘Upa chu Pathian rawngbawltu, A kohhran hote enkawltu a nih avangin Kohhran mite hmangaih tak leh duhsak takin a enkawl tur a ni a, Kohhrana harsatna tawk leh mi hnuaihnung zawkte ban phaka awm tur an ni,’ a ti a. Kohhran vei tlat tur te, midangte tana thawhpui nuam ni tur leh mi dangte tanpui thei tura mahni intat hriam reng turin a fuih bawk.

Sermon - TLEIRAWLTE LEH INNGAIHZAWNNA

TLEIRAWLTE  LEH  INNGAIHZAWNNA

(HTKT 3:1-2, Gen. 2:18)

‘Zânan laikhum chungah ka dâwn thîn, ka hmangaih chu; Ka zawng ruai e, ka tawng si lo ve. Ka tho vang a, khawpui daikâwm ka vêl ang, Kawtthlêrah leh mual laiahte chuan; Ka zawng zêl dâwn e, ka hmangaih chu.Ka zawng ruai e, ka tawng si lo ve.’

 Mipa te u, engvangin nge hmeichhe thutna tlar lam in hawi fo thin? Engvangin nge hmeltha i tih avanga i en vung vung khan a rawn en let ve leh che khan thil dang i en leh daih si? A en loh ve leh che khan enga ti nge i en nawn leh thuai si? Nang ni hmeichhia te pawh kha, enga ti nge zak chung chunga mipa bula awm nuam in tih tlat? Eng vangin nge sawi ngam silova star i neih? Mut hmunah te i  ngaihtuah veng veng fo leh nghal a! Eng dang vang mah a ni lo ve, mipa leh hmeichhia te hi  inhip tawn tura Pathianin min siam vang a ni. 

        Naupang kum 10 hnuai lam kan nih lai chuan mipa leh hmeichhia te hi kan in ngaina bik hran lo, kan inngeih lo fo thin zawk a nih kha. Mahse kan lo tleirawl tan a, in hip tawnna mak tak a lo piang ringawt mai ani. Chu in hip tawnna chu mi pahnih inkarah a lo in sawr bing a, chu chu “inngaizawng” kan tih hi a ni. Mipa leh hmeichhia chu Pathianin innei a cheng dun tur leh pum khata awm turin min siam a. Inngaihzawn hi innei tura bul tanna kawng khat a nih miau avangin thianghlim taka ngaihzawng neih chu sual a ni hran lo. Amaherawh chu dai per awl tak thang hlauhawm pui pui inkam a tam avangin fimkhur a ngai em em a ni. Tin, nupui pasal inneih hun hmaa in ngaihzawn lutuk hi a hlauhawm thei a, chuvang chuan tleirawl lai a ngaihzawng neih kher tum hi a tul lem lo. 

HMANGAIHNA: Tu emaw kan hmuh a, a mizia leh hmeltha kan tih avanga kan thinlung so but (feeling) hi hmangaihna a ni ngawt lo, a hmel leh nungchang i duh ngawih ngawihna kha hmangaihna a ni mai bawk hek lo. Amaherawhchu mipa leh hmeichhia ingaihzawnna atangin hmangaihna chu a lo piang thei tho. Hmangaihna hi hmuh theihah a awm lo, TV a hmeltha tak i hmuh kha  hmeltha ti hle mah la i hmangaih kher lo. Vawi khat hmuhna a hmangaih thut (Love at first sight) nia kan in hriat te hi Love ni lovin feelings a ni mah zawk. Hmangaihna chu thinlung lama duh thlanna leh thiltih ah a awm zawk ani. Chuvang chuan hmangaihna chu a nu phut lova, a fim a, a tak a, chhia leh tha hriatna leh ngaih tuahna fim tak hmangin i hmangaih tur chu i thlang thei a nih chu. Pa pakhat chuan, “Mipa leh hmeichhe tleirawl te hi chingal leh saum nen an in ang, dah dun chuan an phuan thin” a tia. Mipa leh hmeichhia nuam ti taka an awm dun hian an in hmangaih ani ngawt lo an phuan ani mai. Hmangaihna chu harsatna leh hrehawmna ah a lo par chhuak thin zawk ani.   

INRIM HI: Hmun fianrial a mipa leh hmeichhia in kawm ai chuan chhungte hriat puia in chhungah ngei inrim chu a that zawkna a awm ngei ang. Mahse tleirawl lai atanga inrim hi tunlai hunah chuan a rem chang tawh lo hle a ni. A chhan chu tleirawl hun lai hi kan eizawnna leh hlawhtlinna kawng zawh tur peng thuama kan awm hun lai a nih avangin, he hun tawite dam chhung atana in buatsaihna hun rangkachak hi inrim khawtlai nana lo hman hi a uihawm lutuk a ni. Mi fa te chuan he hun hi a hlut zia an hre tawh asin. Mizo te erawh chuan he hun hlu tak hi zalenna dar vuak kumah puangin, mipain nula a rim theihna license nei taah an in ngai a, hmeichhiate lahin inleng chhas neih phalna ILP (inner line permit) neih kumah kan lo puang ve mek bawk a. Nupui pasal neih la hun miah silo te kha in ngaihzawnna boruakah an leng khaw tlai a, an nih tur ang an nih loh phah mai bak ah, thenkhat che fuh lo deuh te phei chu rilru leh taksa puitlin hmain an innei a, chu chuan retheihna khurah a hruai lut thin. 

ENG HUNAH NGE NI ANG?: Thian kawm a zir te lehkhabu chhiar thin leh TV en thin a zir in kum inang tlang pawh inngaihzawn kawng ah thlen chin a inang lo thin. In ngaihzawn hi inneihna kailawn a nih avangin innei thei din hmuna din hma chuan urhsun taka inngaihzawn hi a him lo. Duh hun leh inpeih hma a loh theih lohva inneih hi a mualpho thlak.Kum aiin dinhmun a pawimawh. Kum tam avang ringawtin ngaihzawng neih leh inneih kan tlin tihna ani lo. Nupui pasal nei thei tur leh sual laka in veng thei turin i puitling tawk em tih ngaihtuah la, ngaihzawng neih hun tur chu nangman i hre mai ang.

Kan ngaihzawng leh min duh tu apiang hi kan nupui/pasal tur an ni kher lo tih hriat reng tur. Midang te hriat huai huai khawp a inngaihzawn nasat lutuk te hi a him lo. Inneih leh si lohin midang ten min thin hrik phah thei a, tin nupui/pasal neih hnuah pawh kan ngaihzawng hmasa te avangin kawppui te rilru a na reng thei a ni tih hriat tur a ni.