Gospel Camping chungchang
December ni 3, 2012 atangin kan Kohhran-ah Gospel Camping buatsaih tura beisei a ni a, Amaherawhchu, Speaker rawih kan tum ber ‘Hnehna puangtu Team’ te chuan Khawzawl lamah Programme ruahmansa an neih avangin an remchang thei dawn ta lo niin alang a, Team dang han beisei dawn ila, Krismas vuakvet chho ah hi chuan Kohhran hrang hrang ten Synod Revival Speaker te an ruai nasa thei hle a, hunawl nei an awm meuh ngailo a ni. Chuvangin, kan Kohhranah chuan kumin atan chuan kan beisei angin, Gospel Camping kan nei thei dawn ta lo niin a lang a. Kohhran Committee in ala ngaihtuah leh dawn a ni. He thu buatsaih lai hi chuan Kohhran Committee thutlukna erawh hriat hman ala ni rih lo a ni.
Krismas thing phurh hnatlang nei dawn......
Dt. 24.11.2012 (Inrinni) khian Krismas Thing phurh hnatlang neih tur a ni a, Kohhran chhungkua a tam thei ang ber thawkchhuak turin kan in ngen a ni. Zingkar (chaw ei hma) Dar 7:00 a.m velah Biak In kawt atanga chhuah tur a ni a, Buhfai No 1 theuh ken tur a ni. Thing lakna hmanraw neih ang ang ken tur a ni bawk. Hnatlanna hmuna eirawng min bawlsaktu tur leh a tul ang lo ngaihtuah turin heng mi te hi ruat an ni:-
1. Pu T. Lalropuia
2. Pu Chalhmingliana
3. Pu Saihnuna Sailo
4. Nl. Vanlalhruaii Ralte
5. Nl. Lalthanmawii
6. Nl. Laldinpuii
Tin, Kohhran chhungkua-te Budget pe tlak tawh engemaw zat an awm rualin la pe lo pawh an awm a, Ran (Bawng) tuihnai zawk beiseina avangin kum danga kan tih dan lo ang deuhin, duhthusam ngei kan hmuha kan thlan theih nan tiin, Aizawl lam ami lak tum a ni a. Chuvangin, hmalak a awlsam zawk theih nan Kohhran chhungkua-te Budget pek lamah tan ila leh zual ang u.
Kristian Chhungkua Fehchhuah Programme
Kan Kohhran a Kristian Chhungkua Committee hmalakna in, Dt. 14.11.2012 (Ningani) zan khan Pu Zawlnghaka Inah Kristian Chhungkua Fehchhuah Programme hman a ni. Inkhawm hi Upa Lalsangzuala, Chairman in a kaihruai a, Pi Laldampuii, Secretary hnen atangin Pathian thuchah ngaihthlak a ni. Fehchhuah Programme ah hian In neitute chhiar tellovin mi 13 an tel thei a ni. Fehchhuah Programme hi November thla chhung chu Ningani zan apianga neih chhun zawm tum a ni.
Missionary interview result a chhuak
Synod Mission Board-in Contract Missionary a lak tharte result chu Nov. 12 (Thawhtanni) tlai dar 3:00 khan tih chhuah a ni a. Diltu 324 atangin mi 101 lak niin mi 24-te chu waiting list-ah dah an ni. Waiting list hi Synod Mission Board-in advertisement a tih chhuah leh hma chu a nung ang. Missionary tharte hi hna hrang hrang atan hetiang hian lak an ni- Nurse leh Healthworker atan mi 8 lak an ni a, an vai hian hmeichhia vek an ni. Craft Teacher atan mi 3 lak an ni a, an vai hian hmeichhia vek an ni. Evangelist Teacher atan mi 38 lak an ni a, an zinga mi 12 chu mipa niin hnam dang pakhat a tel. Evangelist atan mi 52 lak an ni a, an zinga mi 22 te chu mipa an ni a, Evangelist zingah hian hnam dang pakhat a tel bawk. Heng missionary lak thar 101 zingah hian mipa 32 an awm a, a bak zawng 69 chu hmeichhia an ni. Heng thawktu lak tharte thawhna hmun tur hi siam fel mek a ni a, an posting tur hi Dec. 12, 2012-ah tihfel a ni ang a, hemi ni hian Synod Mission Board Office-ah inlan vek tur a ni ang.
Synod Executive Committee (SEC) 240-na
November 13 (Thawhlehni) atang khan Synod Executive Committee (SEC) chu a vawi 240-na atan a thu a, Meeting hi Rev. Thangzauva, Synod Moderator-in a kaihruai a, member 128 an tel a ni. Tun tum SEC hian thu ngaihtuah tur 75 zet an nei a ni. Synod sum dinhmun tarlan a ni a, kum 2012-2013 Pastoral Budget Rs. 56,28,35,000/- ah za zela 57.96 hmuh tawh a ni a, Mission Budget Rs. 37,27,65,000/- ah za zela 69.64 hmuh tawh a ni. Pastoral leh Mission Budget belhkhawm chu Rs. 93,56,00,000/- a ni a, October 2012 thleng khan za zela 62.62 zet hmuh tawh a ni. Kan hriat theih chinah Executive Secretary atan Rev. Vanlalzuata, Rev. Lalzuithanga leh Rev. P.C. Pachhunga te thlan an ni a, Executive Secretary-te hna chanpual tur hi SEC vekin a siam leh tur a ni. Administrative Secretary pathum heng hmun - Chhiam Bial ah Rev. F. Lalrinnunga, Barak Area ah Rev. Z.D. Lalhmachhuana, Manipur Area ah Rev. R. Lalbiaknia te thlan an ni.
Hospital Director atan Dr. Vanlalruata thlan a ni a, PRESCOM General Manager, Synod H.S.S Principal leh Synod Office Superintendent turte thlanna buatsaih leh mek a ni. Hotu thlan tharte hi Synod Inkhawmpuiin a pawm turin chhawp chhuah a ni ang. Synod Executive Committee hi Synod Calendar duan lawkah chuan ni thum chhung (Nov. 13 -15) awh tura tih a ni a. Amaherawhchu thu rel tur a thathnem deuh avangin November 16 (Zirtawpni) thleng pawhsei a ni.
