Editorial - Harh tharna

Harh tharna

Synod Revival Team te chuan tunlai hian Mizoram hmun hrang hrangah a rualin beihpui an thlak mek a, kan Bial ah pawh Revival Team te hian rawngbawlna nei mekin, ruahman ang chuan kar leh hian kan Kohhranah pawh Crusade neih tum a ni a, he hun hi Kohhrante’n hlawk taka hman tumin kan rilru i lo in kau ila a duhawm hle.

Hun kal tawhahte, Crusade leh Camping-te kan Kohhranah neih a lo ni fo tawh a, harhna hian min nuai ve fo tawh bawk. Amaherawhchu, Harhna hian chuaini a nei thin a, rawngbawltu leh Kohhran member te ah hian harhna ngailo kan awm lovang. Harhna hian Pathian ah rinna chaw min pe a, Kohhran a nung thin. Pathian hnaih ngailo leh, Kohhrana inhmang thinte pawhin harhna an chan chuan Kohhran boruak a nuam a, Kohhran hmel a danglam thin a ni.. He harh tharna chang tur hian Kohhran Memberte kan in hawn erawh a ngai hle mai. Tunlai ah chuan harhna hi Crusade leh Camping kal tlangin kan dawng tlangpui a, Pathian hmel hmu tur chuan kan dinna siam rem a, keimahni, a hmel hmu tur leh tawk turin kan lo insiam rem a ngai . Kohhran Programme pangngai anga hman a, hlawk miahlova hman theih a ni tih i hre nawn leh ang u.

Kan dam tlang em?

Ö

*Þ

Lalchhanhimi Thla 2, Pu Lalfelpuia fanu , Pneumonia vanga Sakawrdai CHC a enkawl chu dam takin an chhuak leh ta.

Ö

*ÞPu Laithanga kum 86, Rev. Dr. Hmingthansanga pu (a nu pa) Aizawl Hunthar veng a mi chu Dt. 9.10.2012 khan a boral a, khawhar chhungte KTP Aw chuan a tawrhpui tak zet a ni.

Ö

*ÞKohhran Chhungkuate ‘Pathian Ram Ip’ chu Presbytery Inkhawmpui avangin a hun pangngai ah lakkhawm theih a ni lova, Dt. 21.10.2012(Pathianni) ah lakkhawm a ni ang.

Ö*ÞSakawrdai Kohhran Kristian Chhungkua Committee chu Dt.7.10.2012 (Pathianni) khan Upa Lalsangzuala Inah neih a ni.

Tun kan Damdawi In

He thu buatsaih lai hian CHC ah mi 8 admit an ni a. kan Kohhran chhungkua atangin admit an awm lo. Tun dinhmunah mi 4 enkawl mek an ni a, naupiang an awm lo bawk. Dt. 8.10.2012 khan Dr. Shahnaz Zothanzami MO hovin, Dental Surgeon leh Opthalmic Assistant leh Staff thenkhat te’n, Govt Primary School II tlawhin School naupangte hriselna an endik a, Dt.17.10.2012(Nilaini) hian Govt. Primary School I ah School Health check up hi neih leh tum a ni.

KTP Inkhawm Programme

Dt. 15/10/2012: (5:45 - 6:15 p.m) Thawhtanni zan

Hruaitu : Pu HP Lalhnunliana
Tantu : Nl. Lalthantlingi
Thusawitu : Pu Lalrinngheta

Oct. thla chhung thawhlawm khawntu tur te :
1. Nl. Lalnghatzovi 2. Nl. Lalhriatpuii

Rawngbawlna lam

Baptisma Sacramen nausen 3-in chang thar

Dt. 7.10.2012 (Pathianni) chawhnu khan kan Kohhranah Rev Dr. Hmingthansanga, Bialtu Pastor in Baptisma Sacramen buatsaihin, he sacrament ah hian nausen 3 in Baptisma an chang thar a, chutih rualin nausen baptisma la changlo engemawzat an la awm bawk a ni. Baptisma chang thar te chu - Goldy Lalzamlovi d/o Vanlaltluanga, Lalhruaitluangi s/o Laldundanga, Lalmalsawmi d/o Lalnikhuma te an ni.

Kristian Chhungkua i dinthar leh ang u 

Synod in Kohhran tinah Kristian Chhungkaw Committee din ni se a tih angin, kan Kohhranah pawh kum 2009 atang khan din chhoh a ni ve a. Amaherawhchu, Kristian Chhungkaw Committee chu duh angin hma lak hleihtheih lovin hun eng emaw chen a awm hnuin, kumin 2012 ah hi chuan theihtawp chhuaha hmalak ni se, tiin Kristian Chhungkaw Committee chu Dt. 7.10.2012 (Pathianni) chawhma inkhawm ban khan Upa Lalsangzuala Inah neih a ni. Hmalak bul tanna atan Dt. 28.10.2012 (Pathianni) zanah Biak Inah Kristian Chhungkaw Campiagn neih phawt nise, hemi zui hian Fehchhuah Programme pawh siam chhunzawm zel tur a ni bawk. Kristian Chhungkua hi a pawimawh hle a, mi dang tih turah dah mai lovin, Kohhran chhungkua ten he hmalakna hi tha takin thlawpin, tan la tlang ila, Kristian Chhungkua i dinthar leh ang u.

Sakawrdai Kohhran-ah Crusade hmang dawn

Synod Revival Team te chuan Sakawrdai Pastor Bial huamchhungah rawngbawlna an nei chho mek zel a. Rokhawlhna dang a awmlo a nih chuan  Dt. 15-21, Oct. 2012 chhung khian Sakawrdai Kohhranah ‘Hnehna puangtu Team’ Speaker Pu C.Lalzahawma hmangin Crusade neih a ni ang. Crusade chhung hian Kohhran chhungkua te thahnem ngai taka intawiawm turin kan in ngen a ni. Dt. 20 Oct, 2012 (Inrinni) ah rampum huapin Synod Revival Team rawngbawlna puala Tawngtai rual beihpui neih a ni bawk dawn a ni.

Hmarphei Presbytery Inkhawmpui hmang mek

October 11 - 14 chhung hian Synod Inkhawmpui hnuaia Inkhawmpui lian ber Presbytery Inkhawmpui chu Mizoram chhung leh pawnah neih mek a ni a, Hmarphei Presbytery Inkhawmpui pawh  Darlawn Venghlun Kohhran Biak Inah neih mek a ni. Thlarau lam thupui ‘Kohhran hnapui Chanchintha Puandarh’ (Marka 16:15) chu Rev. Dr. Hmingthansanga, Sakawrdai Bialtu Pastor hnen atangin Inrinni zan khan ngaihthlak a ni. Presbytery Inkhawmpui ah hian Sakawrdai Pastor Bial Zaipawl te leh Sakawrdai Chhimveng Kohhran Zaipawl te chuan Pathian fakna hla ropui tak tak an hlan thei bawk a ni.

SCMI Platinum Jubilee, North-East Region

Student Christian Movement of India : ATC Unit chuan October 17 (Nilaini) hian Student Christian Movement of India din champha kum 75-na puala Platinum Jubilee Celebration, North-East Region chu Aizawl Theological College-ah a thleng dawn a, thupuiah ‘Witnessing Christ in a Pluralistic World’ tih an hmang ang a, Speaker atan Bishop Dr. Geevarghese Coorilos, Chairperson SCMI an hmang ang a, speaker hian Jubilee Souvenir a tlangzarh bawk ang.

NEICC pual tawngtai hun tihdikna
Kum 2012 Nilai zan leh Beihrual Thupui Bu-ah NEICC puala Tawngtai Ni kha October 28 tiin ziak palh a ni a, October 21 tih zawk tur a ni

Moderator Programme :
Synod Moderator Rev. Thangzauva chuan Oct. 10 - 14 chhung hian Zoram Pawn Preabytery Inkhawmpui, Kohima, Nagalandah a tel ang a, October 16 (Thawhlehni)-ah Aizawl a lo tleng leh ang.

Synod Mission Board Rawngbawlna
October 7 (Pathianni) khan Aizawl West Area Masihi Sangati chuan Tanhril Kohhranah beihpui an thlak a, baptisma chang thar 73 an nei.


PATHIAN THU ZIR DUH TAN

Presbyterian Bible School, Mission Veng-ah Session 27-na atan Certificate in Theology (C.Th) Admission hawn a ni a. Dil duhte tana hriattur pawimawh te-

Admission Form : Office hun chhungin Rs. 10/- a lei theih a ni

Dilna thehluh hun tawp : Nov. 28, 2012 (Nilaini) tlai dar 3:00 thleng

Dil thei chin : Cl-VII passed, kum 16 chin, Kohhran dan chhunga awm
Interview : Dec. 4, 2012 (Thawhlehni) zing dar 10:00
Class tan hun : January 14, 2013 (Thawhtanni)
Zir hun chhung : January - April, 2013
Stipend : Rs. 500/- per month.
Hrechiang duh tan Phone No. 857308007/ 2317343/ 2350082

Khaw 15 ah VC Nomination file an awm lo

V/C Bye-election hun sawn a ni : 

      HPC Demand Area huamchhung khaw 15 ah State Election Commission in VC Bye-election Nomination file hun pawh sei a nih hnuah pawh Nomination file tur an la awm lo. Aizawl Dist. S.P Pu LR Dingliana chuan thawhlehni Tourist Lodge Sakawrdai ah Political Party hruaitute kokhawmin meeting an nei a, amaherawhchu hmasawnna engmah hmuh tur a awm rih lo. Hun tiam chin thawhlehni dar 3:00 pm thleng khan Nomination file an awm tak loh avangin a vawihnihna atan Nomination file hun chu Dt. 15.10.2012 thleng a pawt sei leh ta a ni. Inthlan hun tura ruat Oct. 18 tih chu Oct. 25 ah sawn a ni bawk.

Sermon - An chhinchhiah bik che

AN CHHINCHHIAH BIK CHE

Zakaria 8:23

      Kenya rama Nairobi khawpuia lal ber hnuaia ram awptu (baron) nupui hian Kenya rawlthar pakhat a awmpui a. Thla thum a awm hnu chuan rawlthar chuan, “Ka pi, Muslim lal nupui i hmelhriat kha, a hnenah lehkha min ziaksak la, thla thum chhung chu an hnenah ka va awm ve ang chu,” tiin a ngen a. A pi chuan, “Ka hnenah hian la awm rih la, i hlawh te pawh kan tipung mai dawn nia,” tiin a chhang a. Rawlthar chuan, “Ka pi, hlawh tam zawk beiseia chhuak tur ka ni lo. Eng sakhua ber nge ka zawm dawn tih hi ka hre lo va, i bulah Kristiante chet dan zirin thla thum ka awm tawh a. Muslimho nun dan zira an hnenah thla thum awm leh ka duh a, chuta tang chuan eng sakhua nge ka zawm ang tih ka hre thei ang,” tiin a chhang a. A pi chuan, “Aw, chuti a lo ni maw? A tir atang khan i thil tum chu lo hre hmasa ila chu aw...” a ti vawng vawng mai a.

Kristian nun hi fimkhur a pawimawh hle mai. Kan awmna apiangah hian chhinchhiah kan ni a, inthlahdah hman kan ni lo. Kan ram pawh hi Kristian ram kan ni a, Pathian thu pawh kan sawi nasa hle a, Chhandamna camping pawh kan ram anga uar an awm ve a nih pawhin an tam lo khawp ang. Misual ber ber te pawh camping-a an luh chuan ni hnih khat thilah an piangthar thei zel mai a. Testimony ropui tak an sawi tawh chuan mipuiin an sualna chu kan hai der lui thei khawp mai a, lawm pawh an hlawh narawh e. Mi rinawm, nun dan tha piangtharte aiin mi sual bawraw tak piangtharte hi an thawm a na hlei hlei a, Kohhran pawh min nghawng phur mah mah zawk a. Heng hi thil lawmawm lamah ngai ila.

Amaherawhchu kan ram Kristiante hian hmasawnna tur kan nei. Kan ram hi pianthar nan chuan a tha thlawt mai, Krista tan camper zawng zawng kan inhlan fai pak pak zel a. Chutih mek lai chuan Kristiante than len nan a tha vak lo. Kan piang mai a, kan thang lian hlei thei tlat si lo. Jeriko khawpui ang khan nau chhiatna ram a ni tlat mai. Thuin kan piangthar a, nunah a bei nghet hlei thei lo va, hriat fiahna lamah chuan mi dangte hrilh tur kan nei theuh va, chhandamte nun dan turah erawh chuan entawn tling kan vang hle si a. Piangthar inkhawm ngaina lo kan tam a, piangthar hlep ruk ching te, piangthar dawt sawi ching te, piangthar Bible chhiar ngai lo te, piangthar tawngtai ngaina lo te, piangthar Kohhran bel lem lo te kan kat nawk mai. A sawia sawi nikhuaah chuan kan insawi mâm thiam leh viau bawk si.

Kan ramah hian Non-Mizo Convention kan buatsaih thin a, vai inhlawh chawp te te kan khalh khawm a, mi za velin baptisma an chang thin a. Non- Mizo Fellowship kan dinpui a, an chhungte tuithlar hialte pawh kan nei nual a, a lawmawm ngawt mai. Chutih mek laiin kan ramah hian vai officer, saptawng hmang thiamte hi Kristianah an inlet duh hauh lo. Hei hi a chhan eng nge ni ang? Sawitu pakhat chuan heng vai officer-te hian office-a an officer-puite nun dan an en hian Kristianna hi an awt lo va, Kristian nih ve kher hi tul an ti lo niin a sawi. Chutiang chu ni tak tak se, a va pawi thui dawn em!! fiamthu ni hram teh se. He thu hi a dik emaw dik lo emaw thu hranah dah ila, engpawh ni se, kan rama ring lo mite hian min chhinchhiah a ni tih hi kan hriat thar leh thin a pawimawh hle ang.

Heti a nih rau rau chuan hetiang hian rawtna siam law law ila : Rawngbawltute hian badge nei theuh ila. Kan kawr hma lamah hian Pastor, Upa, Thuhriltu, S.S. Zirtirtu, Committee member, etc. tih hi târ kalh ila, miten kal paha an chhiar theih khawpa chiangin ziak ila. Biak In kawngah chuan kan zahpui lo viau ang a, nimahsela khawii hmunah emaw chuan pawh thlak duh riau hun kan nei mai lawng maw? Inthlan dawn laia Party politics kan beih lai tak takte hian a hnawk viau lawng maw? Sorkar hna dilnaah te, Office-a eng emaw kan tih duh hunah te, sumdawnna hmunah te, sorkar atanga thil sem neuh neuh inchuhna hmunahte hian kan badge kha kan pawtthla duh mai lawng maw? Mahni inen fiah theuh ila.

Kristiante nun chu pawn lama a nihnain a thunun aiin chhung rila Pathian chhinchhiahnain a pawn lam nun a thunun zawk tur a ni. Chhung ril lamah takna kan neih si loh chuan pawn lama kan chanvo chu a hnawk hun a awm thin. Chhung ril lamah takna kan neih erawh chuan pawn lamah chanvo nei hauh lo mah ila kan vui chuang lo va, chanvo kan neih pawhin kan chapopui chuang lo vang. A nihna takah chuan kan rawngbawl hna avanga that tumna aiin kan chhung rila takna chuan rawngbawl hna a hring chhuak zawk tur a ni ang.