Editorial - A lem leh a tak

A lem leh a tak

    Vawikhat chu mi thatchhe tak pakhat hi mitdel lemah changin mitdelho kutdawhnaah kut a dawh ve a. A duh anga a hlawk loh avangin bengngawng tawngtheilo kutdawhnaah a va kal a. Chutah chuan hlawk zawk dawna a inhriat avangin tawng thei lo lemah a chang a, an zingah chuan a thu ve ta a. Nakinah chuan amah hre chiangtu pakhat hi a lo kal a, “Nang chu mitdel kutdawh zingah khan ka hmu thin che a, engtik lai khan nge i lo tawng theih loh le?” tiin a zawt a. Ani chuan, “Ele, nimin atang mai khan,” tiin a chhang a ni an ti a.  Lemchang na na na hi zawng, a tak an chan dawn hian an che sual nge nge thin a ni. Pathian thu hi kan nunpui peih loh avangin a sawi dan dangdai leh a sawi dan maksak lamah kan ram tang a. Kan sawi hi kan duh tawk mai a, a takah a lang chhuak lem lovin kan nunpui lova, Mi hmuh ah chuan Thar ta ber nia langin, Tawngkam thar kan chher chhuak a, mi dangte aia danglam ta luaah inngaiin kan in-show kual vel thin. Ni tin nun hlamchhiahin kan inthuk siak a, mi dangte hriat ve loh hre bik niin kan inngai a, hming thar kan invuah ngial thin a. Nimahsela kan nun hi miten an awt chuang reng reng si lo. He khawvel lemchan nun hian kan nun a ei zo va, Pathian tihna leh a rawngbawlna aiin a phawvuaka che kan tam ta.  Lemchang nun hi Pathianin a duh lova, Amah rin chhan a, a mah vuan turin min duh a ni.Piangthar lemte chu a lemin an nung a, piangthar takte chu a takin an nung thin.

LAL ISUA EN RAWH

LAL ISUA EN RAWH (Heb. 12:2)

    Kan zinna khawvel tuipuiah hian buaina chhum chhah mupte hian min chim buai ve fo thin. Kan nun hi harsatna tawk lova a kal tluan lai chuan Lal Isua ena a hnena lawmthu sawi nachang kan hre viau va, nimahsela chhum chhah mup kan sut lai hian kan buai zo va, Isua en a har thin a ni. Vanduaina kan tawk a, chhungkua kan buai a, kan fate avangin kan rum a; chutiang chhum chhah mup hnuai atang chuan mahni kan inkhawngaihna mittui a parawl teuh va, Isua en a har ngawt mai. Pathian thuin miten min fuih a, keini erawh chuan, “A ni khawp mai, mahse, mihring kan ni miau mai a,” tiin, Isua en thei lovin chhum chhah mup chu kan en zawk thin.

    Harsatna chhum chhah mup atang hian Isua hi hmuh sual a awl duh khawp mai. Zirtirte pawh kha Galili dilah tuifawn na tak mai an tuar a, hlauvin an khur a. Khawvar dawnin Isua chu anmahni thlamuan turin tui chungah a lo kal a, zirtirte chuan hmuithla emaw an lo ti a. Anmahni chhan tura lo kal Isua chu an hmu sual nasa kher mai. An hmuh sualna chhan chu manganna chhum hnuai atanga an thlir vang a ni. Lal Isua erawh chuan aw nem zaidam takin, “Thlamuang takin awm rawh u, keimah ka ni alawm,” a rawn ti dam dap mai a. Lusun manganna hnuai atangte hian chung lam thlir fiah a har a, lei lam kan hmu fiah thung a, min thlamuan tura Lal Isuan, “Keimah ka ni alawm,” tiin aw nem zaidam takin min be mah se, mittuiin min bual â zo va, kan mit a vai tlat thin a ni. Mi thenkhatte chuan kan chunga manganna lo thleng hi kan ngam lo tih hre reng chungin kan en ngawih ngawih a, kan bei a dawng zual thin. Lal Isua lam ensan ila, amah nen kan hmachhawn chuan tahna zan chu zing lawm hla a chang ngei ang.

    Lalpa en ngawt mai hi hnehna a nihzia chu Mosia hova Israelten tuipui sen an kân thuah pawh khan kan hmu. Khatah khan mipuite chu an mangang hle tawh a, an hma lamah tuipui sen dai kai rual loh a awm a, an hnung lamah Pharaoa sipai an lo tlan tawh bawk si a, dolung leh tuboh inkara awm an ni tawh a. Mosia erawh chuan a hma lama tuipui sen leh a hnung lama sipaiho chu thlir lovin, a hma chiaha Pathian hnathawh lo lang tur chu a thlir zâwk a. A hote hnenah chuan, “Lalpa chhandamna, vawiina a thawhsak tur che u hi en ngawt mai rawh u,” a ti a. Mosia hian mipuite angin a hma lam leh a hnung lama hlauhawmte hi en reng ve sela chuan a hote nen chhiatna nasa tak an tawk ngei dawn a ni. Nimahsela Lalpa a en tlat avangin tuipui sen chu a kangchat ta ruah mai a, chutah chuan him takin an kal kai ta a. Pharaoa sipaite chuan tuipui an rawn luh veleh tui chu a infin leh chiah a, a len bo ta dial mai a. Keini hi zawng, kan hnung lama harsatna kan tawh atangin kan hma lama lo la thleng leh tur chenin kan hawi zau lutuk a, kan hma chiaha Pathian hnathawh lo lang tur kan en khum thin a ni.

    Vawi khat chu Kohhran Upa pakhat hian Pastor hnenah, “Pastor, Upa ka nihna atang hian ka bâng mai teh ang,” a ti a. Pastor chuan, “Engtizia nge ni ta?” tiin a zawt a. Upa chuan, “Mipuite hian min sawisel neuh neuh reng mai a, min thlan hlim ang khan min fak tawh lo a ni,” a ti ngui raih a. Pastor chuan, “Chu, i hmaiah chil an chhak hial che em ni?” a ti a, Upa chuan, “Chil chu chhak em lo ve,” a ti a. Pastor chuan, “A nih leh i lu-ah hling lukhum khumtir an tum che em ni?” a ti a, Upa chuan, “Tum em lo ve,” a ti a. Pastor chuan, “A nih leh khenbeh an tum che em?” a ti a. Upa chuan, “ E, khenbeh te chu min han tum vaih teh se, lamtang pawh ka ngah ve mai, ka do let ve mai ang,” tiin a inhrosa ta a. Pastor chuan, “A ni maw, i zui Isua chu a hmelmaten a hmaiah chil an chhak khum a, a lu-ah hling lukhum an khumtir a, kraws-ah an khengbet a. Chuti chung chuan, ‘Ka pa, anni hi ngaidam rawh, an thiltih an hre lo a ni,’ tiin amah khengbettute tan a dilsak asin. Chuta tuartu Isua chu en ta che,” a ti a. Upa chuan, “Pastor, ka thiam lo a ni e, Kalvari tlang lam ka lo thlir khât deuh a nih chu,” tiin a thil tum chu a thulh leh ta a ni, an ti.

    Rawngbawl hnaah harsatna kan tawh hian mahni kan inkhawngaihna mittui a tla fo thin. Isua en lovin mahni kan inen a, kan harsatna kan en a, kan rawngbawl hna hi bansan kan duh hial chang a awm fo mai. Chutih lai tak chuan kan zui Lal Isua hi en ila, a hmel chu chiang takin hmu ila, “Hling lukhum khum vangin ka hmangaih a che,” tiin hlimin kan zai thar leh thei ang.

Kan dam tlang em?

Ö*ÞNl R Lalnunkimi (Te-i), Pharmacist, CHC Sakawrdai chu Thalbe  Cancer avangin Aug 3 (Inrinni) khan Zemabawk Cancer Hospital-ah Chemo an khai tan a, Kohhran ho ten i tawngtai pui ang u.

Ö*ÞPu Lalthangzuala (40), Pu H Thangvunga fapa chu Acute Gastro Entrities (Kawthalo) avangin Aug 28 khan CHC ah admitted a ni a, Aug 31 khan damtakin a chhuak leh ta.

Ö*Þ Aug 3-4 hian Pastor Bial fan programme chu Khawpuar ah hman a ni a, Upa Lalnunmawia, Chhimveng in a tawiawm a ni.

Ö*ÞMusic Committee hmalakna in khuang thar tha tak pahnih kaih a ni a, phoro a nih hnu ah hman theih a ni ang.

Ö*ÞBial Zaipawl Members ten Karleh Zirtawpni zan leh Inrinni khian Sakawrdai S.S Hall ah hla zir leh tur a ni. Members ten i hria ang u.
        Tun kar Damdawi In

Lawrkhawm

    SSU ten School tlawh mek.

    Sakawrdai Student Union te chuan Primary School 1,II & III te tlawh zawh hnuin July 31.2013 (Nilaini) khan Presbyterian English School an tlawh a, Aug. 1 .2013 (Ningani) khan Gov’t Middle school an tlawh bawk. SSU hruaitute hian naupangte hnenah Zirna lama hma an sawn theihna’n infuihna hun an hmang. SSU te hian School hrang hrang tlawh turin ruahmanna an siam mek a, School la tlawh loh te pawh la tlawh zel tum a ni a.Sakawrdai khua a School awm zawng zawng te tlawh chhuah vek an tum a ni.

Exam tan dawn

    Presbyterian English School chuan Dt 5.8.2013 (Thawhtanni) atang hian First Summative Examination an tan dawn. School in result tha tak aneih theihnan nu leh pa ten kan fate thahnem ngai tak a tan lak pui turin Pricipal and  Staff  PES chuan nu leh pate a ngen a ni. Naupangte Exam chung hian nu leh pate chu tumah  school campus chhungah luh phalsak anni dawn lova Gate kalh  a ni ang.

Rawngbawlna lam

Intlawhtawn Programme hmang zawh a ni ta:

    Baktawng Venghlun Branch KTP te chuan Dt. 26th-28th.July.2013 chhunga Sakawrdai Branch KTP an rawn tlawh chu Pathian kaih hruaina in tluang taka hman zawh a ni ta. He Join Fellowship thleng tur a Kohhran chhungkaw in buatsaihna a tha hle a, mikhual lam pawhin nuam an ti tlang hle a ni. Venghlun Branch te hmel thahnem  tak kan hmu a, an tam hrim hrim vang niloin Rawngbawlna kawng a an inpek zawh vang ni zawk mah in  alang. July 27 khan Sakawrdai Playground ah nileng a intihhlimna hun hman a ni. Branch pahniha Thalai te hlawk an ti hle nia thu dawn a ni. Pathian thuchah ropui tak ngaihthlak thin a ni bawk. Intlawhtawn Programme ah hian  kan Kohhran KTP member te thawhhona a tha hle a, Zaipawl tum thum neiin chetna tur awmahte  awl bik awmlo in kan tang tlang hl e a, kan in tawiawm that avangin Kohhran leh Branch hmel a mawi phah bawk a ni. Baktawng Venghlun Branch KTP te hi July 29 tukthuan ei kham ah  P/P Ngurthanmawia Sailo chuan   Biak In kawt tawngtaina hun hmangin Baktawng Venghlun Branch atanga lo kalte thlahna neih a ni.Tin, hemi zan KTP inkhawm ah Joinj Fellowship thlir letna hun hman a ni a, sum tam tak seng a lo kal te, Branch KTP in a lo dawn sawn dan chu sit awm an tih thu te sawi langin, sawhchiar emaw thingpui emaw tal hlui an nihloh chu pawi an tih thu sawi lan a ni a. He programme hi hlawk thlak an tih thu an sawi lang hlawm bawk a ni.

KTP hnatlang

    July 29 (Thawhtanni) khan Thosi hlo kah hnu khar nan CHC Compound ah Branch KTP hnatlang neih a ni. He hnatlang ah hian member 17 thawk chhuak in damdawi in leh Quarters bul hnim  te thlawhfai leh sam fai hna thawh a ni Tarlan tawh ang in thosi hlo kah hi ICI KTP te nena  inthawhtawm a nih avangin hemi ni hnatlang pawh hi a rual a neih a ni a, an ni lam pawh thahem tak an lo thawk chhuak ve bawk a ni.

Bial Zaipawlten Hla Zir

    August 2 & 3 (zirtawpni zan leh Inrinni nileng)  khan Sakawrdai Pastor Bial zaipawlte chuan Sakawrdai Chhimveng Kohhran ah hla an zir.  Bial Zaipawl hla zir te hi Sakawrdai chhimveng Kohhran Committee chuan  tukthuan buatsaih sakin anmahni vekin eitur an siam sak a, an kil ho nghal a ni. He hla zirna ah hian Bial zaipawl te an kal tha hle a, hmeichhe lam pang in Zaipawl form tur chung chang an sawi ho bawk. Bial Zaipawl an dawnsawn dan leh an duhsakna hi  Bial Zaipawl Members te hian ropui an tiin lawmawm an ti hle. Nikum lamah khan Bial Zaipawl te hian Khawpuar tlawhin Khawpuar Kohhran chuan Bial  zaipawlte chawhlui an lo siam sak tawh bawk a ni.

Pavalai Meet hmang mek

Synod Revival Committee bultumin Rampum huap Pavalai Meet vawi 1-na, 2013 chu Bethlehem Kohhran Biak In ah August 3-4 chhung hian neih a ni a, zanin ah a tiak ang. Pavalai Meet ah hian Thlarau lam Thupui chu “Nang malsawmna ni ang che” (Genesis 12:2) tih hman a ni a, Thupui hi Then thuma then a ni a, Rev Lalramliana Pachuau, Synod Moderator,Rev Vanlalzuata, Senior Executive Secretary i/c Pastoral etc.Rev R. Lalnuntluanga, Revival Committee Member te’n Thupui an sawi ang.

    PATHIAN THU ZIR DUH TAN

Presbyterian Bible School, Mission Veng, Aizawlah Session 29-na atan Certificate in Theology (C.Th) admission hawn a ni a. Dil duhte tan a hnuaia tarlan hi hriat tur a ni e :-
 Admission Form : Office hun chhungin Rs. 20 a lei theih a ni
 Dil hun chhung : August 26, 2013 (Thawhtanni) tlai dar 3:00 thleng

KTP pual thlaithar thawhlawm

Vawiin thlaithar thawhlawm hi KTP pual tur a ni a, kohhran chhungkua ten kan thlai thar neih ang ang thawha tawiawm turin kan inngen a ni. KTP pual thlaithar thawhlawm hi Upa Lalramhluna’n Pathian hnenah hlanna a nei ang.

Editorial - Kumthar thutiam

KUM THAR THUTIAM

Kum a lo thar hian, kum hluia chin dan thin, thalo te thlahin, kum thar atanga ti tawh lo tur leh, kum thara mahni duh zawng leh tha tihte ti tawh turin mi tam takin ‘Kum thar thutiam’ an nei thin. Meizial zu thin, nghei duh te’n Meizial zu tawh lo turin an intiam a,Inkhawm ngailo leh inkhawm khat te’n rilru siam tharin Inkhawm zing turin an intiam bawk a,Mi thenkhat, Kum hlui aia mi dang tana malsawmna ni leh zual turin an intiam bawk. Kum thar thutiam hi a inanglo hlawm hle thin. Kum thar 2013 kan chuang kai a, Kumthar thutiam nei pawh kan awm nualin a rinawm. He thutiam neitute hian Thutlukna chhuanawm tak an siam a, thil lawmawm tak a ni phawt mai. He thutiam tihlawhtling turin hma pawh an la ngei ang tih a rinawm.Kum thar thutiam vanga nun leh chin dan thlak ta pawh tam tak sawi tur an awm a ni.Kan hriat reng tur chu, kan thil tih thin dan leh kan chakte thlah hi, natna nilovah chuan tawrh har tak a ni a, kan theihna hian chin tawk a nei awlsam hle thin. Kan mimal tumna hi tih leh chakna hian a hneh awl em em a ni. Hun a liam a, kan kumtir tumna ang reng khan boruak a awm lova, awm hmun kan sawn a, kan thenrual kawmna,kan hna thawhna leh zin leh veivahna ah te kan tum thlah mai hi a awl em em a ni. He kan thut tiam ti puitling tur hian minpuih reng duhtu Pathian bel ila, ama kuta innghah mai hi kan puitlinna tur a ni tih hriain, Amah kan biakin nghehna dil thin ila, Pathian a kan innghah tlat chuan tihtheihloh a awm lo tih i hre thar leh ang u.

Kan dam tlang em?

Ö

*Þ Kan Jt. Editors Tv. H.Lallungmuana leh Tv J. Zothansanga te chu mimal thil pawimawh avangin Aizawl lamah an zin

Ö*Þ Kum 2013 Branch Zaipawl Conductor-ah Tv. J.Zothansanga, Asst. Conductor-ah Pu HD Lalthanzuala ruat an ni.

2013 Sakawrdai Branch OB & Editorial

BRANCH KTP OFFICE BEARER - 2013
Leader : Pu Lalbiaktluanga Ph: 9436175320
Asst. Leader : Pu Ronald Lalramsanga Ph: 8974965675
Secretary : Tv H. Lallungmuana Ph: 8974846121
Asst. Secretary : Tv Laltanpuia Ph: 8729985479
Treasurer : Nl. Gospel Ramkinlovi Ph: 8974633889

Fin. Secretary : Pu HD Lalthanzuala Ph: 9612081156
KTP AW EDITORIAL BOARD - 2013
Editor : Pu HD Lalthanzuala Ph: 9612081156Jt. Editors: Tv H. Lallungmuana Ph: 8974846121,  Tv. J.Zothansanga Ph: 8731913101
Business : Tv. Laltanpuia Ph: 8729985479
Cir. Manager: Pu Ronald Lalramsanga Ph: 8974965675

KTP Inkhawm

KTP INKHAWM

Dt.14.1.2013Hruaitu : Pu Ronald Lalramsanga
Tantu : Nl Lalnghatzovi
Thusawitu : Pu Lalbiaktluanga

January Thawhlawm khawntu turte:

1. Nl Lalnghatzovi 2. Nl Gospel Ramkinlovi

Tun kar Damdawi In

Tunkar CHC ah mi 7 admit an ni a. Tun dinhmunah puitling 1 leh nausen 1 enkawl mek an ni. Kan Kohhran chhungkua damlo enkawl an awm lo. Naupiang 2 an awm a, Inrinni khan Dr. Shahnaz Zothanzami leh Dental Doctor, Dr Shahmim chu an rawn chho leh ta a, karleh lam atang chuan rawn leh theih an ni ang. Dr Shalom-i pawh karleh Thawhtanni khian a rawn chhoh beisei a ni bawk.

Lawrkhawm

Dan thianghlimin pasal nei:

Nl. Lalthamawi chuan Tv. Hmangaihramengmawia chu January ni 10.2013 khan Saihapui Presbyterian Kohhran Biak In ah Kohhran Dan thianghlimin Pasal-ah a nei ta. January ni 8 khan a thlahna hi an In, Pu Lallungkhama In ah hun hman a ni a, T. Upa Zothangkhuma’n hunserh hi kaihruaiin Thusawina hun Upa Ramhluna’n a hmang a, Kohhran Member te leh Thenrual thate an kal tha hle. KTP AW chuan Fanau duhawm neia, nupa hlim tak ni turin duhsakna a hlan a ni.

Sub-Centre Quarter sa tha dawn :

Sakawrdai Sub Centre Quarter chu Sak that a ni dawn. Seb Centre Quarter hi a dung Feet 35, avang Feet 15 a sak tur a ni a, a sak hna hi tan thuai tum a nih thu kan dawng.

RSBY Registration la tih theih loh:

Job Card neite tana Manchawilova Damdawiin a awm theihna tur, RSBY Registration chu a form khailakna avangin chhunzawm theih a la ni lo, a Form hi kar leh lama rawn thleng hman tur a beisei a ni.

Rawngbawlna lam

KTP AW Enkawltu tur ruat thar a ni

Kum 2013 chhunga KTP AW enkawltu tur te chu, Branch Committee-in heti’angin a ruat thar:- Editor: Pu HD Lalthanzuala, Joint Editor: Tv. Lallungmuana, Tv. J.Zothansanga, Business : Tv. Laltanpuia, Circulation Manager: Pu Ronald Lalramsanga. Agents: Jubilee Lalhmingthangi, Joseph Lalramliana, Lallawmkima. Chanchinbu man khawntu turte : Tv Ramthianghlima, Tv Lalhumhima, Nl. Lalrinchhungi. Chanchinbu man hi nikum ang thovin Thlakhat ah R 20/- a ni ang.

KTP Nileng Committee neih a ni

January ni 5. 2013 khan Branch Committee, Sunday School Hall ah neih a ni. Committee hi Chawhma dar 10:30 ah tanin kumin chhunga hmalakna tur hrang hrang bakah, chanvo nei turte ruat an ni a, OB leh Committee Members 10 an kal thei a ni. Kumin atan Group 3, Mathaia, Marka leh Luka Group a inthen leh rel a ni a, Group tinte kumkhat Budget ah

R 7000 theuh in tuk a ni a, tum hnih, June Thawhtanni vawihnihna leh December Thawhtanni Vawi khatna ah te budget hi lakkhawm tur a rel a ni a, Member te lo siam rem chu Leader leh Secretary-te kutah dah nin Committee a pharh leh tur a tih a ni. Kum 2013 Branch KTP Project atan Phantom Power Microphone(Pulpit a dah tur), Keyboard leh Guiter Stand leh Thuk pahnih a ni. Hemi bakah Kum 2012 Project ‘Kum 2014 a KTP General Conference kalna atana target R 35000/- atangin R 20000/- dahthat a ni a, a bak R 15000/- hi kumin a thawhchhuah belh tur a ni bawk. KTP AW chanchinbu Editorial Board siam thar niin, Kohhran Committee in Branch kuta a dah angin Light & Sound incharge tur bik te inruat a ni a, Bial leh Central KTP Rorel nkhawm Palai turte ruat fel ni in Branch hmalakna hrang hrang a chanvo chang turte ruat an ni bawk.

Missionary Day hnuhnung ber hman a ni

January ni 11(Zirtawpni) zan khan Mizorama chanchintha lo thlenna puala Inkhawmna neih a ni a, Inkhawm hi Upa Raltawnphunga’n kaihruaiin "Krista thuhretu’ tih thupui hmangin Upa Lalringliana hnen atangin thusawi ngaihthlak a ni bawk. Inkhawmah hian Pathian hnena thilpek lakkhawm a ni a, Malsawm tawngtaiin Bialtu Pastor Rev. Dr. Hmingthansanga’n inkhawm a titawp a ni. Tun kum hi Mizoram Presbyterian Kohhran-in Chanchintha thlen ni January 11 a hman hnuhnun ber tur a ni ta a ni. Kum 2014 atang chuan Mizorama chanchintha lo thlen Ni atan March ni 15 hi Ni serh a hman tawh turin SEC chuan a rel a, Serlui Presbytery atanga thu lo lut niin, Synod Inkhawmpuii’n a pawmpui a ni. March ni 15, 1891 khan Rev. William Williams chuan ‘Kutbul Lui’ chhuah rawn kaiin, Liankunga Khua, Muanghmun a rawn thleng a, Naupang leh Puitling te ko khawmin Zai leh Pathian thuziak Milem te a sem darh a ni. Hemi ni hi Mizoram Synod chuan Mizorama chanchintha lo thlenna ni ah a pawm ta a ni. Hun rei tak atang tawh khan Mizoram Synod chuan Rev. Willim Williams a ‘n Mizoram leilung a rawn rah tan ni hi Chanchintha thlenni ah a thuphungin alo pawm tawh a. Amaherawhchu rawngbawlpui Kohhran dangte nena inlungrual tlan zawkna beiseiin, January Ni 11 1894 J.H Lorrain leh FW Savidge te rawn thlen ni hi pawmin alo serh ve thin a ni. Amaherawhchu inlungrualna tak tak a awm thei tawh chiah lo ni a a lan tak avang leh rawtna lut a awm bawk avangin March 15 hi Chanchintha thlenna Ni ah pawmin Presbyterian Kohhran chuan a serh dawn ta a ni.

Kohhran Joint Committee Hruaitu thar thlang

Jan. 11, 2013 (Zirtawpni) zing khan ICI Kohhran Sunday School Hall ah Sakawrdai Kohhran Joint Committee 2013 hruaitu thar thlanna neih a ni a. Hetiang hian thlanchhuah a ni:- Chairman : Upa Lalrammawia PCI Chhimveng, Vice-Chairman: Upa Kungliana ICI Vengpui, Secretary : Upa Lalhmasawna EFCI Vengpui, Asst. Secretary : Pu Lalrinfela ICI Chhimveng, Fin. Secretary : T.Upa V.Thangkunga PCI Chhimveng, Treasurer : Upa Zothanghluna ICI Vengpui.

S.S Training nei tawh dawn

Kum 2013 atng hian Puitling Sunday School Zirtirtute pualin Zirlai enlawkna leh zir chianna, Sunday School Training Neih tawh thin a ni dawn, Trainning hi Inrinni zan Inkhawm ban apiangin neih tawh tur a ni ang a, Puitling Sunday School Zirtirtu te chuan Inkhawm ngai pawimawhin Training-ah hian tel tum zel nise tih chu Kohhran Committee duh dan a ni.

Chanchinbu man ti sang

Kristian Naupang Chanchinbu kaldan phung thlakin a phek tihpun tum a ni a, a man pawh R30/- atangin R 50 ah tihsan a ni a, . Kristian Naupang chanchinbu hi naupang te mai bakah Thalai telam te huap tela a chhung thute pawh buatsaih a ni tawh dawn a, a Bu kawm pawh Multi Colour a chhut tum a ni a, January Thla Issue atangin Colour hian chhut tana ni dawn a, a phek erawh chu April Thla atngin tihpun a ni thung ang. Kristian Thalai Chanchinbu man pawh R50/- atanginR60/- ah tihsan a ni bawk

Sermon - Thlarau thara rawngbawl

Thlarau thara rawngbawl

(Rom 7:6)

Rawngbawlna ah hian, rawngbawltu atana thlan an awm a, rawngbawl tura kohna dawng an awm bawk a, kohna bik dawng lem lova tulna avang zawka rawngbawl tura inpe an awm bawk. Rawngbawl tura kan inpekna ki chu eng ang pawh lo ni sela, Krista tana pasaltha ni tura inpe te hian kan rawngbawlnaah hian Thlarau Thianghlim hruaiin rawng kan bawl thin em tih erawh kan inzawh nawn fo a tul thin.

Kristian nun hi Thlarau lamah chuan hlimawm leh nun thlakhlelhawm tak ni mahsela, khawvel thlirna lam atang chuan harsatna tam tak paltlang ngaihna nun a ni. Chuvangin rawngbawltute chuan kan nun hi Thlarau lamah kan tah hriam fo loh chuan Setanan thiam takin min bei a, a duhna lam lamah hnuk kawi kual vel tawh mai thin a ni. Chuvangin thlarau thara rawngbawl thei turin tan ila sauh sauh ang u.

Paula chuan, ‘Tunah erawh chuan min chelhtu lakah thi tawhin, Dan ata thlahin kan awm ta, lehkha ziak hlui ang mai ni lova, thlarau thara rawng kan bawl theih nan’ a ti a. Mihringte hi a hma chuan sual thuneihna hnuaia awm kan ni a, kan nuna Dan avanga duhzawng sual lo chhuakte chuan kan taksa pengah te, thihna khawpa rah turin a thawk thin a. Amaherawhchu Krista tlanna avangin min chelhtu lakah thi tawhin, Pathian lama kan rah theihna turin Dan ata thlahin kan awm ta a, lehkha ziak hlui ang mai ni lova, thlarau thara rawng kan bawl theih nan. Pawn lam lang thei chin chauh nilo, chhungril lama Krista nena inzawmna hi a pawimawh hle a ni. Chhungril nuna Krista’n lalna a chan chiahin miin thlarau tharin rawng a lo bawl thin a ni.

Rawngbawltute hi an in fit vang leh an thiamna leh theihna in a tlin avanga rawngbawl an ni lova, Lalpa’n a khawngaihna avang zawkin min chhandam a, min chhandam mai chu duhtawk lovin, chu chhandamna chanchin tha chu hril zel turin min ti zawk a ni. Paula chuan Thlarau thara rawngbawl a pawimawh zia hriain, ‘Krista hmangaihna chuan min tirlui a ni’ tiin a sawi a ni.

Kan rawngbawlna han thlir hian Thlarau thara rawngbawl tur chuan inpekna tak tak bakah thawhrimna leh taimakna hi a pawimawh tial tial dawn a ni. Rawngbawltu thawkrim leh rimlo chu rawng kan bawlsaka te hian an hre thuai mai thin a ni. Rawngbawltu tam tak mahni tuina, chakna, a nuam chin leh a langsar chin chiaha rawngbawlte avang hian kan rawngbawlna hian rah tha chhuah thei lovin a thuanawp phah fova, a pawi thin hle mai. Thawk tha peih silo, mahse thil hre si, tawng lama chak bawk si ai chuan thiamna lamah pawh sang lemlo, mi pangngai ve mai pawh ni se, inpekna tak tak nena rawngbawltu hi Lalpan a mamawh zawk a ni.

Kawng hrang hrangah hma kan sawn lai mek hian rawngbawlna kawng ah pawh hma kan sawn ve zel a ngai dawn a ni. Tunlai huna rawngbawlna kan mamawh ber pakhat chu harsatna tam tak nena hun hmang thin, mi lungngai mangang leh nun beidawngte nun luhchilh rawngbawlna hi a ni. Rawng kan bawl saka te hmangaihna leh an harsatna hriatthiampui thin tur khawpa rawngbawl hi Thlarau thara rawngbawl nen a inkawp tlat a ni. Tih tak takna nena rawngbawltu chuan midangte nun a vei tlat a, chhandamin an awm lovang tih a hlau a, an mamawhna zawna puih theih dan tur awm ang ang ngaihtuahin theihtawp a chhuah thin a ni. Keini pawh inenfiah theuh ila, rawng kan bawlna kawng hrang hrangah te hian rah chhuak thei tur khawp hian kan rawngbawlnaah hian kan inpe tawk em? tih in zawt ila, inpekna tak tak nen thlarau thara rawng bawl turin tan ila zel ang u.