Editorial - Beiseina

BEISEINA

Beiseina neilo mihring an awm awm love, beiseina hian nun a ti nuam a,hma lam ah eng a dah a, chumi en chuan mihring hian kan hma lam kan tawn thin a ni. Beiseina hi thamral a awm a, ataka chang engemaw zat a awm bawk. Kan beiseina hi a taka chang tur chuan a beiseitu lam pawhin tih tur a nei.. Beiseina hi malsawmna lam hawi vek a tih theih hial ang. Zirlai atanga, chhungkaw khaidingtu leh pawlte, Kohhran ang pawhin kan beiseina chu hlawhtlinna ah tawp se kan ti vek a ni. He beiseina rah hi kan um a, a hlawhtlinna tir chuan tih tur kan siam a, hma chhawp neih erawh angai a. Kohhran huang chhungah pawh, hlimna leh harhtharna kan duh a, Kohhran nung tak neih kan duh vek awm e. Kohhran rahchhuah thei ni tur chuan, Kohhran mite lam pawh kan tan tlan a,, hlimna paw chhuak thei tura hma chhawp kan neih a ngai a ni.   Tunlai khawvel mila kal ni mai lovin, Kohhrante chu Pathian hniakhnung zuitute kan nih angin, Pathian chu kan bulpui a nih zia kan chiang a, ama tan inpein, Thlarau lama harhtharna pawh kan beisei tur a ni .‘Beiseina hi thiltih tel lo chuan a thi a ni’ tih a ni a, Thlarau lama kan duh tipuitling tur chuan Tawngtai nasat leh mahni inhawn angai a ni..  

Inkhawm Programme

KOHHRAN  PROGRAMME :
Vawiin- 04.11.2012
Pathianni Chawhma: (10:00 - 10:30 a.m)
Khawvel Sunday School
Hruaitu         : Upa Raltawnphunga
Tantu            : Nl. R.Lalnunkimi
Thupui sawitu : Pu Lalsangzuala
Thupui         : Jonathan Edwards chanchin I
Pathianni Chawhnu: (1:00 - 1:30 p.m)
Hruaitu         : Upa Lalringliana
Thusawitu     : Pi Laldampuii
Thupui         : Jonathan Edwards chanchin II
Pathianni Zan:  (5:45 - 6:15 p.m) 
Hruaitu         : T. Upa Zothangkhuma
Thupui sawitu : Upa Lalhluna

Naupang S.S Programme

Pathianni Chawhma: 
Hruaitu       : Upa R. Lalfakzuala
Tantu         : Nl. Gospel Ramkinlovi
Thupui sawitu : Pi Zosangliani
Thupui       : Helen Keller chanchin I
Pathianni Chawhnu:
Hruaitu       : Pi Lalengzauvi
Tantu         : Nl. Lalrinchhungi
Thupui sawitu : Pu Ronald Lalramsanga
Thupui        : Helen Keller chanchin II

Hmeichhe Inkhawm

Kohhran Hmeichhia Programme :

Dt. 13/11/2012: (5:45 - 6:15 p.m)
Hruaitu : Pi Mangthankungi
Tantu : Pi Lalnunnemi
Tu leh fa te tana tawngtairual

Kan dam tlang em?

=> Lalremliana Thla 2 leh a chanve, Pu Lalrinhlua fapa chu Awmna avangin Zirtawpni zan khan CHC ah admit a ni a, a that chhuah leh thuai KTP AW chuan kan duhsak hle.

=> Zirtawpni zan khan Naupang S.S Department te chuan vawiin Khawvel Sunday School programme inbuatsaih nan thu leh hla zirhona hun S.S Hall-ah an nei.

=> Dt. 28.10.2012 khan Branch KTP chuan Sunday School Hall-ah Committee a nei a, Thawhtan zan inkhawm banah emercency meeting neih a ni leh bawk.

Tun kar Damdawi In

 Tunkar chhungin CHC ah mi 11 admit an ni a. Tun dinhmunah mi 3 enkawl an ni. Kan Kohhran chhungkua atangin enkawl an awm lo. Naupiang 1 awmin damlo Aizawl a refer 1 a awm bawk. Nilaini khan Dr Shahnaz Zothanzami hovin Medical Staff ten Govt. Primary School III ah School Health Check-up an nei.

KTP Inkhawm

KTP  Inkhawm  Programme : 

Dt. 05/11/2012: (5:45 - 6:15 p.m)
Hruaitu : Pu HP Lalhnunliana
Tantu : Nl. Lalthamawii
Thusawitu : Tv. H. Lallungmuana
Nov. thla chhung thawhlawm khawntu tur te :
1. Nl. Lalhmunsiami 2. Nl. Lalhriatpuii

Lawrkhawm

Synod Mission Board : October 19 - 24 chhung khan Synod Mission Field, Bomdila, West Kameng District, Arunachal Pradesh-ah NERIST Mizo zirlaite chuan an puja chawlh lai hmang tangkaiin an mahni sensoin Work Camp an nei a, zirlai 34 (mipa 29 leh hmeichhia 5) an kal a ni. He work camp-ah hian Pastor Quarters in hnuai hmun laih te, fencing siam te, rawng hnawih leh hna tul hrang hrangte an thawk a ni.

Synod enkawl School budget : Kum 2013 -2014 chhunga Synod Higher Secondary School sum hman tur atan Rs. 36,309,500/- leh P.C. Girls’ School atan Rs. 20,032,000/- ruahman a ni a. Hei hi Synod Finance Committee-ah thlen a ni ang a, Finance Committee-in a thlir hnuah Synod Executive Committee (SEC)-ah thlen leh a ni ang a, SEC Budget Session-in a remtih hnuah Synod Inkhawmpui-in a pawmpui turin pharh a ni ang.

Synod Committee hrang hrang : Synod hnuaia Committee peng hrang hrang kum tawp rorel thutkhawm kal zel ah November 6 (Thawhlehni)-ah Synod Social Front, November 7 (Nilaini)-ah Synod Music Committee an thu leh ang a, Synod Executive Committee (SEC) chu November 13 atanga 15 chhungin an thu ang. November 20-22 chhungin Finance Committee an thu leh bawk ang.

Rawngbawlna lam

Nau hualna inkhawm ah nausen 10 hual an ni :

Dt. 28.10.2012 (Pathianni) khan Naupang Sunday School chuan Nau hualna inkhawm an nei. Upa R.Lalfakzuala’n a inkhawm kaihruai in, a hnen atangin fuihna thuchah ngaihthlak a ni a, nausen te an lo seilen hnu a Sunday School tha taka kal tur leh an puitlin hnuah pawh Kohhran bel tlat tu an nih theih nan duhsakna a hlan a. Zirtirtu lam atangin fuihna thu ngaihthlak a ni bawk. Inkhawm banah refreshment, Squash leh Artui sem a ni bawk a ni. Nau hualna ah hian Nausen mi 10 hual an ni.

Khawvel Sunday School Ni vawi 68/102 na:

November 4 (Pathianni) hi Khawvel Sunday School Ni a ni a. Khawvel Sunday School Ni hi Dr. George W. Bailey, Tabernacle Presbyterian Church, Philadelphia Kohhran Upa rawt chhuah a ni a. Kum 1907-a World’s Sunday School Association Convention Rome-a neih tumah leh kum 1910-a Washington-a Convention neih tuma an sawihona bawhzuiin Kum 1910 May 22 atang khan Khawvel Sunday School Ni hi hman tan a ni.  Mizoramah chuan Khawvel Sunday School Ni hi kum 1944 atang khan serh tan a ni a. Kum 1949 atangin Khawvel Sunday School Ni chu Thupui neiin November Pathianni hmasa berah hman thin a ni ta a ni. Kum 2001 hma lam kha chuan Puitling leh Naupang Sunday School-te hian programme pakhat intawmin Biak Inah thupui pakhat an zirho thin a, kum 2001 hnu lam atang chuan Puitling leh Naupang Sunday School chuan thupui zir tur hrang neiin a hrangin hun an hmang ve ve ta a ni. Mizoram Presbyterian Kohhran chuan kumin (2012)-ah hetiang hian thupui an zirho ang :

Puitling - Jonathan Edwards (1703 - 1758) - By Upa C. Thanga

Naupang - Helen Keller (1880 - 1968) - By Lalrindiki Ralte

2012 MSSU Report & 2013 MSSU Zir tur:

Kum 2012 chhunga Sunday School kai zat report tlangpui a hnuaiah hian tarlan a ni a, heng bakah hian Bial 3 atangin report dawn a ni lo.

1. Sunday School zat 901

2. Hotute                       4,212

3. Zirtirtu                     41,177 

4. Zirtu                   3,53,359

Hming ziak zat   3,98,748

Kum 2013-a Department hrang hrang zir tur hetiang a ni :

1. Puitling  - Sam Bu II & III (42 - 89) - Rev. Dr. R. Lalbiakmawia

2. Senior  - Bu Hnihna  - Rev. Rosiamliana Tochhawng

3. Sacrament - Rev. H. Zalawma & Rev. Vanlalzuata

(Revised & enlarged by Upa Lalramthanga)

4. Intermediate - Bu Hnihna - Rev. L.H. Rawsea 

(Revised & enlarged by Rev. Dr. C. Lalhlira)

5. Junior - Bu Hnihna Revised & Enlarged - Upa Dr. R.L. Thanmawia

6. Primary - Bu Hnihna Revised & Enlarged - Upa R. Lalmalsawma

7. Beginner - Bu Hnihna - Revd. Chuauthuama 

(Revised & enlarged by Zohmingthangi)

8. Masihi Sangati - Tirhkohte Thiltih - Rev. K. Lalhmingliana

9. Home Mission - Kohhran Chanchin - Rev. P.C. Pachhunga

Synod Education Board Committee:

Nov. 1 khan Mizoram Synod hnuaia Education Board an thukhawm a, member 50-ah 37 an kal thei. Synod Education Board meeting hi Synod Moderator Rev. Thangzauvan a kaihruai a, Pu Rozama Chawngthu, Board Secretary-in report a pe a. Synod Education Board-in a enkawl mek Synod H.S.S, P.C. Girls’ School leh Presbyterian School hrang hrangte chanchin bakah, tun hnaia Mizoram Sorkarin Deficit Mission School zirtirtute hlawh chungchangah Sixth Pay an hman ve theihna tur January ni 1, 2006 atanga fixation a siamsak chungchang thu report tel a ni. Meeting-ah  Agenda chhawpchhuah 12 an nei a, chung zingah chuan –

1. School din phal dilna

2. Presbyterian English School Sub –Committee din chungchang

3. Sorkar-in kohhran sikula thawktu a dah dan chungchang policy siam

4. Synod Higher Secondary School-a Digital Teaching Aids hman chungchang leh Synod Higher Seconday School tan Hall lian sak chungchang te a tel a ni.

Synod Pastoral Committee:
Oct. 31 khan nilengin Synod Office-a J.M. Lloyd Hall-ah Synod Pastoral Committee a thu a. Meeting hi Rev. Thangzauva, Moderator-in a kaihruai a, member 122-ah 107 an kal thei. Mizoram Synod hnuaiah hian Presbytery 50 a awm mek a, chung zinga 34 chu ram chhunga mi niin 16 chu ram pawna mi an ni. Ram pawn Presbytery 16 zingah hian 10 chu Pastoral hnuaia mi niin 6 chu Mission hnuaia mi an ni.
Minister/Pastor-te Pension kum chu 62 a nih tak avangin kum 2013 leh 2014 chhungin Minister/Pastor Pension-a chhuak tur an awm lo a ni. Tun tum Pastoral Committee thu ngaihtuah hi a vaiin 15 a ni. Chung zingah chuan Pro. Pastor lak zat tur tihchian te, Bial thar hawn, Presbytery then, kum 2013 Pastoral Ministry thupui tur thlan leh Synod Mission Board atanga thu lut 5-te chu a langsar leh pawimawh zualte an ni.

Sermon - LAL ISUA EN RAWH

LAL ISUA EN RAWH

Heb 12:2

Kan zinna khawvel tuipuiah hian buaina chhum chhah mupte hian min chim buai ve fo thin. Kan nun hi harsatna tawk lova a kal tluan lai chuan Lal Isua ena a hnena lawmthu sawi nachang kan hre viau va, nimahsela chhum chhah mup kan sut lai hian kan buai zo va, Isua en a har thin a ni. Vanduaina kan tawk a, chhungkua kan buai a, kan fate avangin kan rum a; chutiang chhum chhah mup hnuai atang chuan mahni kan inkhawngaihna mittui a parawl teuh va, Isua en a har ngawt mai. Pathian thuin miten min fuih a, keini erawh chuan, “A ni khawp mai, mahse, mihring kan ni miau mai a,” tiin, Isua en thei lovin chhum chhah mup chu kan en zawk thin.

Harsatna chhum chhah mup atang hian Isua hi hmuh sual a awl duh khawp mai. Zirtirte pawh kha Galili dilah tuifawn na tak mai an tuar a, hlauvin an khur a. Khawvar dawnin Isua chu anmahni thlamuan turin tui chungah a lo kal a, zirtirte chuan hmuithla emaw an lo ti a. Anmahni chhan tura lo kal Isua chu an hmu sual nasa kher mai. An hmuh sualna chhan chu manganna chhum hnuai atanga an thlir vang a ni. Lal Isua erawh chuan aw nem zaidam takin, “Thlamuang takin awm rawh u, keimah ka ni alawm,” a rawn ti dam dap mai a. Lusun manganna hnuai atangte hian chung lam thlir fiah a har a, lei lam kan hmu fiah thung a, min thlamuan tura Lal Isuan, “Keimah ka ni alawm,” tiin aw nem zaidam takin min be mah se, mittuiin min bual â zo va, kan mit a vai tlat thin a ni. Mi thenkhatte chuan kan chunga manganna lo thleng hi kan ngam lo tih hre reng chungin kan en ngawih ngawih a, kan bei a dawng zual thin. Lal Isua lam ensan ila, amah nen kan hmachhawn chuan tahna zan chu zing lawm hla a chang ngei ang.

Lalpa en ngawt mai hi hnehna a nihzia chu Mosia hova Israelten tuipui sen an kân thuah pawh khan kan hmu. Khatah khan mipuite chu an mangang hle tawh a, an hma lamah tuipui sen dai kai rual loh a awm a, an hnung lamah Pharaoa sipai an lo tlan tawh bawk si a, dolung leh tuboh inkara awm an ni tawh a. Mosia erawh chuan a hma lama tuipui sen leh a hnung lama sipaiho chu thlir lovin, a hma chiaha Pathian hnathawh lo lang tur chu a thlir zâwk a. A hote hnenah chuan, “Lalpa chhandamna, vawiina a thawhsak tur che u hi en ngawt mai rawh u,” a ti a. Mosia hian mipuite angin a hma lam leh a hnung lama hlauhawmte hi en reng ve sela chuan a hote nen chhiatna nasa tak an tawk ngei dawn a ni. Nimahsela Lalpa a en tlat avangin tuipui sen chu a kangchat ta ruah mai a, chutah chuan him takin an kal kai ta a. Pharaoa sipaite chuan tuipui an rawn luh veleh tui chu a infin leh chiah a, a len bo ta dial mai a. Keini hi zawng, kan hnung lama harsatna kan tawh atangin kan hma lama lo la thleng leh tur chenin kan hawi zau lutuk a, kan hma chiaha Pathian hnathawh lo lang tur kan en khum thin a ni.

Vawi khat chu Kohhran Upa pakhat hian Pastor hnenah, “Pastor, Upa ka nihna atang hian ka bâng mai teh ang,” a ti a. Pastor chuan, “Engtizia nge ni ta?” tiin a zawt a. Upa chuan, “Mipuite hian min sawisel neuh neuh reng mai a, min thlan hlim ang khan min fak tawh lo a ni,” a ti ngui raih a. Pastor chuan, “Chu, i hmaiah chil an chhak hial che em ni?” a ti a, Upa chuan, “Chil chu chhak em lo ve,” a ti a. Pastor chuan, “A nih leh i lu-ah hling lukhum khumtir an tum che em ni?” a ti a, Upa chuan, “Tum em lo ve,” a ti a. Pastor chuan, “A nih leh khenbeh an tum che em?” a ti a. Upa chuan, “ E, khenbeh te chu min han tum vaih teh se, lamtang pawh ka ngah ve mai, ka do let ve mai ang,” tiin a inhrosa ta a. Pastor chuan, “A ni maw, i zui Isua chu a hmelmaten a hmaiah chil an chhak khum a, a lu-ah hling lukhum an khumtir a, kraws-ah an khengbet a. Chuti chung chuan, ‘Ka pa, anni hi ngaidam rawh, an thiltih an hre lo a ni,’ tiin amah khengbettute tan a dilsak asin. Chuta tuartu Isua chu en ta che,” a ti a. Upa chuan, “Pastor, ka thiam lo a ni e, Kalvari tlang lam ka lo thlir khât deuh a nih chu,” tiin a thil tum chu a thulh leh ta a ni, an ti.

Rawngbawl hnaah harsatna kan tawh hian mahni kan inkhawngaihna mittui a tla fo thin. Isua en lovin mahni kan inen a, kan harsatna kan en a, kan rawngbawl hna hi bansan kan duh hial chang a awm fo mai. Chutih lai tak chuan kan zui Lal Isua hi en ila, a hmel chu chiang takin hmu ila, “Hling lukhum khum vangin ka hmangaih a che,” tiin hlimin kan zai thar leh thei ang.

Nau hualna inkhawm ah nausen 10 hual an ni

Nau hualna inkhawm ah nausen 10 hual an ni :

Dt. 28.10.2012 (Pathianni) khan Naupang Sunday School, Sakawrdai chuan Kohhran Sunday School Hallah Nau hualna inkhawm an nei. Naupang lam Superintendent Upa R.Lalfakzuala’n a inkhawm kaihruai in, a hnen atangin fuihna thuchah ngaihthlak a ni a, nausen te an lo seilen hnu a Sunday School tha taka kal tur leh an puitlin hnuah pawh Kohhran bel tlat tu an nih theih nan duhsakna a hlan a. Zirtirtu lam atangin fuihna thu ngaihthlak a ni bawk. Inkhawm banah refreshment, Squash leh Artui sem a ni bawk a ni. Nau hualna ah hian Nausen mi 10 hual an ni.