Editorial - Inpuih tawn

Inpuih tawn

Kohhran huan chhungah rawngbawlna chi hrang hrang kan nei a, kan chanvote kan hlen chhuah a, rawngbawlna nung tak leh thlarau lama hlawkna nei tur chuan Kohhran mite kan tan tlan a tul a ni. Mihring kan nun hona hrim hrim ah hian, mi dang tel lovin kan nung thei lova, chutiang chiah chuan Kohhran ah pawh hian kan chakna hnar chu kan rawngbawlpui te an ni thei a ni. Mihring rilru, chapona, initsikna leh sual, mihringin a pian ken kan dahbo a ngai a, kan mi ngaihsan loh zawng takte atang pawhin Pathianah chakna thar kan nei theiin, chung mite chu Pathianin a hmang thei a ni. Tin, Hun, chanvo nei tu turte, Mihring thlirna atanga tling lo tak takte pawh, Tawngtaia kan puih a ngai a, rawngbawlna huang chhungah chuan, an hun kal tawh atanga hmuh leh thlir hian Pathian lama chakna min petu a ni ngai lo. Famkim lo kan nih inhriain Pathianah chakna lain kan inpui tawn tur a ni.

KTP Inkhawm

KTP Inkhawm Programme :

Dt. 01/10/2012: (6:30 - 7:00 p.m)

Hruaitu : Tv H. Lallungmuana
Tantu : Tv. Joar Lalnunpuia
Thusawitu : Pu Lalbiaktluanga

Oct. thla chhung thawhlawm khawntu tur te :
1. Nl. Lalnghatzovi
2. Nl. Lalhriatpuii

Programme

KOHHRAN PROGRAMME :

Vawiin

-

30.9.2012Pathianni Chawhma: (9:45 - 10:15 a.m)

Sunday School

Zirlai 36-na : Pathian hnena thilhlan

Tantu : Pi Lalhmangaihi

Pathianni Chawhnu: (1:00 - 1:30 p.m)Hruaitu : P/P Ngurthanmawia Sailo
Thupui : Chhungkua a Pathian biak Sawitu : Pi Laldampuii

Pathianni Zan: (6:00 - 6:30 p.m) Hruaitu : P/P Ngurthanmawia Sailo
Thupui : Chhungkua a Rawngbawl Sawitu : Upa Lalsangzuala

................................................................................

Naupang S.S Programme

Pathianni Chawhma: Tantu : Ramdinmawia, Junior.
Thawhlawm khawntu turte:1. Lalchhanhimi 2. Lalrinhlui, Primary
Thawhlawm hlantu - Nl. Lalrinchhungi
Pathianni Chawhnu:Hruaitu : Pu HP Lalhnunliana

Tantu : Lalbiakveli

Sermon - Tleirawlte leh Thuawihna

TLEIRAWLTE LEH THUAWIHNA

(1Samuela 15 : 22-23, Hebrai 5 : 8-9)

Tunlai khawvela Tleirawlte nunin a mamawh ber te zing ami chu kan thupui, ‘Thuawihna’ hi a ni. Sual hnathawh avangin tleirawl tam tak rilruah helna leh luhlulna in hmun a khuar tlat avangin chhiatna khurah an tawlh lut mek ani. Kan Bible chuan helna leh luhlulna hi aiennna / dawithiamna leh milem biak tluk a sual ani tih min hrilh anih kha. Tunlai hian khawthlang ramah chuan Setana pawl hial an ding tawh a, chung Setanic Army inti ho chuan thupui atan, ‘I duh zawng apiang ti rawh’ tih hi an hmang a, thalai tam tak pawm nuam tih zawng tak anih avangin an pung chak hle awm e. Mahse he thupui hi Pathian thu kalh, mihring nun tichhetu anih avangin mi tam takin an chhiatpui mek ani.

Mi tam tak chuan thuhnudawn hauh lo leh mahni nuam tih zawngin an nun an hmang a, atawpah an inchhir leh thin. Tleirawl hunlai hian thil kan la thlir tawi thin avangin thuawih mai harsa kan ti fo, mahse Pathian thu anih avangin kan tan a tha ani. Pathian thu, nu leh pa te thu leh kan hotute thu kan awih loh hian tudangmahin an tuar lo va, keimahni ngeiin kan tuar thin. Pathian thuawih loh hi lungngaihna leh mittui tlakna a ni. Kawng lehlamah chuan thuawih hi hlimna leh malsawmna hnar ani a, Bible karah hian nupui, pasal leh kan mamawh tinreng lei theihna cheque a inzep a ni tih hriaiin thuawihna hmanga keu chhuah kan tum tur a ni.

Vanram kaina ani :

Keini kristiante beisei ropui ber leh kan chungnunna chhan chu, Pathianin he khawvel aia tha leh ropui zawk Vanram min buatsaih sak hi a ni. Chumi vanrama kai lo tur tan chuan kristian nihin awmzia a nei lo. Bible-in vanram kai tur a tihte chu - Pathian thu hre tam te, thusawi thiam te, ramhuai hnawtchhuak thei leh Pathian hminga thilmak tam tak ti thin te ni lovin, Pathian duhzawng ti thin- ‘Pathian THUAWIH’ te anni tih min hrilh tlat mai. Chuvangin Thuawih chu vanram kaina a nih chu.

Nghehna ani:

Lal Isua chuan Pathian thuawihte chu mifing, lungpui chunga in satu nen tehkhin tur ani a ti a. Ruahpui, thlipui leh tui lian pawhin a tihchhiat theih loh tur khawpa nghet an nih tur thu a sawi zui anih kha. Tunlai hunah hian tleirawlte nun rumthaihtu sualna hlauhawm pui pui a tam hle tawh a ni. Mipat hmeichhiatna (sex) thlipui a tleh nasa tawh hle mai, ruihhlo lah chu ruahpui vanawn ang maiin tleirawlte khawvelah a surin a sur ani ber tawh a. Heng sualna thlipui na tak lo hrang pawhin a chhem tluk zawh loh tleirawl huaisen ni tur leh chutiang hun a ding nghet thei tur chuan Pathian thuawih nih a ngai ani.

Hamthatna ani :

Tunlai khawvelah hmasawnna a chakin mahni hamthatna tur um in kan intlansiak nasa hle mai. Tawrhna leh hekna hlir emaw tiin mi tam takin Pathian thu kan awih tha ngam meuh tawh lo niin a lang. Mahse hetiang ngaihdan hi setana bumna ani tih kan hriat reng a tha. Hamthatna dawng turin setana chibaibuk kher a ngai miah lo. Bible chuan, "Pathian thu hriaa zawmte hi mi hamtha an ni zawk e" tih min hrilh ani. Isua kan zui avanga kan tawrh tur leh chan tur awm bawk mahse, kan Pathian hian a thu awihte hi a ngaihsakin mal a sawm ve thin a. A ram leh a felna zawng hmasa ngamte tan phei chuan pek belhchhah a tiam ani.

Damreina ani :

Thuawih hi dam reina ani tih kan Pathian thu chuan min hrilh. Tunlai huna tleirawl leh thalai thenkhat an thih hma nachhan hi thuawih loh vang niin alang. Pathian leh nu leh pa te duh loh zawng ei leh in, zuk leh hmuam kan tih luih thin avang te, min duhpui loh kan kawl luih tlat thin avang te, an phal lohna hmuna kan awm luih thin avang te in mithenkhat chuan an dam rei loh phah a ni. Keini kristian tleirawlte chuan damreina ani tih hria in thuawih i zir zel ang u.

Thuawih lo turin i lian tawk em? I luhlul thin a, thuawih hi harsa i ti thin anih chuan a hnung kan zui kan Lal Isua hi ngaihtuah teh. Lei leh van a roreltu, engkim siamtu leh neitu kan Lalpa chu, "Fapa meuh pawh ni mah sela a thil tuarahte chuan thu awih a zir ta a ni; tichuan tihthatfamkima lo awmin, a thu awih zawng zawngte tan chatuana chhandamna bulpui a lo ni ta." Pathian Fapa meuh pawhin, "..keia thu ni lovin nangma thu thu ni zawk rawh se," a ti thei anih chuan, keini engmah chhuan tur pawh nei lo, misual chhandamte hian thuawih hi a bata kan bat ani tih hi i hre thar leh ang u. Thuawih lo tur khawp hian kan lian tawk hauh lo a nia! Engkimah thuawih hi i zir zel ang u.

Kan dam tlang em?

Ö

*Þ

Nl. R Lalnunkimi, a hna(Pharmacist) a dahngheh chu Sakawrdai CHC vekah Post a ni a, thil tulte ti felin Aizawlah a thang mek a ni.

Ö

*Þ Kan member Nl. Saizampuii D/o Laldinpuii chu MZP Inter High School Quize 2012 neih zawh takah, Rose Bud School hminga lawmman pahnihna an la thei hi kan chhuangin KTPAW chuan a lawmpui tak zet a ni.

Ö

*Þ KTP AW Jt. Editor Pu HD Lalthanzuala pu Upa Niropuia, Ratu Kohhran Upa chu Dt. 23.9.12 khan Stroke vangin a boral a, ani hi Hmarphei Presbytery Moderator lo ni tawh a ni. KTP AW chuan a tawrhpui tak zet a, Lusun chhungkua te Pathianin thlamuanin awmpui zel rawh se.

Ö

*Þ Rev. Dr. Hmingthansanga Bialtu Pastor, chhungkaw lam damlohna avanga Aizawla zin chu Zirtawpin khan a rawn haw leh ta.

Ö*Þ Dt. 29.9.2012 (Inrinni) khan Kohhran Committee chuan Sunday School Hall-ah thlatawp Committee an nei.

Tunkar Damdawi In

Tunkar Zirtawpni thleng khan CHC ah mi 9 admit an ni a. kan Kohhran chhungkua atangin admit an awm lova, tun dinhmunah mi 7 enkawl mek an ni a, naupiang 3 a awm. Office thil pawimawha zin, Dr. Shahnaz Zothanzami Medical Officer leh Dr Shamim P Zohmingthanga Dental Surgeon te chu an la rawn chho rih lo. Tunlai hian naupang damlo an tam hle a ni.

Lawrkhawm

2nd Term Exam tan dawn:

Govt. Tusualral High School te chuan Dt. 3.10.2012 hian 2nd Term Exam an nei dawn a, Building indaih lohna a vangin, chawhma lamah Cl-IX ten exam neiin, chawhnu lamah Cl-X ten exam an nei thin ang.

NLUP Dawng turte:

Sakawrdai khaw chhungah NLUP dawngtura thlan chhuah, mi 129 te chuan Ratu MRB ah Bank account an hawng mek a, Bank lam hian Ni khatah mi 20 vel bak account an tihfel sak thei lova, tunlai hian Bank account buaipuiin khaw hrang hrang atangin bank dawr an tam thei hle.

HSLC Exam Hall sak belh.: HSLC Exam Centre, Govt. Tuisualral High School, Sakawrdai chu Exam tur naupangte an len dawn loh avangin Building sak belh a ni dawn. Exam tur naupang hi 160 vel an ni dawn tih thudawnna chuan a sawi a, building sak belhna hi VC leh VMC te bultum niin 68’x24’ a lian sak tum a ni a, Dt. 28.9.2012 khan a ban chhun tan a ni. Exam beitu tur naupang te hmakhua ngai a VC leh VMC ten hma an la hi a fakawm hle. Building hi Hostel tlang, ah sak a ni a, Dawhkan siamna senso hi SHDC in an tum dawn a, Thutthleng siamna erawh MLA Fund atanga tum sak tura beisei a ni.

Kawng siam mek a ni.: PWD te chuan Khaw chhung inkal pawhna leh Zohmun kawng an siam tha mek. kawng siam hna hi Pu Hmaa JE in vilin, Pu Rintluanga leh Pu Hmangaiha te inkar chu Black Top tur a hmalak mek a ni.

Rawngbawlna lam

S.S Naupang ten an lawmman lak an lawm

Dt. 23 Sept Pathianni chawhma inkhawm ban khan kan Kohhran Naupang Sunday School chuan Sunday School Hall-ah, Naupang Inkhawmpui-a lawmman pakhatna an lak chu, lawmna programme siamin hlim takin hun an hmang. Lawmna inkhawm hi Upa R.Lalfakzuala, Superintendent in a kaihruai a, Pu HP Lalhnunliana’n ‘Thuawihna’ tih thupui hmangin Pathian thuchah sawina hun a hmang a, Naupangte leh zirtirtute atangin items hrang hrang Solo, Recitation, Duet, Group singing etc. te neiin hun hlimawm tak an hmang a ni. Inkhawm ban hian refreshment, Artui leh Squash tuihnai tak sem a ni bawk.

Beihrual ‘Kristian Chhungkaw Hapta’.....

Kum 94-na Beihrual ‘Kristian Chhungkaw Hapta’ chu tunkar chhung khan Mizoram Synod hnuaia Kohhran hrang hrang te chuan Biak Inah hun an hmang mek a. Kan Kohhran ah pawh tun kar chhung khan tluang taka hun hman a ni. Vawiin ni 30 Sept Pathianni hi ‘Kristian Chhungkaw Ni’ a ni a, hemi puala inkhawmna leh Beihrual kharna hun Pathianni chawhnu ah ‘Chhungkua a Pathian Biak’ tih thupui hmangin Pi Laldampuii hnen atangin Pathian thuchah ngaihthlak a ni ang a, zan ah ‘Chhungkua a rawngbawl’ tih thupui hmangin Upa Lalsangzuala hnen atangin ngaihthlak a ni bawk ang. Buaina leh harsatna awm lova Beihrual programme tluang taka hmang thei tura min kaihruaitu Pathian hnenah lawmthu i sawi mawlh mawlh ang u.

Bial Zaipawl ten zaia rawngbawlna nei mek

Dt. 28-30 Sept chhung hian Sakawrdai Pastor Bial Zaipawl te chuan Khawpuar Kohhran ah Pathian fakna hla hmanga rawngbawlna hun an hmang mek a, mimal tin ten Pathian hruaina leh Thlarauthianghlim pawlna duhawm tak an chan theih nan i tawngtai pui ang u. Bial zaipawl te hian Dt. 11-14 October 2012 Hmarphei Presbytery, Darlawn Venghlun Kohhrana neih turah Pathian fakna hla pathum an hlan dawn bawk a ni.

SMTC-in Computer Application zirzo thlah

Synod Multipurpose Training Centre (SMTC) chuan September 25 (Thawhlehni) khan SMTC Lecture Hall, Mission Vengthlang-ah Certificate in Computer Application Course batch 10-na zir chhuakte thlahna inkhawm an hmang a, Synod Executive Secretary Rev. Lalzuithanga i/c. SMTC chu Khuallian a ni. SMTC Programme Director Rev. F. Lalrinnunga’n inkhawm kaihruaiin SMTC Office Assistant Upa Vanlalhuma’n report a pe a, khuallian Rev. Lalzuithanga’n zir chhuakte hnenah Certificates leh lawmman semin thu a sawi. Zir chhuakte aiawhin Lalruatfela’n thu a sawi a, Pu Eliza Lalrinawma a zai bawk.

SMTC Computer zirna hi Council for World Mission (CWM) Mission Programme Support Fund hmanga kalpui a ni a. October 15, 2007 khan Computer zirna hi hawn a ni a, course khat zir hun chhung hi thla 6 zel a ni. Zirna atan hian Registration Fee

R 100/- leh monthly fee R 50/- lak a ni a. Tluang taka zir chhuakte hnenah incentive cash prize R 1,200/- zel pek thin a ni bawk. Tun tuma SMTC Computer course batch 10-na zirchhuakte hi mi 20 an ni a, zir chhuak thei ta lo mi 10 an awm bawk. Computer Course zirna hawn a nih atang khan mi 201-in an zir chhuak tawh a ni.

Grace Home Community Care Centre

Kumin (2012) a Chhawmdawlna Pual thawhlawm lakkhawm hmanna tur Central KTP Committee-in ngaihtuahin hmalakna pakhat atan Durtlang Hospital-a Grace Home Community Care Centre-a thawktu an indaih loh avangin thla khata

R 3,000/- hlawh tur Cook pakhat rawih sak nise, tiin a rel a, hei hi bawhzui thuai a ni ang. Central KTP hian kumin KTP Day (February 22, 2012) khan Grace Home tanpui nan R 2,26,500/- (Cheng Nuai hnih sing hnih sangruk leh zanga) an lo hlan tawh bawk a ni.

PRESCOM Annual Meeting

October 5 (Zirtawpni) hian PRESCOM Staff Welfare-ten kum tina an tih thin angin Annual Meeting an hmang dawn a, hemi ni hian Synod Press leh Aizawl khawpui chhunga Synod Bookroom-te dawr theih an ni lo ang.

Krismas&Kumthar Budget lam i hawi ang u

Kan hriat angin October thla kan kai chho leh tawh mai dawn a, kan inrin hmain Krismas rim a rawn nam chho ve leh ta. Hun rei a ni ta lo. Kohhran chhungkua te kan awlsam zawkna beiseia, kum bul atanga Krismas & Kumthar Ruai Committee in Budget siam chu tunah hian khawn mek zel a ni a. Chhungtin ten thahnem ngai takin budget pek tlak hma lamah tan ila tlang ang u. Ran leh mamawh ngaihtuah awlsam zawk nan leh duhthusam zawka hma lak theih nan thawhlawm i pe thuai thuai ang u. Hmanhmawh lo tak leh muang taka kan awm mek lai hian, hunin min rawn nang ching leh ang a, a tawpah phunnawina leh buarchuar taka thiltih a awm loh nan chhungtinte tan i la tlang theuh ang u.