Rawngbawlna lam

Bial Naupang S.S & Senior inkhawmpui..
Dt. 8-9 Sept chhung khan Sakawrdai Kohhran Biak Inah Sakawrdai Pastor Bial Naupang Sunday School (Begin-Junior) Inkhawmpui chu tluang taka hman a ni. Inkhawmpui ah hian Kohhran 7 atangin an tel thei a. Intihsiakna a pumpuia tithate: 1st  - Sakawrdai, 2nd - Vaitin, 3rd - Sakawrdai Chhimveng te an ni. Kum 2013 Sakawrdai Pastor Bial Naupang Sunday School Inkhawmpui chu Vaitin Vengthar Kohhran ah nghah a ni bawk.
Dt. 15-16 Sept chhung hian Sakawrdai Chhimveng Kohhran Biak Inah Inter, Sac & Senior Inkhawmpui hman mek a ni a. Vawiin Pathianni Chawhma leh chawhnu inkhawmah intihsiakna neih a ni ang a. Pathianni zanah lawmman sem a ni anga. P/P Ngurthanmawia Sailo hnen atangin Pathian thuchah ngaihthlak a ni bawk ang.

Beihrual Fehchhuah hman mek zel a ni....
September 10 - 23 chhungin Beihrual Fehchhuah Hapta hman mek a ni a, Thawhtanni zan khan KTP Fehchhuah - Pu Lalrintluanga Inah hman a ni a, member 14 an kal. Kohhran Hmeichhia Fehchhuah - Pu Lalthasanga Inah neih a ni a, member 13 an kal thei bawk a ni. Fehchhuah ah hian Pathian thuchah ngaihthlak niin, tawngtairualna hun hman a ni bawk. Kohhran Fehchhuah Ningani / zirtawpni zan chu Upa bial then 4-ah Chhungkaw lama harsatna neite tlawhna hun atan hman a ni.


Krismas&Kumthar Budget i pe zel ang u..
Kohhran chhungkua te kan awlsam zawkna beiseia, kum bul atanga Krismas & Kumthar Ruai Committee in Budget siam chu tunah hian khawn mek zel a ni a. Krismas dawna buai chuk chuk lova, kan awlsam tlan zawk theih nan Chhungtin ten tlem tlemin i pe zel ang u. Budget kan pek tlak hma poh leh keimahni lam chauh nilo, A buaipuitu lam tan pawh hma lak a awlsam phah thin a ni tih hriain. Tlai khaw hnu a hmanhmawh taka thil ngaihtuah emaw rel chawpchilh lutuk a awm loh nan Budget pek hma lamah hian tan ila leh zual ang u.


Aizawl Theological College (ATC) News
w September 5 (Nilaini) a Synod Theological Education Board (TEB) meeting chuan ATC Associate Professor 2, Rev. Dr. C. Lalhlira (Vice Principal) leh Rev. Dr. Vanlalnghaka Ralte (Registrar) te chu Professor-ah a hlangkai.
w ATC  Zirlai (B.D./M.Th.) te chuan Sept. 17-28 chhungin First Semester Exam an nei dawn a. Exam zawh hian Presbytery Inkhawmpui hmangin mi 2/3 te tea inthenin hmun hrang hrangah an kal darh ang.
w ATC-a Pathian thu zirna course hrang hrang zir turin dilna hawn a ni leh ta a, ATC office-ah ngaihven theih a ni.


Puitling S.S. Zirlai tihdikna
Puitling Sunday School Zirlai 33-naa hrilhfiahna tlar 4-naa Mosian tih kha ‘Joshuan’ tih tur a ni a, mi sawm leh pahnih tih kha ‘mi pahnih’ tih zawk tur a ni.

NILAI THUPUI TIHDIKNA: 
Kum 2012 Nilai zan leh Beihrual Thupui Bu-ah NEICC puala Tawngtai Ni kha October 28 tiin ziak palh a ni a, October 21 tih zawk tur a ni.

Synod Bu 2011 peih fel a ni ta 
Synod Bu 2011 chu peih fel a ni ta a, Synod Office Mamawh lamna hmun atangin Kohhran/Bial copy tur a lakleh theih ta.

Synod Mission Board
September 10 - 21 chhung hian Field Committee leh Barak Area Committee neih mek a ni a, committee neihpui tur hian Rev. Lalzuithanga, Executive Secretary; Rev. K. Lalhmuchhuaka, BEC Member leh Upa Vanlalchhunga, BEC Member-te an kal. September 11 (Thawhtanni) khan Barak Area Committee, Silchar-ah an thu a, (Sept. 14) zirtawpni khan Arunachal West Field Committee, Itanagar-ah an thu leh a, September 17 (Thawhlehni) ah Arunachal East Field Committee, Khasan-ah an thu ang a, September 19 (Nilaini) ah Assam Field Committee, Guwahati-ah an thu leh dawn a ni.

Campus Ministry leh Zirna In hotute inkawm
Sept. 12 khan Synod Conference Centre, Mission Veng-ah Aizawl khawpui chhunga Zirna in hrang hrang : High School, Higher Secondary School, College leh Institution danga Headmaster & Principal-te leh Synod Campus Ministry hruaitute chu zirlaite nun kaihhruaina kawnga campus ministry hmalakna leh thawhho dan tur chungchang sawihona neih a ni. He inkawmhona ah hian Dr. Robert S. Halliday, Campus Ministry Committee Member buatsaih “Concept Paper” chu zirho a ni a, mi 117 an tel a ni.  Synod Campus Ministry hi kum 1989 Synod Inkhawmpui thurel bawhzuia din a ni a, tunah hian Synod Office-ah Department pakhat niin zirna in hrang hrangah zirlaite Pathian thu lama kaihhruaina leh mimal nuna harsatna su kiang tura rawngbawlna neiin a thawk mek a ni.

Programme

KTP  BEIHRUAL FEHCHHUAH
Programme :

Dt. 17/09/2012: (Thawhtan zan) 7:00 p.m
A hmun : Pu Zokhawsanga In
Hruaitu : Tv. Laltanpuia
Tantu : Pu HD Lalthanzuala
Thusawitu : Pastor Hmingthansanga
Tawngtairual hun hman a ni bawk ang.

Sermon - LAL ISUA THAWHLEHNA PAWIMAWHNA

LAL ISUA THAWHLEHNA PAWIMAWHNA

(I Kor. 15:12-15)

Lal Isua mitthi zing ata a thawhleh thu hi Krtistian intite zingah pawh  ring miah lo tam tak an awm a. Ring ve tho si, a pawimawhna hre lem lo  tam tak an awm bawk. Mi thenkhatte chuan Isua thihna hi chu an  pawm a, a thawh lehna hi chu thil awm phung pangngai a nih loh avangin pawm harsa an ti thin. Hetiang mite hian dan naranin Bible-a thilmak ang chi reng reng hi a mak lo zawng, thil awmphung pangngai, sawi hluhlan angin an pawm deuh ber a. Isua pianna thuah pawh, mipa tel lova Mari hrin tih angte hi an pawm thei lo thin. 

Bible a kan hmuh angin, Tirhkoh Pawla chuan he rindan dik lo hi nasa takin a lo hnial tawh a. “Krista thu, mitthi zing ata kaihthawhin a awm tih kan hril si chuan, engtizia nge in zinga thenkhatin, ‘mitthi thawhlehna reng reng a awm lo’ in tih ni? Mitthi thawhlehna reng reng a awm si loh chuan, Krista pawh kha kaihthawhin a awm lo vang; Krista kha kaihthawhin a awm loh chuan kan thuhril hi engmah lo a ni ang a, in rin pawh engmah lo a ni ang..” a ti a ni.

1. Bible dikzia tifiahtu a ni: Bible hi Pathian inpuanna thu lak khawm a ni a. Pathian thawkkhum a ni a, a nung a, a dik lo thei lo va, thlarau nunah thuneihna vawrtawp a nei a ni. Lal Isua thawhleh thu Tirhkohten an puan chhuah thin khan, Thuthlung Hluia Pathian mite lo sawi lawk ang zelin Isua chungah thil a lo thleng a ni an ti a, mitthi zing ata a thawhleh thu pawh hi, Thuthlung Hluiah an lo ziak teuh mai a ni tih an tarlang thin. Pentecos nia Petera thusawite khan hei hi a tichiang hle a ni. Bible thua innghat Kristiante chuan Isua thawhleh thu hi a ring lo thei lo a ni.

2. Pathian Fapa ngei, khawvel Chhandamtu tling A nihzia tifiahtu a ni: Pawlan, ‘mitthi zing ata a thawhlehna chuan Pathian Fapa a nih nasa takin a hriattir a’ a ti a. Amah Isua ngei khan, mantira a awm tur thu te, a thih tur thu te, ni thum niah a thawhleh tur thu te a lo sawi lawk diam tawh bawk. Isua a thawhleh chiah khan a nihna tak tak chu a lo lang fiah ta ngei a. Ama insawi ang chiahin a lo thleng ta a ni. Sakhaw dang zuitute leh mithiamte zingah pawh, Isua kha mihring pangngai, sakhaw mi ril tak, zawlnei ropui tak,  zirtirna tha tak tak puang chhuaktu, sakhaw thar rawn dintu mai anga ngai tam tak an awm a. He rindan hi a dik lo a ni tih chu Isua thawhlehna hian a rawn  thai  lang a ni. Pathian tak ngei, mihringa lo chang, thia tholeh ngei a ni tih a rawn tifiah  a ni. He thawhlehna thu, Kristiante thurin pawimawh tak hi Kristianna danglam bik zia tichiangtu a lo ni ta a ni.

3. Isua rin awmzia sawifiahna a ni: Kristian thurin hi thurin rinna a ni mai lo va, Isua zirtir thu ngaihsanna tihna mai pawh a ni lo. Amah Isua, mi mal taka rinna a ni. Sakhaw dangah chuan sakhaw hmuchhuaktute zirtir dan chu a zuituten an ngaihsan leh an zui chhan a ni a. Kristiannaah erawh chuan a hmuchhuaktu mimal rinnaah a innghat thung a ni. Isuan, ‘Keimah hi kawng leh thutak leh nunna chu ka ni’ a ti a. Isuan a zirtirna kha kawng leh thutak leh nuna a ti lo va, AMAH kha a ni a intih chu. Isua vekin, ‘tupawh mi ring chuan chatuana nunna a nei tawh’a ti bawk. Tirhkoh Pawla chuan Isua thawhlehna hi a tak tak a nih loh chuan, a Chanchin Tha puan chu dawt thu mai a ni ang a ti a. A tak tak a nih avang chauhin  he Chanchin tha hi  a nung a, a zahpui lo va, chhandamna tura Pathian thiltihtheihna a ni tih a chiang a ni.

4. Sual thiltihtheihna hnehna famkim a ni: Lal Isuan a thiha a thawhleh tur sawi lawkin, ‘Khawvelah hian hrehawm takin in awm thin, nimahsela thlamuang takin awm rawh u, keiin khawvel ka ngam ta’ a ti a. Tin, ‘Hlau suh ang che, kei Hmasabera leh Hnuhnungbera leh Mi nunga chu a ni, ka thi a, nimahsela ngaiteh, kumkhua atan ka nung leh ta a ni, Thihna leh Mitthi Khaw chahbite ka nei bawk a’ tih kan hmu bawk. Sual anchhia leh a tur chu thlarau leh taksa thihna a ni a. He thihna thuah hnih hi Isua thihna leh thawhlehnaah hian hnehin a awm a. Isua ringtute chuan chu hnehna chu Isua zarah liau liau kan tawmpui ta a ni. Hmeichhe thlah leh rul thlah indo tur thu leh, rul lu vuak thitlin tur thu a sawi kha, Isua thihna leh thawhlehnaah hian a lo lang famkim ta a. Hei tak hi ringtute chanvo ropui tak chu a ni. Sual tur chu hnehin a awm a, sual thiltihtheihna Setana chu hnehin a awm ta bawk. A va ropui em!

Lal  Isua thawhlehna changtute chuan Chhandamtu nung Isua kan nei a, a hnehna tawmpuiin hnehna nun kan lo nei ve thei ta a. Hei hi Kristian thurin laimu a ni a. Kan Chanchin Tha puan chhuah laimu chu a ni.  Hetiang Chhandamtu nung kan neih avang hian khawvel kan hnehin kan ngam ve thei ta a ni. Amen.

Bial Naupang S.S inkhawmpui tluang takin

Bial Naupang S.S inkhawmpui tluang takin

Dt. 8-9 Sept chhung khan Sakawrdai Kohhran Biak Inah Sakawrdai Pastor Bial Naupang Sunday School (Begin-Junior) Inkhawmpui chu tluang taka hman a ni. Inkhawmpui ah hian Kohhran 7 atangin an tel thei a. Intihsiakna a pumpuia titha zual te:-

1st - Sakawrdai Kohhran

2nd - Vaitin Kohhran

3rd - Sakawrdai Chhimveng Kohhran

Kum 2013 Sakawrdai Pastor Bial Naupang Sunday School Inkhawmpui chu Vaitin Vengthar Kohhran ah nghah a ni.

Pathianni Zan Inkhawm

Junior Combine Zaipawl