Editorial - Inpumpekna

INPUMPEKNA

Mihring hian kan thiltihna kawng apiangah, hlawhtlinna hmu tur leh  mite entawn tlaka, mahni kawng theuha lang tur chuan, inpumpekna hi a ngai hle, a khaitu bul a tih theih ang. Rawngbawlna ah pawh hian inpumpek a, mahni chanpual a lum hmachhawntu chu, mi tui hnang leh mi nghet, ringtu zia putu a ni thin a ni. Khawvel intlansiakna chi hrang hrang, zirna leh eizawnna kawng hrangah pawh hian, mi hlawhtling chu mi taima, mahni chanpual hlentu an ni thin. An chanpuala lum, a harsat lai ber pawha tha thlahlotu, an chanvo tha tur a bei tang tang mi chu mi inpe an ni thin.  tui chang nei leh phur chang nei a thiltih hi, mahni zui leh chanpual laka rinawm lo leh hlen chhuah duh tak tak ze pu an ni ngai lo. Thawhrimna hian tuarna a keng tel tlat a, chu tuarna rih zawng leh a phurtu erawh an dang thin. Rawngbawlna kawngah pawh hian harsatna chi hrang lo awm hian ze nghet leh nghet lo a ti lang a,harsatna kan tih hi, a hmachhawntu a zirin a dang a, thenkhat tan a, thil nep tak pawh, a hmachhawntu tan chuan rit tak pawh a ni thei. He harsatna  hmachhawntu chuan a inpumpekna hmangin hnehna a chang a, mi inpe chuan a inpekna rah chu a hmu nge nge thin a ni. 

Hnaruak dil theih

HNARUAK  Dil  theih

Sakawrdai CHC Bial a thawk tur, ASHA Motivator hna a ruak a, Hmeichhia Matric Passed chin tan, a hnuaia hming ziak hnenah, Ni 12 Dec.(Nilaini) thleng dilna thehluh theih a ni. Hlawh chu R 4000/-p.m (Including T.A) a ni ang. He hna hi Thla ruk chhung atan a  tih a ni.

                       Sd/-

Dr. SHAHNAZ ZOTHANZAMI

Medical Officer, Sakawrdai CHC/MC

Hmeichhe Inkhawm

Kohhran Hmeichhia Programme :
Dt. 11/12/2012: (5:30 - 6:00 p.m) 
Hruaitu : Pi Sumneihzovi
Tantu : Pi Lalroluti
Thusawitu : Pi Lalneihthangi

KTP Inkhawm

KTP  Inkhawm  Programme :
Dt. 10/12/2012: (5:30 - 6:00 p.m) 
Hruaitu : Tv. Laltanpuia
Tantu : Nl. Lalrinchhungi
Thusawitu : Tv. H. Lallungmuana

Programme

KOHHRAN  PROGRAMME :

Vawiin- 09.12.2012
Pathianni Chawhma: (10:00 - 10:30 a.m)
Sunday School
Zirlai 45-na : Tualthah avanga hremna dan
Tantu : Pi Tuahtlingi
Pathianni Chawhnu: (1:00 - 1:30 p.m)
Hruaitu : Upa Raltawnphunga
Thusawitu : Pu HP Lalhnunliana
Pathianni Zan:  (5:30 - 6:00 p.m) 
Hruaitu : Upa Raltawnphunga
Thu sawitu : T.Upa Zothangkhuma

Naupang S.S Programme
Pathianni Chawhma:
Tantu : Irine Malsawmthangi
Thawhlawm khawntu turte:
 1. Salemmawii 2. Ruthi Lalrinpuii
Thawhlawm hlantu - Pi Lalbiakliani
Pathianni Chawhnu:
Tantu : Lalhmachhuani
Hruaitu : Pu Lallungkhama
Thusawitu : Pu Lallawmawma

Kan dam tlang em?

=> Nov. 2,2012 (Pathianni) chawhma inkhawm ban khan Kohhran Sunday School Hall-ah Branch KTP Committee neih a ni.

=> Nov. 2,2012 (Pathianni) zan Bible Sunday pual inkhawmah BSI Life&Patron member thar te Certificate hlanna neih a ni.

=> Remchan zawkna avangin Pathian Ram thawhlawm chu kar leh Dec 16 ah lakkhawm a ni ang.

=> Synod Inkhawmpui Vawi 89-na, Chanmari Kohhran a neih mekah Upa Hrangkhupa Biate, Upa Lalramhluna, P/P Ngurthanmawia Sailo leh Pastor Hmingthansanga te an tel.

Tun kar Damdawi In

Tunkar CHC ah mi   7 admit thar an ni a. Tun dinhmunah mi 2 enkawl an ni. Kan Kohhran chhungkua atangin damlo  enkawl an awm lo. Naupiang 2 an awm a, Dr Shahnaz Zothanzami MO, Training  a hun engemaw chen thang tawh chu Zirtawpni khan a rawn chho leh ta a, CHC in a dawn Gypsy a rawn hawn chho bawk. Dr. Shalom-i,  AYUSH pawh kar leh lam khian rawn theih a ni tawh ang.

Lawrkhawm

Bethesda Camping: Kan Unau EFCI Kohhran chuan Rev. Lalnghaksanga, Evangelist at Large, Speaker-ah hmangin Bethesda Camping a buatsaih mek a, Chhawng khatna ah hian Campers 60 vel an ni a, Dec. 10 (Thawhtanni) ah chhawng hnihna tan leh a ni ang. Hemi zawh hian Sunhluchhip lamah Camping buatsaih turin an kal leh ang.

Advance Krismas: Govt. Tuisualral High School chuan Ni 7 Dec. (Zirtawpni) zan khan Commnity Hall-ah Advance Krismas hlimawm tak an hmang. He hunah hian Zirlai naupang tanpui ngai nia an hriat te puala vehbur khawnin, Tv. Lalremthanga S/o Thangkunga (L) leh Tv. Hmingtharmawia G/o Khumte Hmar te hnenah R 810/- ve ve in an hlan.

Pro Pastor lak thar: Hmarphei Presbytery atanga Synod-in Pro Pastor a lak thar Tv. H.D Ramngaihawma,M.A., B.D. Ratu khua chu Lawngtlai Chanmari ah a awm anga, Tv. Lalrinmawia Hmar, B.A., B.D. Sakawrdai Chhimveng chu Lungdai ah a awm thung ang.

2013 Synod Board/Committee thut hun ruatna

Kum 2013 Synod Board/Committee thut hun hetiang hian ruat a ni:

Feb.12:Synod Mission Board Committeee, Feb.14:Synod Finance Committee, Feb.26-28: Synod Executive Committee, April 30:Synod Mission Board Committee, May 1: PRESCOM Board Committee, May 7: Synod Pastoral Committee, May 9:Synod Social Front Committee, May 22-23: Synod Finance Committee, June 4-6: Synod Executive Committee, Sept.5: Synod Finance Committee, Oct.21: PPF Board Committee, Oct.22: PRESCOM Board Committee, Oct.23: Sunday School Committee, Oct.24–25: Synod Mission Board Committee, Oct.28: Synod Theological EducationBoard Committee, Oct.29: Synod Hospital Board Committee, Oct. 30: Synod Pastoral Committee, Oct. 31: Synod Education Board Committee, Nov.1: SL&PB Committee, Nov.5: Synod Social Front Committee, Nov.6: Synod Music Committee, Nov.12-14: Synod Executive Committee, Nov.19-21: Synod Finance Committee

2013 - 2016 Synod Inkhawmpui thlengtu turte:

Kum 2013 : Ramhlun North Bialin Ramhlun North Kohhranah

Kum 2014 : Mission Vengthlang Bialin Mission Vengthlang Kohhranah

Kum 2015 : Tuikual Bialin Tuikual Kohhranah          

Kum 2016 : Durtlang Bialin Durtlang Kohhranah 

Rawngbawlna lam

KTP Group Budget hlanna neih a ni...

Dec. 3. (Thawhtanni) zan khan Sakawrdai Branch KTP Group Budget lakkhawm/ hlanna neih a ni a, Tun tuma Budget lakkhawm hi  R. 10125/- a ni. Group Budget lakkhawmte hi Upa Lalsangzuala, ex- officio in Pathian hnenah a hlan a, Upa Raltawnphunga, ex-officio hnen atangin Pathian thuchah ngaihthlak a ni bawk. Secretary report, Group Report & Finance report ngaihthlak a nih mai bakah, Items 3 - Nl. Salemmawii, Nl. Gospel Ramkinlovi leh Tv. J.Zothansanga hnen atangin Pathian fakna hla (Solo) ngaihthlak a ni a, Inkhawm banah Thingpui ruai buatsaih a ni bawk. KTP hi Group 3, Matthaia, Marka, Luka Group ah then a ni a, Group tin te kum khat atan R. 7000/- Budget an ni. Kum chanve, June thla khan R. 7180/- Budget lakkhawm alo ni tawh bawk. Group Budget tlingkhawm hi avaiin, R. 17305/- a ni ta a ni.

Hnuchham pual Krismas Carol nei dawn...
Dec. 2 (Pathianni) chawhma inkhawm bana Branch KTP Committee chuan Riangvai/ hnuchham te tanpuina atan Krismas Carol neih ni se tiin a rel a, a hun atan Dec. 22 (Inrinni) zan ruat a ni. Inrinni zan dar 8:00 pm ah Kohhran Sunday School Hall-ah kalkhawm tur a ni a. Hunserh te hman zawhah chhuak in, Kohhran Chhungkua In tin tlawhin Carol hi neih tur a ni.

SYNOD Inkhawmpui Vawi 89-na hmang mek

Synod Inkhawmpui vawi 89-na chu Dec. 4 atang khan Chanmari Kohhran Biak Inah neih tan a ni a, Dec.6 thlenga Palai in report tawh chu 1857 an ni. Presbytery pathum - Ramlai, Hmarphei leh Karbi Anglong atang tein Palai an kal kim.Kum 2012 chhunga Synod Puipa turte hetiang hian ruat an ni- Moderator : Rev. Lalramliana Pachuau, Secretaries : Rev. H. Lalrinmawia(Sr.), Upa H. Zoliana(Jr.), Finance Officers : Rev. Lalzuithanga. Rev. Dr. R. Lalbiakmawia. Statistician : Rev. K. Lalthangmawia. Executive Secretaries : Rev. Vanlalzuata, Rev. P.C. Pachhunga. Moderator Elect : Rev. K. Lalhmuchhuaka.

Mizoram Presbyterian Kohhran dinhmun tlangpui chu hetiang hi a ni - Presbytery 50, Pastor Bial 277, Kohhran 1183, Minister/Pastor 480, Pro Pastor 50, Kohhran Upa 4784, Pem Upa 394, Dan zawh kim zat 389814, Chhungkua 124015, Nau piang 9164 leh Mitthi 2813.

Dec. 8 (Inrinni) thleng khan chhun lamah Inkhawmpui Rorel neih thin a ni . Inrinni zanah Rev. Dr. C. Chawnghminglianan thlarau lam thupui ‘A ram leh a felna zawn hmasak’ (Matt. 6:33) hmangin Pathian Thuchah a sawi. Pathianni chawhmaah Pastor nemngheh leh Pro. Pastor dahngheh inkhawm neih a ni ang a, chawhnu inkhawmah Moderator thar Rev. Lalramliana Pachuau in Lapa Zanriah Sakramen a theh ang. Zan inkhawmah Moderator kal chhuak Rev. Thangzauvan Valedictory Sermon a sawi ang.

Kum 2013 Synod Inkhawmpui chu 27th Nov. - 8th Dec. 2013 chhungin Ramhlun North Bialin Ramhlun North Biak In-ah an thleng ang. Thlarau lam Thupui : “Pathian nena len dun”Mika 6:8. Sawitu: Rev. Dr. Roger Gaikwad a ni ang.

Synod 2012 Rorel (thu passed) langsar zualte

# 'Synod Account Branch-ah hian tawhsual tawhlaka kan him theih nan Closed Circuit Television(CCTV) dah ni rawh se,'

# 'Kan ram leilung humhalh leh enkawlna kawngah Synod-in nasa zawkin hma la rawh se,'

# 'Synod Higher Secondary School-ah hian zirlai tam zawk admit an nih theih nan Synod-in hma la rawh se,'

# 'Mizorama Sakhaw dang betu (ringlo mi) te hmalakna zirchiang lehzual turin Synod-in hma la rawh se,'

# 'Kum 2013 MLA inthlan lo awm turah hian inthlanna thianghlim leh felfai kan neih theih nan ram pum huapa tawngtairual Synod-in hun inangah buatsaih rawh se,'

# 'Synod Pandal Structure chung tur Synod-in ngaihtuah rawh se'

# 'Kan ram leilung humhalh leh enkawlna kawngah Synod-in nasa zawkin hma la rawh se,'

# 'Pastor nemngheh thar te Synod Ramthar Field-ah dah nghal mai lovin term khat tal Bial vawntir ni rawh se'

#  'Zoram HmeichheInkhawmpui Liana Lalpa Zanriah Sakramen theh tihtawp rawtna'

# Zorama Chanchintha thlen Ni atan March ni 15 1891 pawm tura rawtna

# 'Nausen thi hlamzuiha kan kaltir thin hi tihbo dan Synod-in ngaihtuah rawh se' tih te chu passed a ni.

Synod inthen chungchang
'Kan Synod hi then ni rawh se,' tih thu Aizawl Central Presbytery thulut leh 'Regional Assembly thuneihna enthat ni sela, Mizoram Synod hi then ni rawh se' tih thu Aizawl Bethel Presbytery thulut te lakawpin, a thehluttu Presbytery ten an thehluh chhante an sawifiaha. Regional Assembly kalhmang leh KJP Synod ten an experienced-te sawi turin Moderator-in Rev. W.C. Khongwir, Treasurer, PCI a sawm a.Hun rei tak sawiho a nih hnuah ‘Synod inthen chu a hun rih lo ve’ tih a ni.

Sermon - A tawpah enge i sawi ve dawn?

A tawpah enge i sawi ve dawn?

Hebrai 9:27

Khawvela kan cham chhung hian mahni nihna aia lan mawi hi kan duh vek a, kan nihna chiah hi chu kan puang chhuak duh mang lo va. Kan rilru ang lo takin kan tawng chhuak a, kan tawngkamin kan nihna tak chu kan hâi khuh a. Hetiang lemchang nun hi a tak chan a tul phut hunah a buaithlak duh phian thin a ni. Chutih laiin rilru ang tak leh mahni nihna dik tak sawi nulh nulh hi chu mi â tiin kan dem hlauh thung a. A dik tak chuan a derin kan nung a, lem chang thiam thiam hi kan ngaisang emaw tih mai tur a ni a. Mahni nihna dik tak zahpui lova nungte hi chu kan ngaisang vak hauh lo va, chawimawina No pui phei chu kan dawmtir reng reng lo. Hei hi khawvel hrehawmna pakhat chu a ni ngei mai. Holywood-a filmstar channaa an hotupa Samwood-a chuan, “Filmstar-hote hian mahni nihna kalsanin mi dang nihna chan phet in duh a. In chan tum kha chu mi dang nihna a ni tawh sa a, in nihna kha lungawi takin ni ve mai ula, kha kha mi dang la nih hauh loh chu a ni,” tiin a sawi a. Tunlai khawvel buaipui pakhat chu lemchan hi a ni a, a tak en peih mang si lo hian a lem chu kan en peih hle si a nih hi.

Kan thih dawn darkarah chuan lemchang nun hi a bo vek tawh ang a, a takin kan nung tan tawh ang. Kan khum bulah chhung khat laina an inpun khawm rap rap ang a, “Mate, fian khat tal hi i la lem thei lo maw ?” min tih laih laih hunah chuan kan rilru leh kan nun dan chu a inmil thlap tawh ang. Chumi hunah meuh chuan chhandamna la chang lo kha a derin a thlamuang thei tawh dawn hauh lo va, a chang tawh lah chuan a hlau der thei hek lo vang a, tu nge ka nih tih chu a chiang tawh ang. Engtik niah emaw chuan thihna hian kan nun hi a la pawt chat ve dawn a, chumi hunah chuan kan thusawi tawp berah eng thu nge kan sawi ve ang? Chuta kan thusawi tur chu dâwt a tel thei tawh dawn lo va, Pathian leh mihring pawm tlak thu dik a ni hlen tawh ang. Chutiang thu dik chu kan sawi thut dawn avangin thu dik hlauhawm nge kan sawi dawn, thu dik lawmawm? Kan natna khum bulah chhung khat lainaten mittui parawl teuhva min en thap hunah chuan thu dik kan sawi hun a thleng tawh ang.

Bible-in, “Thih thlengin rinawmin lo awm rawh,” tih thu min chah hi keini chuan hla duaia kan hriat avangin thih thlenga rinawm hi kan huphurh thin a. Nimahsela thih thlenga rinawm chhung hi a rei reng reng lo mai. A chhan chu mitthi vuinaah kal ila, “Heti theh thut hi a nih kan ring lo asin mawle,” tih hi mitthi chhungte tawngkam a ni fo mai. Heta tang hian kan tum loh tawpin thihna kut vâwt hian min man thut thut thin tih hi a chiang a. Kan thih thut thut avang hian thih thlenga rinawm hi a hla hauh lo mai.

Mi pakhat a awm a, mi mawl tak leh hlauhawm tak a nih avangin tumahin an kawm duh lo va; nimahsela a ni chuan a hmuh fuh tawh phawt hi chu a kawm zel a. Khawvel ram hrang hrangah a zin kual a, tawng hrang hrangin thu a sawi thiam bawk a. A kal tawhna khuaah chuan miten amah an hlauh avangin awm ni an lo kham rup rup a, chutah chuan thu lungchhiatthlak tak a sawi ngei ngei thin a. A lenna in chhungah reng rengah chuan an pindante hi a thiatsak a, an khumte chu pawnah a theh chhuahsak lawp lawp mai a, tumahin an ti ve ngam si lo va. Thusawi lah chu a thiam lailêng khawp a, thu a sawi tawh chuan a ngaithlatute mittui hi a tla zung zung mai a, thenkhat an taphawm hawm bawk a. Thusawi thiam viau e ti lo chuan miten an haw em em hlawm a, haw em em chungin an kawm lo thei bawk si lo va. An khua a lo luh tawh hi chuan amah lawm nan Biak In dar hi khât ruihin an vaw bul vul a, chumi dar ri hriate chuan a lo thleng a ni tih hriain a thlenna in chu an rawn pan sup sup a. A lo thlen tawh chuan thusawi laklawh laite hi a rawn pawt chat hmawk hmawk a, lova fehte hi an hawng dawr dawr zel a. A hming chu THIHNA a ni.

He thihna taihbaiawm tak hian kan thusawi tawp ber tur chu a rawn tar lang ngei dawn a, chumi hunah chuan enge i sawi ve dawn?