CHANCHIN THA HRIL AWMZIA
(Mk. 1:15; Gen. 3:15; Thu. 12:1-17)
Chanchin Tha hril awmzia sawifiah na hi Mat. 28:16- sawi angin, ringtu siam leh kohhran din tiin kan hre tlangpui a. A dik em em a. Tuna kan sawifiah tum dan chu Lal Isuan Mk.1:15-a a sawi ang hi a ni ang . Pathian ram din a ni a, Setana ram thiat a ni a, Indona a ni, kan ti dawn a ni.
Leia Pathian ram din a ni:
Chanchin Tha bu thumin chanchin tha hril an sawifiah dan hi, amah Lal Isua hna thawh atangin an sawifiah a. Pathian ram din a ni. Van nun chu leia mitten an nunpui vena tur thu a ni. Pathian ram chu Pathian duhzawng, vana min an ti anga leia mitten an tih hi a ni a. Hei hi Lalpa |awng\ainaa kan sawi thin ‘I ram lo thleng rawh se’ kan tih hi a ni.
Van nun chu Lal Isua nunah a awm a. Isuaah hian Pathian ram chu leiah a lo thleng a. Chu mi chanchin chu kan hril tur a ni. He lei hi Pathianin ama ropui nan, mawi tak leh nuam tak leh hausa taka a siam a ni a (Gen. 1,2). Pathianin mihring amah angina a siam a, a ropuina entir tur a ni a. Thuneihna sang tak a pe a. Lei chu enkawla veng turin a dah a ni. Leiah chuan Pathian leh mihring chu leng dun a nuam taka khawsa turin ruat a ni bawk.
Setana ram thiat a ngai:
Setana lo awm dan chiah kan hre lo. Thup. 12-ah van indo thu kan hmu a. Michaela chuan Setana chu a hneh a, leiah an paih thla ta tih kan hmu. Pathianin mawi leh tha taka lei a siam tichhe turin Setana leh a hote chuan an bei ta a. A enkawltu ber Adama chu hneh phawt a ngai a, an hneh ta reng a, lei chu Adama avanga ânchhe dawng a lo ni ta a, Adama leh Evi pawh ânchhe hnuaiah an awm ta . ( Gen.3:1-19). Mihring chu Setana fa (Jn. 8: 44); Setana thuneihna hnuaia awm ( Eph.2:2,3)., sual bawih (Rom 6:20) a lo ni ta.
He dinhmun ata chhanchhuah hi Pathianin Isua Kristaa a thil tum a ni a. Setana ram – mihring thinlung ram leh a chenna boruak leh a nun phung ram chu, Krista lalna rama siam a lo ngai ta a ni. Thihna chu nunnaah, thim chu engah, Setana bawih chu Krista bawiah siam hna chu chanchin \ha hril chuan a tum a ni.
Chanchin Tha hril chu indona a ni:
Hetiang a lo nih tak si chuan, indona a hring ta a ni. Setana ram chu \hiat a tul chuan Setana chu a awm mai mai dawn lo va, \an a lak a ngai a. Indo chu a loh theih ta lo a ni. Johanan Lal Isua hna a sawifiahna pakhat chu, Diabola leh a hna thawhte tihboral hi a ni. (1.Jn. 3:8). Luka chuan mi chak, Setana chu, a aia chak Isua Krista chuan a rawn phuar ta a ti ( Lk. 11L21-22). Thupuan 12:1-17-ah chuan hmeichhia nia inthuam, nau hring tur chu Setanan nasa takin a tibuai a, a nau chu tihhlum a tum a ni, mahse Pathianin a chhanhim. Chuvangin , chang 17ah, hmeichhe thlah, Isua thu hriattirna pawmtute do turin a chhuak ta, a ti. Chu chu tuna kan dinhmun hi a ni.
Indo rilru put a ngai a ni:
Indo lai chuan indo rilru put a ngai a. Indona inthuama inthuam a ngai a, ral thuam neih \hat a ngai a. Petera chuan kan khingpui Diabola chuan a sa seh tur zawngin a phi ruai a ni a ti bawk ( 1 Pet 5:8). Pawlan, kan buante hi tisa leh thisen an ni si lo, lalna te, thuneihna te… a ti a, Pathian ralthuam famkima inthuam a tul a ti bawk.( Eph. 6:10-13).
Chutichuan, tuna kan tana pawimawh ta ber chu Chanchin tha kan hril hian Pathian ram kan din dawn a ni tih hriat a tul. Hlim tak leh thlamuang taka awm tura pian thar a ni ringawt lo a nih chu. Sakhua thlakthleng mai a ni bawk lo. Mite thinlung leh nunah Pathian lalna leh thuneihna hmun chantir a, Setana ram thiat vek chu a ni. Kan inpeih em le....?