Editorial - Aia upate zah thiam
Mizote hi aia upa zah hnam kan ni thin. Nitin Zirlai Buah pawh, aia upa te zah thiam tura inzirtirna hlate telh a lo tawh thin a, Inchhungkhurah leh khawtlangah aia upate an zah thiamin Khawtlang nun a nuam em em thin a ni. Changkannain khawvel a chiah a,Thiamna a lo sang a, hmanlai boruak leh tunlai boruak chu awihawmlo khawpin a lo danglam ta. Hmanlai chuan kum upa lam chauhin tawnhriat an ngah a, "Kel chal upat a upa" te thu kha thu fing tak a ni thin. Tunlai ah chuan Naupang te tein,thiamna sang tak tak an nei ta. An hriatna a zauvin, Sorkar leh Khawtlang kaihruaitu an lo ni ta a, Naupangte te pawh ‘Ka Pu’, ‘Ka Pi’ tih an lo ngai ta, hei hian aia upate finkhalh avanga upate ngaihhniamna a hring a, hei hi thilpawi tak a ni. Aia upate zahawmna, changkanna avanga humhim thei lo kan nih chuan Hnam zahawm kan ni ngai lovang. Hemi kawngah hian kan inzirtir uar ta lo hlein a lang. Kan Inchhungkhur atanga tanin, School ah te, Sunday School ah te leh puipunna ahte , uar zawka inzirtir thar a tul a ni. Aia upa zahna hian chhungkua,khawtlang leh ram a ti nuam a, chumi tihlawhtling turin Upa zawkte hi thangtharte zah tlakin kan awm em? tih erawh inenthin a pawimawh ang..
