Lal Isua a lokal leh dawn
(IIPetera 3:1-18)
-Upa Lalringliana
Mizoram a Kristian pun chak dan kum zabi 20 bul liam ta atangin, harhna tumli- 1906, 1913, 1919, 1930 hnu ah harhna a thlen apiangin Kristian nasa takin an pung chho zel a. Kum 50 chhungin Mizoram chhim leh hmar ah Kristian 103692 lai an tling hman a ni. Chung hun lai chuan Mizoram ah mihring 152786 an awm a ni.
Harhna runpui pathumna nghawr chhuah kum 1921 atang in Hla phuah thiamna, Thilpek, Hun hnuhnung (Theology) khawih tello a awm lo, Thuhriltu ropui tak tak pawhin, Van khualehtui, Lokal lehna, Rorelna ni ropui, Kum sang rorel tih lam an tuipui em em a ni. Mizo Hla phuah Kristian Hla Bu a thun belh rawt hun laia an harsatna tawh chu Hun hnuhnung khawih lam a tam tawh vang a ni.
Chuti taka Hun hnuhnung thurin an buaipui em em lai rengin Indopui alo chhuak a, kan ram pawh nasa takin a nghawr nghing a, Mizo tlangval sang tam tak Indopui ah an tel a ni. Politics a inlumlet a, Rorelna te inthlakin, District Council te alo ding a. Ram hmasawnna-in mi a sawinghing a, Zirna lamah khua te lo varin; Naupang leh Thalai te lehkha zirna lamah an tlan a. Sipai leh Sorkar hna lamah India ramril ber thlengin an lut ta zel a. Vanram ngai hman pawh an ni ta lo. Harhna pawhin mi a sawinghing ta meuh lova, khawvel thil lungkhamna lamah Zoram mipui nun a fawn dual dual a. Kohhran mi, rawngbawltute pawh chu tuifawn chuan a hrut tel ve bawk a. Mahse, kum 1984 Harhna lo thlen khan, mi rilru ah hun hnuhnung lam ngaihtuahna a rawn tithar leh a, Kohhran chhungah leh mimal ah te zawi zawi in a mut thar leh a ni. Kristian Hla Bu chhut hnuhnung ber ah chuan, Mizo Hlaphuah, khawhar lenpuina lengkhawm zai te, hun hnuhnung lam ngaihna hla kan lo thun belh ta teuh mai a ni.
Kristian Thalai Pawl ah pawh hian hun hnuhnung thu hi a lut thuk tawh hle a. Inkhawmpui leh inpawlkhawmna a an sak zin leh an nawn ngun ber chu hun hnuhnung lam ngaihna a ni. Thlarau thianghlim hnathawh a ni ngei mai. An nunhlui te ninga, Krista lama nun thianghlim nei chak em em mai, mahse sualin a tihbuai fo thalaiten sualna awm tawh lohna ngai a-
‘Sualna tinreng ten thla an zar, Sualin min hliam, kan chau leh thin - Hmun thianghlimah chuan, Chau leh ngui hmel an awmtawh ngai lova; Chu khawpui mawiah chuan’ tia an han zai thup thup hi zawng, Ropuina nen chhum zingah alo kal leh dawn ani tih mipui rilru ah hla-in an lo chhawn a ni ber mai.
Rorel turin a lokal dawn: Hei hi lokal lehna pawimawhna lai ber a ni. Krista rorelna thuthphah hmaah kan inlan theuh tur a ni tih thu hi a chiang nghal a. Mi ten Isua an pawm dan a zirin rorelna a an dinhmun tur a hril ang. Chuvangin he thurin hi ngaihtuah lova, khawvela Isua a awm laia an lo dawnsawn dan ang bawk khan tuna tisa-a a awm tawhloh hnu a an dawnsawn dan hi rorelna lo awm tura an dinhmun hriltu a ni ang. Chuvangin Paula fuihna ang khan, thim thiltih paih a, eng thuama inthuam a tul tak meuh a ni. Rorelna chu Isua kuta dah a ni tih a lang tam em em a, Mihring fapa chuan Mitthi leh Minung ro a rel ang.
Hmangaihna a rorel a ni ang: Isua Krista Kross chu Pathian hmangaihna tarlanna a ni a, chu Kross a hmangaihna chu a rorelna rilru a ni ang. Phuba lakna leh thinur hrikthlakna, mihring piankena bet tlat hi Pathian ah chuan a awm ve lova. Chhandam duhna leh sual phurhsak theihna rilru hi rorelna ah pawh a lian ber dawn a ni. Mi in Pathian hmangaihna chu hnar lui mahse a chunga Pathian rorelna chu phuba lakna mai a ni lovang, Pathian phuba lakna tham kan ni love. Suala tlute tundin lehna, a tawp thlenga dawh a, dawm a, khaichhuah chu a duhzawng tak a ni si a. Hmangaihna leh dawhtheihna hmanga rorelna ala keng zel dawn, chutiangin Pathian thinurna leh hmangaihna chu a inkawp zel a ni. Mahse chaponate, huatna thinlung te, hmangaih lohna rilru nghet tak mai leh tisa thiltih zahpui awm tak te chu fiah taka tarlan ala ni ang. Thil thalo engmah reng hi a hmuh lova thuhruk a awm lova, a khawngaihna mi atangin a lang vek dawn a ni. Chutih rualin, Tupawh ka hnena lokal chu ka hnawtchhuak tawp lovang tih hi Isua rorelna rilru a ni zel ang.
Ropui takin a lokal ang: Hman a tlawm taka lokala kha, thiltihtheihna famkimin ropui takin a lakal leh dawn a ni tih thu hi hman atangin leh tun thleng pawhin ringtute rilru ah nghet a, Kristian te a tilawm a, rilru a hruai nasa hle a ni. Van mipuiten an chawimawi leh chibai an buk a kha, a ropuina ber chu tlawmna Kross a kal tlang kha a ni. Mihring fapa chu ropui taka a lokal leh hunin Kross avanga a ropuina chuan a rawn inthuam leh dawn. Rorelna lalthutphah ah chuan tlawmna Kross lallukhum a khum ang a. Isua Krista chu Lal a ni tiin Lei tin rengin a puang dawn a ni.