Museum & Art Gallery, ATC
“Ka duh tu dang mah an awm lo”
By: Lalbela Hrahsel
Aizawl Theological College chuan Museum & Art Gallery-a dah tur thil lawmawm tak mai a dawng leh ta a. Tunlaia thalai, pavalai leh nuvalai, nu leh pa zawng zawng awi tleitu hla duhthlan zing ami, “Ka duh tu dang mah an awm lo” tih hla a ni a. Freddy Lalruatsanga leh Zosangzuala Chhangte te’n mi tin lungdum zawng taka thiam fahrana an sak lar hi a ni. Thenzawla KTP General Conference, 2012-ah pawh a hla “hit” ber pawl a nih kha! ATC-a a lo luh dan hi a kual deuh va. Kum 2011, January 18 zan dar 7.30-ah khan Archives Hall, Babu Tlangah Freddya Gospel Music Video Album tlangzarh inkhawm neih a ni a. Album thlirlawkna (preview) hmangtu Pi C. Luri chuan thiam zet maiin video album-a hlate a fakselnaah, “Ka duh tu dang mah an awm lo” tih copy a ken chu a phuahtu L.B. (Lalbela) Hrahsel kutziak ngei thlalak (photocopy) a nih thu a sawi chhuak a. Album tlangzarhtu ATC Principal beng a verh ta tlat a. Chuta tang chuan a phuahtu kutziak tak chu khawiahnge a awm tih chhui chhuah a ni ta a.
He hla tha chungchuang tak mai hi Lalbela Hrahsel, Digboi Oil Coy.-a security force-a thawk, Digboi-a ni hnih/thum a bethel hnu-a, June 3, 1966-a a lo ziak daih tawh a ni a. Amah pawh October 20,1978-ah ropuina ramah a lo lawi lut tawh a. Mahse, a hla hi chu Zoram hla chuai thei lo turte zing ami niin a lang. A hla hlut dan ngaihtuahin dil chhuah theih loh mai palh hlauh avangin engemawchen pehhel a ni a. A tawpah a phuahtu L.B. Hrahsel fapa, Pu H. Lalmuanpuia, zai mi bawk, New Serchhip Presbyterian Kohhrana Tual Upa, chu biak pawh a ni ta a. North Vanlaiphai Damdawi Veng Pastor Bial KTP Inkhawmpui-a rawngbawla kal ATC Principal leh Zosangzuala te haw lam chuan, January 23, 2012 khan an chenna Inah an pan ta chawt a. Pu Muanpuia leh a nupui Pi Lalchhuanawmi chuan tukthuan buatsaih meuhvin an lo dawngsawng a. Phal takin an pa duh tak, L.B. Hrahsel hla ziakkhawmna bu phek 72-a chhah, a kawm tla tawh chu an han phawrh ta mai a. A hawrawp a mawiin a thuziak a felfai em em a. Ama siam chawp writing pad-a a thil lem ziak mawi dangdai tak takte chuan, pa namai a nih loh zia an hril chiang hle.
Hemi tum hian a bu puma dil chu a hawihhawm lo deuhva hriain, “Ka duh tu dang mah an awm lo” tih phek chauh chu an dil angin zai thlak a ni a. ATC-a hla phek hawn thlen a nih chuan Faculty member-te chuan a bu ngeia neih loh chu an lo kham khawp hauh lo mai a. A bu puma neih sak dil chu awm lo viauvin lang mahse, Pu Muanpuia chuan, “A bu puma in kawl duh chuan kan lawm khawp ang”, a lo ti leh ta then a. ATC Principal leh Zosangzuala te bawkin Serchhip Pastor Bial KTP Members’ Meet-a rawngbawlna an neih tumin June 24, 2012-ah khan, Pu Lalmuanpuia te nupa kut atangin a bu pumin an dawng leh ta zawk a ni. A phuahtu L.B. Hrahsel talent ropuizia hi sawi thiam har khawp a ni.
A hlabu rual hian a lehkhathawn pahnih dawn tel a ni a. Pakhat chu a hla phuah dan a thian hnena a thawn a ni a. Pakhat dangah chuan a bul tannaah “Dear” tiin a thianpa hming aiah a lem fiah leh mawi takin a ziak a; a tawpa ama hming ziakna turah “Yours sincerely” tiin ama lem a ziak leh a. Hun hrang hranga a lehkhathawn ziakah a hun rem ang zelin milem/thil lem chi hrang, mawi tawk tak a ziak fo bawk a ni. A kutziak a mawiin, a fiah tha em em a.
He kutziak hlabu-ah hian a hun laia Sap hla Mizo tawnga lehlin lar zual chu a kim thawkhat hlein a lang. ATC Museum & Art Gallery Committee Convener Prof. T. Vanlaltlani leh member te chuan he hla tha chungchuang tak chuanna kutziak lehkhabu hi lawm takin an dawng a. Committee chuan a kawm siamin ATC Museum & Art Gallery-ah a hmu duh apiangte en theih turin a dah a. A petu Pu Muanpuia te chhungkaw chungah a lawmin, kawng tinrenga Pathian malsawmna a duh sak a ni.