Tawngtai tlaivar programme tluang takin..
Sakawrdai Branch KTP chuan Central KTP rorel bawhzuiin Dt. 27.8.’12 thawhtanni zan inkhawm ban chhunzawm in tawngtai tlaivar programme chu tluang taka hman a ni. He hunah hian KTP member 19 mai bakah Upa & Pro Pastor leh refreshment buaitutute kan kalkhawm thei a, a lawmawm hle. Programme hi chhawngli ah thenin, thupui duan lawksa angin he tawngtairualna hun hi hman a ni.
Hmarveng Biak In sak hna thawkmek zel...
Hmarveng (Branch Church) Biak In tur sak hna chu chhunzawm chho mek zel a ni a. A hrana Kohhran hnatlang koh lovin, Dt. 29.8.’12 nilaini khan kan Kohhran a Thalai member thenkhat te leh Upa, Pastor & Pro Pastor te nen Biak In sak hnatlang neih a ni a. Hnatlangah hian kan vaiin mi 16 vel an thawk a, A beem chhun zawh fel a ni ta a ni.
Ram pumah ‘Ramthar Ni’ vawi 39-na hmang
Dt. 31.8.’12 kha Ramtharni a ni a. Presbyterian Kohhran ni pawimawh tak a ni a, hmun thenkhatah chuan awmnikham in an hmang. Kan Kohhranah pawh he hun hi Zirtawpni zan khan hman niin, Inkhawm hi P/P Ngurthanmawia Sailo in a kaihruaia, Thupui, ‘Hnai taka mi thim hnena chanchintha hril’ tih chu Pastor Hmingthansanga hnen atangin ngaihthlak a ni. Hemi zan hian Ramthar puala Thilpek lakkhawm a ni bawk. Kum 1972 Mizoram Synod Inkhawmpui chuan, Synod Ramthar Board-in, ‘August ni 31, Pu Zosaphluia Mizorama a lo thlen ni hi Synod Ramthar Ni atan hman ni se’, tia a rawtna chu pawmin kum 1973 atang khan August 31 chu Ramthar Ni atan hman tan a lo ni ta a ni.
Beihrual kum 94-na kan lo thleng ta reng mai
Dt. 1.9.’12(Inrinni)zan khan kan Kohhran Biak Inah, Beihrual hawnna inkhawm neih a ni a, Hawnna Inkhawm hi Pastor Hmingthansanga’n kaihruaiin, tawngtairualna hun hman a ni bawk. Beihrual hi Biak Inah leh pawn lama fehchhuah hun atan hman a ni dawn a. Dt. 10&17 Sept. zanah KTP Beihrual fehchhuah Programme hman a ni ang a, Dt. 11&18 Sept. zanah Kohhran Hmeichhia Beihrual Fehchhuah Programme hman a ni bawk ang. Dt. 20&21 Sept. zanah Kohhran Fehchhuah hman a ni ve leh ang a, Kohhran Fehchhuah ah hian ‘Village Council Member te tlawh’ VCP Inah leh ‘YMA, MHIP, MUP Hruaitute nena inkawm ho’ Sunday School Hall-ah hman a ni dawn a ni. Beihrual hi June,1918 ah hman tan niin , 1919 leh 1920 ah September, 1921 ah January ,1922 - 1924 ah April thlaah te hman thina ni a, September 1925 atangin mumal takin kan hmang tan ta a ni.
Dt 8-9 Sept. khian Sakawrdai Kohhran Biak Inah Naupang Sunday School (Begin-Junior) Inkhawmpui neih a ni ang. Inrinni Dar 2:00 p.m ah Khawmpui Committee neih a ni anga. zanah reports ngaihthlak a ni ang. Pathianni chawhma leh chawhnu ah intihsiakna hun hman a ni anga, Pathianni zan Bial Chairman Pastor Hmingthansanga hnen atangin Pathian thuchah ngaihthlak a ni ang a, intihsiakna lawmman sem nghal a ni bawk ang.
Lawmman Pakhatna - Baltin, Rs. 500/- man, Pahnihna - Baltin, Rs. 400/- man, Pathumna - Baltin, Rs. 300/- man, Consolation Prize - Baltin, Rs. 200/- man vel a ni ang.
Intihsiakna endiktu turte:-
1) Pu C.Zonuntluanga, SKD ‘S’
2) Pu Lalhmingthanga, Vaitin
3) Pu Ronald Lalramsanga, SKD
4) Tv. Lalrohlua, Thingsat
5) Pu Israela, Khawpuar
ATC chuan Museum & Art Gallery-a dah tur thil lawmawm tak mai “Ka duh tu dang mah an awm lo” tih hla awm na lehkhabu a dawng. He hla tha chungchuang tak mai hi Lalbela Hrahsel, Digboi Oil Coy.-a security force-a thawk, Digboi-a ni hnih/thum a bethel hnu-a, June 3, 1966-a a lo ziak daih tawh a ni a. Amah pawh October 20,1978-ah ropuina ramah a lo lawi lut tawh a ni. Hun engemaw chen buaipui a nih hnu ah A fapa Pu H. Lalmuanpuia, New Serchhip Presbyterian Kohhrana Tual Upa, chu biak pawh a ni ta a. Phal takin an pa duh tak, L.B. Hrahsel hla ziakkhawmna bu phek 72-a chhah, a kawm tla tawh chu an han phawrh ta a. A hawrawp a mawiin a thuziak a felfai em em a. Ama siam chawp writing pad-a a thil lem ziak mawi dangdai tak takte chuan, pa namai a nih loh zia an hril chiang hle. A phuahtu L.B. Hrahsel talent ropuizia hi sawi thiam har khawp a ni. Hun hrang hranga a lehkhathawn ziakah a hun rem ang zelin milem/thil lem chi hrang, mawi tawk tak a ziak fo bawk a ni. A kutziak a mawiin, a fiah tha em em a. He kutziak hlabu-ah hian a hun laia Sap hla Mizo tawnga lehlin lar zual chu a kim thawkhat hlein a lang. ATC Museum & Art Gallery-ah a hmu duh apiangte en theih turin a dah a.