Thihna chelh hlen rual loh Lal Isua
(Chhiar Tùr : Tirh. 2 : 24)
Lal Isua kha Kraws thihna-ah khán a nun lo tawp ta sela. Leiah hian Kohhran ropui tak hi hmuh tùr a awm lo vang. Ringtute inpawlhona zawng zawng pawh hi a awm hek lo vang.Tin, ringtute nihlawhna bik tùr eng mah a awm lo vang a, kan thurin leh thuhrilte hian awmzia a nei hek lo vang. Thihnain a tihtawp theih nunna chu nunna tak a tling lo va, Chhandamtu atan a tling bawk hek lo; mahse Isua, khawvel Chhandamtu chu kraws thihna leh thlanin a nun a titawp thei lo, thihnain a chelh hlen zo lo. Chutianga Isuan thihna a hneh dan chu ngun takin lo ngaihtuah ila.
1. Isua thihna a hneh dan :
Isuan krawsa a thihna tùr kha pumpelh duh se chuan a pumpelh thei, Gethsemani huanah pawh khan amah man tùra lo kalte kha a bihruksan thei. Mahse a duh lo, thuawihna famkim nen a hma lawka thihna lo awm tùr chu a hmachhawn a, huai takin a tirtu Pa thu awihin, mi zawng zawng tana tlanna famkim thawk chhuak tùrin a inhlan ta a ni. Thihna chuan a chelh hlen zo lo, ropui takin thihna hnehin a tho leh ta. Isua thihna leh thawhlehna hi Chanchin tha laipui chu a ni. Thuthlung Hlui thuchah leh Isua Krista kraws thihna pawh hi a hlutna chu a thawhlehna avang hi a ni. Thihnain a chelh hlen theih Isua nei ni ila mi khawngaihthlak tak kan ni ang. Thihna meuh pawhin a hneh loh, chelh tlat a tum pawha a chelh tlat zawh loh Isua Krista, Tholeh Lalpa neitu leh zuitu kan nih avangin ava lawmawm em! Tichuan, Isuan thihna a hneh dan chu pumpelh lo va luhchilhin a hneh. Tlawmnain, thuawihna famkimin thihna a paltlang a, thlan ruak- hmun khawharah a awm kumkhua dawn emaw an tih laiin ropui taka kaihthawhin a awm leh ta. Mittthi emaw an tih kha minung a lo ni reng mai.
2. Isua tholeh nun :
Thuthlung Thar hian tisa dam lai nun aia nun sang leh duhawm zawk, a mite zawng zawng nena inlaichin thei zel nun angin a tarlang thin. Khawvelin a khawih buai phak loh nun, hmun leh hunten an thununa an khuahkhirh phak loh niin a sawi thin. Hmun tina Amah ngaitu apiangte hnenah a inhriattir thei a, hmun
tina a miten an pawl theih nun a ni. Khawvel hunbi chhiar dan hian Tholeh Lalpa nun chu a thunun lo va, leilung inkar hla leh hnai awm hian Amahah thu a nei lo. Heng zawng zawng piah lamah Isua tholeh nun chu a cheng a, thawhlehna thiltihtheihna chuan a duh danin hunbi leh kum te, leilung awm dante hi a hmang mai zawk a ni.
3. Thawhlehna thiltih theihna chu i chhawr ve tawh em? :
Isua thawhlehna thiltihtheihna tawmpuitute chuan-
(a) Harh sawng sawngna an chang-
Emmau kawnga thian pahnih kalte chu an bei a dawng. Israel-te tlantu tùra an beisei Isua an khengbet ta mai si a, zirtirte lah hlau thlabarin an tawmim zo ta. Mahse Tholeh Lalpa chu Emmau kawnga kalte hnenah a inlar a, an lo harh ta, thinlung tihharh tharin an lo awm ta.
(b) Huaisenna an nei thar-
Hmelma kara Isua a awm a, kraws-a khenbeh mai a hmabak lai kha chuan amah zuitu tam takte chu hlau leh thlabarin an tawm bo zo va. Mahse thihna hneha a thawhleh hnu meuh chuan thlarauva tihtharin an awm a, ama tana nungin martar an ngam. Isua hminga thu sawi tawh lo tùra tih an nih pawhin, "Keini zawng thil kan hmuh leh kan hriatte hi sawi lovin kan awm thei lo," an ti ( Tirh 4:20)
(c) Retheih leh chan an huam-
In leh lo kalsanin ringlo mipui zingah rawng an bawl. khawmualah leh tuipuiah hlauhawm tam tak an tawk a, mihring, ral hlauh tùr tam tak a awm bawk a, tihduhdah an tawk a, thihna tùr ngei ngei vawi tam tak an paltlang bawk. Tihchak thar an ni a; huaisenna thar nei a, hloh leh chàn huama Pathian tana inpein a thawhlehna hriatpuitute chu an nung thin.