POLITICAL PARTY-TE LEH MPF
THAWHHONA THUTHLUNG
Mizoram chhunga Inthlanna hrang hrang heng - Mizoram Legislative Assembly General Election 2008, MP Election 2009, Village Council Election 2009 & 2012, Aizawl Local Council Election 2012, Aizawl Municipal Council Election 2010 leh Autonomous District Council Elections-ah te hlawhtling takin ‘Thawhhona Thuthlung’ siam a, Mizoram chhunga political party hrang hrang leh Mizoram People Forum-te hmalâkna chuan rah tha a chhuah zel a. Kan inthlanna pawh a tha thawkhatin, ram chhung leh ram pâwn lam thlengin mite hriat leh ngaihven a hlawh ta hle a. Hei hi kan zavaia tan tlânna leh thawhhona rah a ni. Kum 2013-a Mizoram Legislative Assembly General Election lo awm turah pawh hian inthlanna thianghlim, dik leh felfai tak a awm ngei theihna tur leh sawrkâr tha, thlei bîk nei lo, mipui huapzo din a nih ngei theihna turin Mizoram People Forum General Headquarters hruaitute leh Political Party hrang hrang hotute chuan tan lâk ho dân tur kan ngaihtuah a. A hnuaia inkaihhruaina tlângpui târ lante hi zawm theuh tha kan ti. Hei hian MLA General Election 2013 Inthlan hun puan atanga Inthlan zawh fel thleng a huam ang.
1. Inthlan chungchâng
(1) Inthlan thianghlim, dik leh felfai tak a awm ngei theihna turin mi tinin theihtâwp chhuah theuh ni se.
(2) Inthlanah hian khua leh tui dik tak, vote neite chuan vote thlâk theuh ni se.
(3) Vote thlâk tur khawpui atanga anmahni khaw lama an hawna tur ngaihtuahsak emaw, hmun dang atanga anmahni vote awmna lama an kalna tur ngaihtuah a, insengsova buaipui emaw hi tu mahin tih loh ni se.
2. Inthlan senso chungchâng
(1) Inthlan hautak lutuk leh senso sâng lutuk titlem turin theihtâwp chhuah theuh ni se. MPF-ten candidate-te leh party te hnenah pawisa dîl emaw, dawn emaw khap tlat a ni.
(2) House to house campaign hi thil dik lo tam tak inphum ruk theihna leh senso titamtu a nih theih avângin tih loh hi a tha ber a; amaherawhchu, mipuiten candidate-te an hmuh duh thin avâng leh candidate-te pawhin an bial mipuite tlawh an duh thin avângin inthlan hma ni 10 thleng chuan house to house campaign programme siam theih a ni ang a; chumi hnu lamah erawh chuan tu mahin tih loh ni se.
(3) Sum leh therhlo dang hmanga vote lei leh hralh hi tih loh ni se. Mipui, pâwl hrang hrang leh Kohhrante pawhin party leh candidate-te hnenah thil phut neih tur a ni lo. Chutih rualin thil chi hrang hrang sem, (enîr nan- silpouline, jersey, football, mobile handset, sawrkar development kal lai leh NLUP leh thil dangte) hi tih loh ni bawk se.
(4) Kawng zawh hi inthlan hma ni 10 hnu lamah chuan tih loh ni se, ruaitheh leh picnic hi tih loh ni bawk se. Ruaitheh tih hian mikhual chaw eipui te, block leh unit hruaituten tul bîk thila chaw an ei khâwm thin angte hi a huam lo vang. Candidate-te rulh tura anmahni hriat lohva dâwr leh hmun dang atanga thil lo lâk leh pekte hi tih loh tur a ni.
(5) Candidate-te tana inthlan tihautaktu, heng - banner, flag leh poster-te hi veng tina târ zât tur
hetiang hian bithliah a ni :-
VC / LC member pasarih nei chinah :
Banner - 3, Flag – 30 leh Poster - 20 thleng
VC / LC member panga nei chinah :
Banner - 3, Flag – 20 leh Poster - 15 thleng
VC / LC member pathum nei chinah :
Banner - 3, Flag – 10 leh Poster - 10 thleng
Banner hi 18 x 4 aia lian lo ni se. Poster hi 2’x 11/2’ aia lian lo ni se.
Party symbol chuang lukhum, badge leh sticker te hi campaign na hmanruaah hman loh ni se.
Flag, Banner leh Poster bituk aia tam tar an awm chuan MPF-in la thla turin hrilh se.
3. Zalen taka inthlan leh venhimna chungchâng
(1) Invau leh inrîkrâp awm lo turin theihtâwp chhuah theuh ni se.
(2) Helte hmanruaa hman leh râlthuam chelekna awm thei te huai taka dodâl theuh ni se.
(3) Border leh sensitive area-ah te a tul leh mamawh anga venhimna a awm theih nân hmalâk ni se.
4. Policy implementation
(1) A tak ram thleng thei tur leh tihhlawhtlin theih tur chauh - manifesto, policy leh programme duan ni se.
(2) Mimal chungchâng leh tualchhung thil chauh ni lovin, party policy leh programme hi campaign-na leh inzawrhna atân hman ni se. Dâwt leh thu belhchian dâwl lo leh finfiah nghâl mai theih loh hmanga inbeih hi tuman tih loh ni se.
5. Candidate chungchâng
Political party tinin candidate an siam laiin hetiang mi hi candidate atân ruat tura beisei an ni :
(1) Mi hmingtha, mize nghet leh rilru puitling.
(2) Mi taima leh rinawm.
(3) Dik lo leh kut tling lova sum leh thil dang hmuh tum lo mi.
(4) Zu leh ruihtheih thil dang laka fihlim
(5) Mipat hmeichhiatna kawnga sawisel kai lo.
(6) Ram leh hnam Dân pawisa mi leh dikna ngaisâng mi.
(7) Khawtlâng leh mahni mihring puite thatna tur duha, chumi atâna inhmang peih mi.
(8) Mahni sakhua, kohhran leh pâwla mi hmingtha leh rinawm.
6. Thawhhona chungchâng
(1) Constituency huam chhung khaw lian deuh deuhvah MPF leh candidate-te remruatna angin, MPF Constituency Forum kaihhruaina hnuaiah Joint Platform buatsaih theih a ni ang a, chhung tinten candidate an lo hmelhriat theih nân leh an thu leh hla an lo dawnsawn theuh theih nân, a theih leh remchân dân angin, he programme hi Local TV leh Media-ahte pek chhuah ni se. Joint Platform hi pâwl dang leh mi dangin buatsaih loh ni se.
(2) Party malin a hranpaa public meeting neih an duh a nih pawhin MPF kaihhruaina hnuaiah ni thei se. MPF awm lohnaah chuan party malin a remchân dân anga kalpui mai ni se.
(3) Vantlâng tâna thingpui lum loh ni se; polling booth area bul hnaia electoral roll en leh number pek chhuah hi political party-ten a mala buaipui lovin, MPF kaihhruainain, fîmkhur taka buaipui ni se.
7. Tlângkawmna
(1) A chunga ‘Thawhhona Thuthlung’ târ lan piah lamah hian MPF District, Constituency leh Local Forum ten ruahmanna hran siam loh ni se.
(2) Heng ‘Thawhhona Thuthlung’ hi bawhchhia an lo awma, finfiah ngei a nih chuan, MPF-in a theih leh remchân dân angin an bawhchhiatna constituency huam chhungah a puangzâr ang.
(3) He ‘Thawhhona Thuthlung’ hi MPF leh political party tinin a zau thei ang berin theh darh ni se.