Krista avanga mi â
Keini zawng Krista avangin mi â kan ni (I Kor. 4:10)
Vawi khat chu London khawpuiah khuan mi danglam tak mai pakhat a awm a. Ni khat chu “Krista tana mi â ka ni e,” tih hi a kawr hmaah a tar kulh mai a, chuti chung chuan bazaar lun laiah a tei a tei kual a. Mite chuan hmusit takin an nuih ru tet tet hlawm a. A tuk lehah phei chuan a kawr hnung lamah chuan thuziak dang a rawn tar belh chhah leh a. Mite chuan nimin lam aia â zual sauhva ngaiin an nuih a za lehzual a. Amaherawhchu a hnung lama thuziak chuan mi thenkhatte thinlung a khawih ta riau mai a, chuta thuziak chu, “Nang tu tana â nge i nih ve?” tih hi a ni. Mite chuan Krista tana â kan nih loh vek vek chuan Setana tan kan â lo thei lo a ni tih an ngaihtuah zui ta a.Chu pa chu nuihzat ngawt tur a nih lohzia an man ta a.
Tirhkoh Paula ngei pawh kha thiamna lamah chuan Gamaliela ke bula sei lian ngat a ni a, tunlaia Phd. kan tih ang hi chu a ni ngei ang. Nimahsela, “Keini zawng Krsta avanga mi â kan ni e,” a ti tlat mai. Krista avanga tuar ngam a nihna te, chân ngam a nihna te, thi ngam a nihna te a sawina a ni. Khatiang khawpa mi thiam kha, Isua avangin hmuhsit leh endawng a tuar nasa hle a, lung inah vawi eng emaw zat a tâng a, khawvel mite ngaih chuan a va han â tak em!!
Krista avanga Petera-te âtziate kha khawvel mite chuan an nuih zat hle ang. Galili dilah khan lawng pahnih pil lek lek khawpa sangha tam lutuk an man khan, Lal Isuan amah zui turin a sawm a. An sangha man zo zaite leh an len te kalsanin Lal Isua an zui ta daih mai a. An sangha mante kha han zuar sela, a man chu an nupui fanaute pe te te sela chuan a dik deuh tur. Nimahsela an kalsan daih mai si a, an va â tak em !! â tak an ni e. A hmusit duhtute tan phei chuan mi â let tawp an ni a, mi â ward-a dah mai chi an ni e.
Zirtirte kha Chanchin Tha hrila an zin chhuah lai khan chaw an fun lo va, iptê an ak lo va, pawisa an keng lo va, inthlakna silhfen an keng lo va. Saruakin an chhuak tawp mai a, an va han â tak em ! Nimahsela an lo hawn hnu khan Lal Isuan, “Tangka ip lo va, ipte lo va, pheikhawk lova ka tirh chhuah che u khan tlakchham in nei em?” tiin a lo zawt a. Anni chuan, “Engmah kan tlachham lo,” an ti a nih kha. Chuvangin miten mi â an tih thinte hian an tifuh tlat zel si a, Krista avanga â ngamte hi an lo fing ber nge nge si thin. Engmah keng lova zinte khan tlakchham an nei lo va, keini chu kan inkeng tam lutuk hi kan tlakchham phah thin a ni lawm ni?
He khawvelah hian thiamna leh finna a sang zel a; chumi rualin Krista avanga mi â nih ngam hi a harsa tial tial dawn niin a lang. Rualawhna leh mahni hmasialna an inkawmngeih tial tial a, kan nei tam tial tial a, kan duhamna a zual tial tial bawk. Taimak hi a tha a, Kristian nih nen a inrem a; nimahsela taimakna hi duhamna nen a inthian tawh chinah chuan sualna khur pui lam min pantirtu a ni. Chutiang mite chu khawvel thilah an fing râm a, Krista avanga tuar leh chân te hrehin khawvel thilah an â but thung a. An hlawkna tur a nih dawn phawt chuan an rawngbawlna pawh an zah zo lo va, an sakhaw vawn zirtirna ngei pawh thlah an duh hial thin a ni.
Krista avanga mi â te chuan Pathian thu a nih phawt chuan, ‘ta se, ta lo se’ tih chhut si se lovin, an thu hriat chu a takin an nunpui hmiah a, chu chu ‘Thlarau mi’ kan tih awmzia hi a ni ber a. Pathian thu hi hriat tam aiin zawm tam an tum ber a. An hriat apiangte chu mawl takin an zawm bur mai a, an hriat belh tam chuan an zawm tam a ni mai a, an zawm tam poh leh an hlawkna a tam bawk a. Pathian thu hi a hre tamte ai chuan a zawm tamte hian an tifuh zel zawk a ni. Pathian thu zirnaah pawh hian a kaw tawp thleng pawhin zir ila, kan hriat apiang zawm zel bâk chu zir chhuah tur hranpa hi a awm chuang hauh lo.
A dik tak chuan kan buaina tam ber hi mahni hamthatna ngaihtuaha kan hmanhlelh vang a ni ber thin a, chu chu Kohhranah ngei pawh hian a dik tlat. Mi thenkhatten an lawina Kohhran an sawi chhiat chiam chiam chuan, an beisei angin Kohhranah chanvo tha an chang lo a ni duh phian. Krista avanga mi â te chu mite tlin lohna laiah an tui hman lo va, Pathian thu hi an tuipui tawp mai a, chanvo tha leh chhiaah an buai ve lo va. Mite nunah an tlu ve lova, mi an tlukin an alh phah zâwk a. Mite fak derna lakah an tawlhthlu ve ngai lo va, miten an sawiselin an hnual ve hek lo. An â em em a, an fing bawk si a ni.
Kal la thawk rawh a la tawk lo, Hlohna hi van hlepna a ni;
Mihringin an fak lo che a, Lalpan a fak loh che ring suh.