Kristian nun Nghet
1 Korinth 10:12
Milem ziaktu pakhat hian Lal Isua lem ziak a tum a, Isua ang ber tura a hriat zawng turin mipui tamna bazaar hmunah a kal a. Lal Isua ang bera a hriat tlangval pakhat chu a thuttir a, a lem chu a ziak ta mawlh mawlh mai a. Chumi hnu thla khat velah chuan a mantirtu Juda Iskariota lem ziak a duh leh ta a. A hma ang bawk khan mipui tamna hmunah bawk a kal a, Juda Iskariota ang ber tura a rin, mantirtu ni âwm reng, sual hmel tak tlangval pakhat chu a thuttir a, a lem chu a ziak leh dawn a. Chu tlangval chuan, “Ka pu, hmanni lawk khan helai hmunah bawk hian keima lem hi i ziak tawh a, a va mak teh sek ve, i ziak sual palh em ni?” tiin a zawt a. Lemziaktu chuan chu tlangval chu en vang vang chungin, “Tlangval, a va mak tak ve mawle, hmanni khan Lal Isua i an teh lul nen, tunah erawh chuan a mantirtu i lo ang leh hman tawh a nih hi,” a ti ta ngawt mai a.
Kan ram Kristiante nun nghet lo lutuk hi kan vei tlâng theuh va, a dik tak chuan a veitute nun pawh hi a nghet bik hek lo va. Chuvangin tumah inhmusit lova kan ngheh lohna lai hi invei tawn a, nun nghet nei tura tan kan lak a pawimawh a ni. He pa ang hian a changin Isua kan ang viau va, a changin a mantirtu kan ni leh mai bawk a. kan tha viau emaw kan intih laiin kan lo sual leh phut a, kan sual viau emaw tih laiin kan lo tha thar leh phut phut bawk a. Pathian thua kan tui lai rau rau chuan da leh mai mai thei hmel pawh kan pu lo va, no thum bela no ruk chhum an sawi ang maiin kan khat a. Nimahsela kan dâk leh vek vek chuan tui leh thei hmel kan pu hek lo. Hmana tui kha tunah an ro der a, hmana tui lo kha tunah kan tui thar a, tumah hi inhmusit tur kan awm rih lo a ni.
Vawi khat chu tuai pakhat hian hian hmeichhia emaw intiin hmeichhe hnute lem hi a insiam chawp a. Chu chu mi dangin an sut palhsak ta a, a khamphei kha a tung chho zâwngin a awm ta hah mai an ti a. He tuai ang hian Kristian thenkhat chu kan piangthar fuh viau emaw kan tih lai hian min sutu azirin kan danglam leh mai mai thin. He tuai hnute hi a sutu hian a su na hle pawh a ni lo va, siam chawp a nih avangin a danglam hma hrim hrim a ni zawk. Kan Kristian nun hi siam chawp leh hawh chawp a nih phei chuan, sut kher loh pawhin a danglam leh mai thin. Naupang pakhat chu a piangthar ve a, a nu chuan a tirh dawn apiangin, “I piangthar tawh si,” a ti ziah mai a. Nakinah chuan naupang chuan a nu tirhna chu a ning ta deuh va, “Ka nu, ka piangthar peih tawh lo,” a ti ta hlawl mai a. Pianthar chu kan duh e, nimahsela piangthar nuna nun aiin piangthar lo nuna nun hi kan peih zawk si. Kan ram Kristiante hian kan kawngte hi chhut ngun kan mamawh a ni.
Zirtirna dik lo lo pian chhuahna chhan pakhat pawh hi nun nghet nei lote vang a ni. Chutiang mite chuan chhandam nih an duh ve si a, chhandamte nun dan turin an nung peih si lo va. A hahdam thei ang berin Pathian thu an sawi a, chu chu mi thatchhiate bawkin an lo pawm a. An zirtirna chu lung tileng tak, hahdam tak, awih awlsam tak a ni zel ang. Chu zirtirna chu an pawm tak tak a ni lo va, an sual thupna leh mahni an inthiam chawpna a ni. Nun nghet neih an peih lo va, an zawh tawkin Pathian thu an sawi awlsam ta a, an tui phian a, an thinlung a chawl chuang reng reng lo.
Kan ramah hian Pathian thu ril pui pui kan sawi a, thuthlung mak pui pui kan luhchilh hlawm a. Inlarna mak tak tak kan hre tam a, Pathian aw hria eng emaw zat kan awm tawh a. Khawhar inah thlarau mi kan fuan khawm a, kan thinlunga thu thleng thar (Thuthlung Thar ni lo) sawi tur kan nei reng a. “Ka sawi lo vang ka ti a, mah se...” tiin kan ding chhuak leh nge nge thin a. Mahni testomony hi mi dangte hriatah kan sermon nghek nghek a, mi dangte chawmna emaw kan ti tlat zel a. Kan nun erawh chu a nghet mawh em em si hi a mak a ni.
Nghet takin i ding ang, Beram No thisena inbualin;
Lalber sipaite kan ni, A thu min tiam ang zelin;
Lallukhum ropui kan hlawh ang a.