Hmarveng Branch Church (Biak In) peihfel..
Hmarveng Branch Church chu July. 24, 2012 (Zirtawpni) zan khan Bialtu Pastor, Rev. Dr. Hmingthansanga, Bial Chairman ni bawk chuan Lungphum a phum a. Chumi hnu July 25 (Inrinni) atangin Biak In bankhur laih hnatlang neih tan nghal a ni a. Biak In hi Concrete building, a dung 36 ft, avang 20 ft, Varandah 10 ft. a zauva sak a ni. Bialtu Upa R. Lalfakzuala, (Building Chairman ni bawk) hova theihtawp chhuaha hma lak a ni a. Biak In sakna ah hian man pawh awm lovin Pu Lalrinngheta Motor vawi eng emaw zat hman a ni a, hetiang mi inphal leh rawngbawlna a inpe kan nei hi a thlamuanthlak hle a ni. Biak In sakna Estimate Rs. 4,00,000/- hman zawh a nih hnuin, tunah hian Sacrament dawhkan, Khuang, Thuthleng te siam fel nghal vekin, Kohhran Committee in a rel huna Biak In hawn mai theih turin peih fel a ni ta. Bialtu Pastor te nena inberawnin Dec. 15 (Inrinni) zan atang khan Biak In ah Inkhawmna neih tan a ni. Biak In property mamawh tam tak ala awma, Momorial Gift atan Property Donate duh te tan pek theih reng a ni bawk.
Naupang pual Krismas Carol Service hmang
Dec. 14 (Zirtawpni) zan khan Synod-in Programme a duan sa zulzui in, Kohhran Sunday School Hall-ah Naupang Pual Krismas Carol Service Programme hman a ni a, mi 72 an kalkhawm thei a ni. Inkhawm hi Upa R. Lalfakzuala, Naupang lam Superintendent in a kaihruai a, Naupang atangin Pathian thu te, Zaipawl te, Group zai te, Solo te leh items hrang hrang hmangin hun hlimawm tak an hmang. Programme hman zawh ah Refreshment Squash, Artui sem a ni bawk.
Ruai Committee inbuatsaihna...
Krismas & Kumthar Ruai Committee pawh ngawrh takin a inbuatsaih chho mek zel a, Ran lam pawh Aizawl lam ami Kawl Bawng 2, Rs. 59000/- man lak niin, Ningani khan phurh thlen a ni tawh a. Hemi rual hian Bawlhlo tur te lak fel nghal a ni a. Committee in Ruai chawhmeh semna atan Baltin (Silver) 15 vel lei nise a tih angin, Baltin te 15, Rs. 2500/- man lei nghal a ni bawk.
Tui mamawh tawk nei vek tawh tura kan inngaih laiin, Tuizem a pawp avangin Tui a dahkhawl theih lova, Pawl / mimal, mi inphalte ta ngaihven a ngai dawn niin a lang a, Kohhran chhungkua te a nei remchang te chu lo inhawngzau deuh turin kan inngen a ni.
Sa sahna siam hnatlang kohna..
Dec. 22, (Inrinni) ah Ruai buatsaihna tur (Sa sahna) siam hnatlang neih tur a ni a, Kohhran chhungkua te thawkchhuak theuh thei turin i inbuatsaih ang u.
Synod Campus Ministry workshop...
Nimin (Dec. 12) khan nilengin Synod Campus Ministry chuan Aizawl khawpui chhung hmun 11 thlan bikah “Workshop on Life Skills of a Teacher” tih thupui hmangin Workshop a buatsaih a, he Workshop-a tel tur hian Aizawl khawpui chhunga Primary School atanga College thlengin zirna in hrang hranga zirtirtute sawm an ni.
Heng Workshop neihna hmun hrang hrangahte hian chawhma leh chawhnu session siam niin thupui inang vek zirho a ni a, sawihona hun a awm theuh bawk. Chawhma lamah hian Zirtirtuten an zirtirna hnaa an hriat tel tur pawimawh, an zirlaite nuna Value Education an tuh dan chungchanga kaihhruaina lam hawi zirho a ni a. Chawhnu lamah Zirtirtu nun bik luhkhung bing leh a ni.
Chawhma session hi dar 10:30 atanga 12:30 thleng a ni a, chawhnu session hi dar 1:00 atanga dar 3:00 thleng a ni. Workshop neihna hmun 11-ah te hian Chawhma lam leh chawhnu lamah hruaitu hran theuh ruat an ni a, Synod lam atang leh Evangelical Teachers’ Fellowship hotute atangin hruaitu turte hi ruat chhuah an ni hlawm. Workshop neihna hmunte hi Kulikawn, Mission Veng, Khatla, Bethlehem Venglai, Vaivakawn, Tuikual, Zemabawk, Bawngkawn, Ramhlun North leh Electric Venga Presbyterian Kohhran Hall-te bakah Chanmari YMA Hall-te an ni.
He Workshop-ah hian Rev. Dr. Lalchungnunga paper buatsaih zirho a ni a, chawhma lam paper-ah hian zirtirtuin naupangte hnena zirtirna a peknaa ama nuna a mamawh luhchilh deuh bik a ni a. Chawhnu lamah hian chutianga zirtirtu ni tlak tura zirtirtu mimal nun khawvel zirna lam zirho leh a ni.
December 18 (Thawhlehni) chawhnu dar 1:00 hian Campus Ministry hotuten Workshop an buatsaih chungchang Review Meeting, Synod Committee Room No. 1-ah an nei ang.
Bial thar hawn chungchang
Synod Inkhawmpui Vawi 89-na thurel angin Pastor Bial thar hawn chungchang Synod Officers’ Meeting, December 12-a thu chuan an rel a, hetiang hian Bial thar hawnna neih a ni ang :
‘A’ Mizoram chhûngah
1) Tlangnuam Bial, Hawngtu: Rev. Lalramliana Pachuau - 12.1.2013 (Inrinni)
2) Airfield Vengthar Bial, Hawngtu: Rev. Dr. R. Lalbiakmawia - 12.1.2013
3) Bungtlang Bazar Bial, Hawngtu: Rev. P.C. Pachhunga - 12.1.2013
4) Lunglei Bazar Bial, Hawngtu: Rev. Lalzuithanga - 12.1.2013
5) Khawhai South Bial, Hawngtu: Rev. H. Lalrinmawia - 12.1.2013
6) Chalrang Bial, Hawngtu: Rev. K. Lalthangmawia - 12.1.2013
7) Sihphir Vengthar Bial, Hawngtu: Rev. Zosangliana Colney - 12.1.2013
8) Tuipang Bial, Hawngtu: Rev. Vanlalzuata - 12.1.2013
‘B’ Mission Field-ah
1) Tezpur Bial, Hawngtu: Rev. K. Lalrinmawia - 12.1.2013
2) Jarwadi Bial, Hawngtu: Rev. P.B. Zosapthara - 12.1.2013