AN CHHINCHHIAH BIK CHE
Zakaria 8:23
Kenya rama Nairobi khawpuia lal ber hnuaia ram awptu (baron) nupui hian Kenya rawlthar pakhat a awmpui a. Thla thum a awm hnu chuan rawlthar chuan, “Ka pi, Muslim lal nupui i hmelhriat kha, a hnenah lehkha min ziaksak la, thla thum chhung chu an hnenah ka va awm ve ang chu,” tiin a ngen a. A pi chuan, “Ka hnenah hian la awm rih la, i hlawh te pawh kan tipung mai dawn nia,” tiin a chhang a. Rawlthar chuan, “Ka pi, hlawh tam zawk beiseia chhuak tur ka ni lo. Eng sakhua ber nge ka zawm dawn tih hi ka hre lo va, i bulah Kristiante chet dan zirin thla thum ka awm tawh a. Muslimho nun dan zira an hnenah thla thum awm leh ka duh a, chuta tang chuan eng sakhua nge ka zawm ang tih ka hre thei ang,” tiin a chhang a. A pi chuan, “Aw, chuti a lo ni maw? A tir atang khan i thil tum chu lo hre hmasa ila chu aw...” a ti vawng vawng mai a.
Kristian nun hi fimkhur a pawimawh hle mai. Kan awmna apiangah hian chhinchhiah kan ni a, inthlahdah hman kan ni lo. Kan ram pawh hi Kristian ram kan ni a, Pathian thu pawh kan sawi nasa hle a, Chhandamna camping pawh kan ram anga uar an awm ve a nih pawhin an tam lo khawp ang. Misual ber ber te pawh camping-a an luh chuan ni hnih khat thilah an piangthar thei zel mai a. Testimony ropui tak an sawi tawh chuan mipuiin an sualna chu kan hai der lui thei khawp mai a, lawm pawh an hlawh narawh e. Mi rinawm, nun dan tha piangtharte aiin mi sual bawraw tak piangtharte hi an thawm a na hlei hlei a, Kohhran pawh min nghawng phur mah mah zawk a. Heng hi thil lawmawm lamah ngai ila.
Amaherawhchu kan ram Kristiante hian hmasawnna tur kan nei. Kan ram hi pianthar nan chuan a tha thlawt mai, Krista tan camper zawng zawng kan inhlan fai pak pak zel a. Chutih mek lai chuan Kristiante than len nan a tha vak lo. Kan piang mai a, kan thang lian hlei thei tlat si lo. Jeriko khawpui ang khan nau chhiatna ram a ni tlat mai. Thuin kan piangthar a, nunah a bei nghet hlei thei lo va, hriat fiahna lamah chuan mi dangte hrilh tur kan nei theuh va, chhandamte nun dan turah erawh chuan entawn tling kan vang hle si a. Piangthar inkhawm ngaina lo kan tam a, piangthar hlep ruk ching te, piangthar dawt sawi ching te, piangthar Bible chhiar ngai lo te, piangthar tawngtai ngaina lo te, piangthar Kohhran bel lem lo te kan kat nawk mai. A sawia sawi nikhuaah chuan kan insawi mâm thiam leh viau bawk si.
Kan ramah hian Non-Mizo Convention kan buatsaih thin a, vai inhlawh chawp te te kan khalh khawm a, mi za velin baptisma an chang thin a. Non- Mizo Fellowship kan dinpui a, an chhungte tuithlar hialte pawh kan nei nual a, a lawmawm ngawt mai. Chutih mek laiin kan ramah hian vai officer, saptawng hmang thiamte hi Kristianah an inlet duh hauh lo. Hei hi a chhan eng nge ni ang? Sawitu pakhat chuan heng vai officer-te hian office-a an officer-puite nun dan an en hian Kristianna hi an awt lo va, Kristian nih ve kher hi tul an ti lo niin a sawi. Chutiang chu ni tak tak se, a va pawi thui dawn em!! fiamthu ni hram teh se. He thu hi a dik emaw dik lo emaw thu hranah dah ila, engpawh ni se, kan rama ring lo mite hian min chhinchhiah a ni tih hi kan hriat thar leh thin a pawimawh hle ang.
Heti a nih rau rau chuan hetiang hian rawtna siam law law ila : Rawngbawltute hian badge nei theuh ila. Kan kawr hma lamah hian Pastor, Upa, Thuhriltu, S.S. Zirtirtu, Committee member, etc. tih hi târ kalh ila, miten kal paha an chhiar theih khawpa chiangin ziak ila. Biak In kawngah chuan kan zahpui lo viau ang a, nimahsela khawii hmunah emaw chuan pawh thlak duh riau hun kan nei mai lawng maw? Inthlan dawn laia Party politics kan beih lai tak takte hian a hnawk viau lawng maw? Sorkar hna dilnaah te, Office-a eng emaw kan tih duh hunah te, sumdawnna hmunah te, sorkar atanga thil sem neuh neuh inchuhna hmunahte hian kan badge kha kan pawtthla duh mai lawng maw? Mahni inen fiah theuh ila.
Kristiante nun chu pawn lama a nihnain a thunun aiin chhung rila Pathian chhinchhiahnain a pawn lam nun a thunun zawk tur a ni. Chhung ril lamah takna kan neih si loh chuan pawn lama kan chanvo chu a hnawk hun a awm thin. Chhung ril lamah takna kan neih erawh chuan pawn lamah chanvo nei hauh lo mah ila kan vui chuang lo va, chanvo kan neih pawhin kan chapopui chuang lo vang. A nihna takah chuan kan rawngbawl hna avanga that tumna aiin kan chhung rila takna chuan rawngbawl hna a hring chhuak zawk tur a ni ang.