ISUA HMANGAIHTUTE HNENAH A INLAR
(John 20:11-18)
Isua Hmangaihtute: Isua inlarna hmasa hi Aman a hmangaihte hnenah a ti tlat lo. Bible-a kan hmuh dan chuan Zirtir 12 zingah ‘Isuan a hmangaih’ ti meuha an sawi thin, Johana kha a awm reng mai. Johana hi zirtir 12 zinga hotu pathum zinga mi a ni. Isua hian a ngaina hle a ni ang, A ramah an unau, Jakoba nen, a ding leh veia thu turin an dil ngam a ni. Mahse Johana hnenah a inlar hmasa ber hauh lo mai. Petera pawh kha Isua hmangaih bertu ni awmin a lang a. A thihnaah pawh thih inhuam kha a ni. Man a nih laia ngunhnam leka Isua lo humhim tumtu pawh a ni. Thlan chhunga lut hmasa ber pawh kha amah tho hi a ni. Mahse Petera hnenah a inlar hmasa lo tlat. Petera hi a tling chiah lo a ni ang, mantira awm zan khan tum thum lai a phat a nih kha. Chu lo pawh, Galili dila sangha an man tum khan, Isuan tum thum lai amah a hmangaih ber leh ber loh a zawt tlat a ni. Chuvangin Petera aia Isua hmangaihtu zawk an awm a ni. Chu chu tunge kan tih ang? Mari Magdalini hi a ni kan ti lo thei lo vang.
Mari Magdalini hi tunge ni le?
Luka 8: 2,3-ah chuan Galili ram atanga Isua zuitu hmeichhiate kan hmu a. Mari Magdalini chu a kawchhung ata ramhuai pasarih hnawhchhuah a nih thu kan hmu. Hmeichhe dang Joani te, Susani te pawh hi dam lo a tihdam te zinga mi ni ngei awm a ni. Mahni han inchan ta ila, ramhuai pasarih ngawt maiin a tihbuai chu a namai hauh lo; hetiang dinhmun atanga chhandamna chan chu a ropui lutuk dawn a Isua hi Mari hian hmangaih ngawih ngawih awm reng a ni.
Mari Magdalini chet dan atang hian a hmangaih tih a lang chiang hle:
(a) Hun puma Isua zui chawttu a ni: Luka ziaka kan hmuh angin, Galili atangin hmeichhe dangte nen Isua an zui rawt a. Isua rawng an bawlsak thin a ti. Golgotha-ah pawh zirtirte an bikbo vek laiin, anni ho hian ral atangin an thlir reng. Joseph-an Isua ruang phum tura a buatsaih lai pawhin an kilpui reng a, thlan thlengin an zui a ni. Isua thawhleh tuk khan rimtui hnawih tumin vartianah thlan lam panin a kal a ni. Isuan amah zuitu tling a tih, mahni inphata zuitute zingah a tel chiang hle a ni.
(b) Isua ruang tal hmuh a tum a ni: Johana ziaka kan hmuh dan chuan, Isua ruang chu miin an ru bo emaw a ti a. Isua a tho leh tawh tih Angelten an hrilh tih a lang lo, hrilh pawh mahse an hrethiam chuang lo va, mi Mari Magdalini hi Isua tho leh thurin lamah chuan a la chiang bik lo. Vawi khat tal chu, a tih theih tawk, a taksaa rimtui hnawih a duh a ni.
(c) A beidawng phal lo: A thiante an haw hnu pawhin a haw ve duh lo. Mari hi Petera te ang bawkin beidawngin haw leh ve mai sela, Isua inlar hmasa ber hi chu a tawng bik hauh dawn lo. Isua kha nunga hmuh beiseina chhan tur hre lo mahse a nghak ringawt mai a ni. A kalsan phal ngang lo a ni. Isua hnaih theihna ber dan tur nia a ngaih hmunah a nghak ringawt mai a ni.. A tih theih chhun - Thlan kiangah tap chungin a ding, tap chungin a kun a, thlan ruak chu a bih ngawih ngawih ringawt mai a ni.
(d) Huaisen takin a nghak a ni: Thlan hmun hi hmun khawhar leh ralti a ni. Isua a hmangaih tlat avangin hetiang hmunah ah pawh amah chauhin a nghak tlat mai a ni. Hmeichhe dangte anga dawihzep chu nise Isua Inlar a hmu hmasa hauh lo vang.
(e) Isua a rawn inlar ta: ‘Hmeichhia’…’Mari’ A ma hming ngeia Isua kohna aw a hria. A hawi a, Isua ngei a lo ni. Hawi hi a pawimawh a ni. Hetianga Isua hmuh chak em emtu hnenah chuan tho leh Lal Isua hi, nungin, mitthi ruang ni lovin, nungin a inentir ta a ni.
Mary Magdalini ang hian Isua kan hmangaih ve em ?
Petera hnenah ‘Hengte ai hian nangin kei mi hmangaih zawk em? A ti a. Khawvel mawina zawng ai pawhin, a let zain I mawi zawk, kan ti thei ang em le?