LAL ISUA EN RAWH (Heb. 12:2)
Kan zinna khawvel tuipuiah hian buaina chhum chhah mupte hian min chim buai ve fo thin. Kan nun hi harsatna tawk lova a kal tluan lai chuan Lal Isua ena a hnena lawmthu sawi nachang kan hre viau va, nimahsela chhum chhah mup kan sut lai hian kan buai zo va, Isua en a har thin a ni. Vanduaina kan tawk a, chhungkua kan buai a, kan fate avangin kan rum a; chutiang chhum chhah mup hnuai atang chuan mahni kan inkhawngaihna mittui a parawl teuh va, Isua en a har ngawt mai. Pathian thuin miten min fuih a, keini erawh chuan, “A ni khawp mai, mahse, mihring kan ni miau mai a,” tiin, Isua en thei lovin chhum chhah mup chu kan en zawk thin.
Harsatna chhum chhah mup atang hian Isua hi hmuh sual a awl duh khawp mai. Zirtirte pawh kha Galili dilah tuifawn na tak mai an tuar a, hlauvin an khur a. Khawvar dawnin Isua chu anmahni thlamuan turin tui chungah a lo kal a, zirtirte chuan hmuithla emaw an lo ti a. Anmahni chhan tura lo kal Isua chu an hmu sual nasa kher mai. An hmuh sualna chhan chu manganna chhum hnuai atanga an thlir vang a ni. Lal Isua erawh chuan aw nem zaidam takin, “Thlamuang takin awm rawh u, keimah ka ni alawm,” a rawn ti dam dap mai a. Lusun manganna hnuai atangte hian chung lam thlir fiah a har a, lei lam kan hmu fiah thung a, min thlamuan tura Lal Isuan, “Keimah ka ni alawm,” tiin aw nem zaidam takin min be mah se, mittuiin min bual â zo va, kan mit a vai tlat thin a ni. Mi thenkhatte chuan kan chunga manganna lo thleng hi kan ngam lo tih hre reng chungin kan en ngawih ngawih a, kan bei a dawng zual thin. Lal Isua lam ensan ila, amah nen kan hmachhawn chuan tahna zan chu zing lawm hla a chang ngei ang.
Lalpa en ngawt mai hi hnehna a nihzia chu Mosia hova Israelten tuipui sen an kân thuah pawh khan kan hmu. Khatah khan mipuite chu an mangang hle tawh a, an hma lamah tuipui sen dai kai rual loh a awm a, an hnung lamah Pharaoa sipai an lo tlan tawh bawk si a, dolung leh tuboh inkara awm an ni tawh a. Mosia erawh chuan a hma lama tuipui sen leh a hnung lama sipaiho chu thlir lovin, a hma chiaha Pathian hnathawh lo lang tur chu a thlir zâwk a. A hote hnenah chuan, “Lalpa chhandamna, vawiina a thawhsak tur che u hi en ngawt mai rawh u,” a ti a. Mosia hian mipuite angin a hma lam leh a hnung lama hlauhawmte hi en reng ve sela chuan a hote nen chhiatna nasa tak an tawk ngei dawn a ni. Nimahsela Lalpa a en tlat avangin tuipui sen chu a kangchat ta ruah mai a, chutah chuan him takin an kal kai ta a. Pharaoa sipaite chuan tuipui an rawn luh veleh tui chu a infin leh chiah a, a len bo ta dial mai a. Keini hi zawng, kan hnung lama harsatna kan tawh atangin kan hma lama lo la thleng leh tur chenin kan hawi zau lutuk a, kan hma chiaha Pathian hnathawh lo lang tur kan en khum thin a ni.
Vawi khat chu Kohhran Upa pakhat hian Pastor hnenah, “Pastor, Upa ka nihna atang hian ka bâng mai teh ang,” a ti a. Pastor chuan, “Engtizia nge ni ta?” tiin a zawt a. Upa chuan, “Mipuite hian min sawisel neuh neuh reng mai a, min thlan hlim ang khan min fak tawh lo a ni,” a ti ngui raih a. Pastor chuan, “Chu, i hmaiah chil an chhak hial che em ni?” a ti a, Upa chuan, “Chil chu chhak em lo ve,” a ti a. Pastor chuan, “A nih leh i lu-ah hling lukhum khumtir an tum che em ni?” a ti a, Upa chuan, “Tum em lo ve,” a ti a. Pastor chuan, “A nih leh khenbeh an tum che em?” a ti a. Upa chuan, “ E, khenbeh te chu min han tum vaih teh se, lamtang pawh ka ngah ve mai, ka do let ve mai ang,” tiin a inhrosa ta a. Pastor chuan, “A ni maw, i zui Isua chu a hmelmaten a hmaiah chil an chhak khum a, a lu-ah hling lukhum an khumtir a, kraws-ah an khengbet a. Chuti chung chuan, ‘Ka pa, anni hi ngaidam rawh, an thiltih an hre lo a ni,’ tiin amah khengbettute tan a dilsak asin. Chuta tuartu Isua chu en ta che,” a ti a. Upa chuan, “Pastor, ka thiam lo a ni e, Kalvari tlang lam ka lo thlir khât deuh a nih chu,” tiin a thil tum chu a thulh leh ta a ni, an ti.
Rawngbawl hnaah harsatna kan tawh hian mahni kan inkhawngaihna mittui a tla fo thin. Isua en lovin mahni kan inen a, kan harsatna kan en a, kan rawngbawl hna hi bansan kan duh hial chang a awm fo mai. Chutih lai tak chuan kan zui Lal Isua hi en ila, a hmel chu chiang takin hmu ila, “Hling lukhum khum vangin ka hmangaih a che,” tiin hlimin kan zai thar leh thei ang.