Tunlai khawvel hmasawnna thang mekah hian, Sualna pawhin zual lam a pan ve zel a. Mihringte kan thatchhe tial tial a, a awlsam thei ang bera tih kan duh a, vawilehkhata hlawkna kan zawng a, hrehawm kan tuar peih lova, pumpelh kan zawng hram hram thin. Thatchhiat avang leh inthlahdah avangin rual awhna a nasa tial tial bawk.
A hunah engmah tipeihlo leh ngaihtuah duh lovin, kan hun tha te ho mai mai ah kan khawhral a. Kan thenawm khawveng ten an thawhrimna rah an seng hunah kan awt leh lawi bawk si! Chumi hunah chuan keinin thawhrah seng tur kan nei ve si lo. Kan mamawh ve bawk si, thenawm khawveng te ei ang, neih ang neih ve kan duhna thinlung atang chuan kan duh reng vang pawh ni hauh lovin, kan dinhmunin a zir tak si loh avangin, kan thawhrah pawh nilo midang thawhrah chu seng kan lo duh ta hial mai thin a ni.
Tunlai hian rama Huan, Lo velah, a neitute awmloh hlan leh hriat loh laia lo Feh khalh a, thlaite lo seng/lawr sak thin an awm ni a hriat a ni a. Heng thilte pawh hi thatchhiatna leh inthlahdahna rahchhuah a ni kan ti thei awm e. Hetiang laka fihlim tur hian Kohhran Chhungkua te taimak kawngah tan ila leh zual ang u.