ISUA RILRU
Philippi 2:5-11
Mi rilru hi hriat mai theih a ni lo, amaherawhchu an thil tih danah an rilru kalphung chu a lang lo thei lo. Isua rilru kalphung pawh kraws a tuarnaah a lo lang a, Paula hian chu chu a hmu chiang hle. Chutiang rilru chu amah pawhin a pu a, a lehkha chhiartute pawhin pu ve ngei turin a duhsak a, he lai chângah hian a târ lang a ni. A thu a fiah zâwk beiseiin lehlin thar hmangin i han chhui teh ang. Judate chuan mihring Isua chu an hmu a, Pathian anga siam a nih chu an pawm thlap, mihring maiin Pathian a an dan erawh chu sawi fiah a har deuh thin. Thlêmtuin hmeichhia a thlem khân, ‘Pathian anga a chhia a tha thlei theih,’ tih a ni. Pathian tluka awm chu mihring châk zâwng tak a ni. Mihring chuan kan nihna pângngai aia sâng nih duhna rilru kan pu. Isua erawh chuan Pathian tluk renga awm chu vawn tlat tum tun turah a ngai lo, mihring a lo ni ta zâwk a. Mihring nih hi Pathian lam ngaihtuah chuan hniam tak a ni. Hei hian Pathian rilru leh mihring rilru kalphung a tilang – mihringin Pathian tluk a duh a, Pathianin mihringa awm a rawn thlang ta zâwk a ni.
Isua nihna thûah theology kalpui dan thenkhatah a Pathianna kha dah tha a, mihring rawn ni ta angin an sawi. Chutianga ngaih theih loh turin ‘a inngaitlâwm, mahni inhre chang lo’ tih a dik zâwk ang. Mihringa a lo chan kha Pathian tân chuan a hniam êm, mahse Isua kha mihringah ngei a lo chang a, mihring ang chiahin a seilian a. Heti chung hian a Pathianna chu a keng tho si. Mihring chiah a nih avangin mi dang angin Pathian anga awm rawn duh ve mai awm tak a ni, mahse amah a inhre chang lo. Mihring pângngai a an lohna chu a inngaihtlâwmna hi a ni. Bâwih dinhmuna din a hreh lo, bâwih dinhmun a hniam hle, chhiahhlawh an ni a, hetih hun lai phei hi chuan ram tam berah chuan an puten bâwng chhawrin an chhawr a, vaw hlum mah se a pawi lo, an duh hun hunah an talh thei tih tur a ni. Bâwih dinhmun aia la hniam leh chu krawsa tuar turte hi an ni. Rorêltuin thu a tihfel tawh chuan khawvêlah eng mah neih a nei lo. Saruak tak takin a taksa pawh an khêng bet, Judate erawh chu an duat deuh a, hrenpereng an hren an phal, chu chiah chu an thil neih chu a ni. An dam laia an thil neih dang chu an chân vek. Hei aia hniam dinhmun hi a awm thei lo – hemi thlenga Isua a zu ding ta hi a intitlâwm a, Pathian thu ang anga awm a tum tlat vang a ni. Amah a inhnâwl daih a, Pathian hnênah a duh ang tihhlawhtlin a tum ve lo. Kraws tuar chu a huphurh hle, ama thu chu ni se pumpelh a duh, Pathian hnênah pawh la bo turin a ngên a, mahse a dil vang ni loin Pathian thu thu ni se a duh tih a sawi chiang. Pathian thu zawma mihring dinhmun hnuaihnung ber a zu liluh thleng hi Pathianin a chawimawina chu a ni.
Isua chu a thi a, a tho leh a, Pathian ding lam vanah a han thu ta a, hei hi Pathian chawimawina chi khat chu a ni. He lai changa Pathian chawimawina a tih nen hian ngaihfin loh tur a ni. Tirhkoh Johana chuan Isua krawsa a tuar thu a sawi apiangin ‘a ropuina’ tiin a sawi thin. Isua ropuina lai ber chu mihringin mualphona tawp nia kan ngaih thin chu a ni. Mihring pawhin mi inngaitlâwmte chu kan lo ngaisâng khawp mai, keini kan inngaitlâwm ve peih lo thin nâ a. Mahatma Gandhi chu chêksawlh theih loh khawpin a inngaitlâwm a, kan ngaihsan phah a. India rama mi hnuai ber hmun phiatte pawhin an khawih ten duat taka a enkawl liak liak avangin Mother Teresa chu ringlo khawvêl pawhin an ngaihsan, khawvêl chawimawina sâng ber Nobel Prize a hmu a ni.
Isua ngeiin ‘Thuhnuairawlhte chu an chan a tha e, ram chu an rochung dâwn si a’ a ti. Inngaihtlâwm te, thuhnuai rawlhte hi nêpna niin kan ngai, han inlek deuh thâr hi kan ngaisâng zâwk fo. Kristiana chu vanram kawng a zawh laiin In Mawi a han thleng a, Vanram lanna pindanah an muttîr a. A tûkah chuan Zahna kawn (Inngaihtlawmna)-ah a chhuk thlâk a tûl ta tlat mai, vawi thum a tlu a ni. Isua zuitu intite ngei pawh hian a tlâwm zâwk nih chu kan hreh. Kohhran pawh kan inropui siak fo. Kan Kohhran hian Pathian thu keng bîk deuh zâwk tein kan inngai thin. Biak in thatah te kan in el, inelna sual a ni lêm lo thei. Kan rilru a dik em? Isuan, ‘Thlarau lama an pachhiatzia inhriate chu an chan a tha e, vanram chu an ta a ni si a’ a ti bawk. Thlarau lamah pawh kan in dah û hle thin. Mi dang chu kan hmu neu zâwk fo. Kan Kohhran hruaitute meuh pawh Thlarau dawng ve lo, piangthar ve lo niin kan hre fo, kan indah chungnun vang a ni. Pathianin a chawimawi chu Thlarau lama an pachhiatzia inhria, hniam hlea inhre thinte hi an ni.
Isua rilru put dan ang kan put ve hi Kristian nun vawrtawp a ni tur a ni. Hei hi a ni khawvêl chhandamna tur kawng chu Kraws kawng hi, chu chu Pathian thiltihtheihna thurûk chu a ni.