Bial Naupang S.S inkhawmpui neih mek a ni
Sept.8 (Inrinni) atang khan Sakawrdai Kohhran Biak Inah Sakawrdai Pastor Bial Naupang Sunday School (Begin-Junior) Inkhawmpui neih neih mek a ni a. Palai riak lut in report chin hi mi 82 an ni. Vawiin Pathianni chawhma leh chawhnu ah thu inchhang, thu leh hla hmanga intihsiakna neih a ni ang. Pathianni zan ah lawmman sem a ni ang a, Bial Chairman Pastor Hmingthansanga hnen atangin Pathian thuchah ngaihthlak a ni bawk ang.
Lawmman Pakhatna - Baltin,
R. 500/- man, Pahnihna - Baltin, R. 400/- man, Pathumna - Baltin, R. 300/- man, Consolation Prize - Baltin, R. 200/- man vel a ni ang.
Intihsiakna endiktu turte:-
1) Pu C.Zonuntluanga, SKD ‘S’ 2) Pu Lalhmingthanga, Vaitin 3) Pu Ronald Lalramsanga, SKD 4) Tv. Lalrohlua, Thingsat 5) Pu Israela, Khawpuar
Krismas&Kumthar Ruai Budget lam aw....
Kohhran chhungkua te kan awlsam zawkna beiseia, kum bul atanga Krismas & Kumthar Ruai Committee in Budget siam chu tunah hian khawn mek zel a ni a. Krismas dawna buai chuk chuk lova, kan awlsam tlan zawk theih nan Chhungtin ten tlem tlemin i pe zel ang u. Budget kan pek tlak hma poh leh keimahni lam chauh nilo, A buaipuitu lam tan pawh hma lak a awlsam phah thin a ni tih hriain. Tlai khaw hnu a hmanhmawh taka thil ngaihtuah emaw rel chawpchilh lutuk a awm loh nan Budget pek hma lamah hian tan ila leh zual ang u.
Beihrual thla hman chho mek zel a ni....
September 1 atang khan Beihrual thla hman tan niin. September 1 - 9 chhung hian‘Ramthar Hapta’ hman mek a ni a, September 10 - 23 chhungin Fehchhuah Hapta hman leh a ni ang a, September 24 – 30 hian ‘Kristian Chhungkaw Hapta’ hman a ni bawk ang. Beihrual hi kum 1918 June thla atanga hman tan a ni a, kum 1925 atangin September thlaah neih thin a ni ta a, kum 1947 atangin Nilai Zan Thupui Bu leh Beihrual Thupui hi bu khata siam tan a ni.
Synod Mission Board rawngbawlna lam
September 10 - 21 chhung hian Field Committee leh Barak Area Committee neih a ni dawn a, committee neihpui tur hian Rev. Lalzuithanga, Exe. Secy; Rev. K. Lalhmuchhuaka, BEC Member leh Upa Vanlalchhunga, BEC Member-te an kal ang. September 11 (Thawhtanni) hian Barak Area Committee, Silchar-ah an thu ang a, September 14 (Zirtawpni) ah Arunachal West Field Committee, Itanagar-ah an thu leh ang a, September 17 (Thawhlehni) ah Arunachal East Field Committee, Khasan-ah an thu ang a, September 19 (Nilaini) ah Assam Field Committee, Guwahati-ah an thu leh ang.
Inter-Senior khawmpui
Dt 15-16 Sept. khian Sakawrdai Chhimveng Kohhran Biak Inah Bial Naupang Sunday School (Inter, Sacrament & Senior) Inkhawmpui neih a ni ang. Inrinni Dar 2:00 p.m ah Khawmpui Committee neih a ni anga. zanah reports ngaihthlak a ni ang. Pathianni chawhma leh chawhnu ah intihsiakna hun hman a ni ang. Pathianni zan Bial Chairman P/P Ngurthanmawia Sailo hnen atangin Pathian thuchah ngaihthlak a ni ang a, intihsiakna lawmman sem nghal a ni bawk ang.
Lawmman chu (Beg-Junior) intih siakna lawmman nen khan a in ang a ni.
Intihsiakna endiktu turte:-
1) Pu K. Thanthuama, KP
2) Pu Lalhnunliana, SKD
3) Tv B. Lalzirliana, SKD ‘S’
4) Lalchhanhima, VT VT
5) Pu Ramthianghlima, KDS
Puitling S.S. Zirlai tihdikna
Puitling Sunday School Zirlai 33-naa hrilhfiahna tlar 4-naa Mosian tih kha ‘Joshuan’ tih tur a ni a, mi sawm leh pahnih tih kha ‘mi pahnih’ tih zawk tur a ni.
Synod Bu 2011 peih fel a ni ta
Synod Bu 2011 chu peih fel a ni ta a, Synod Office Mamawh lamna hmun atangin Kohhran/Bial copy tur a lakleh theih ta.
MPF leh Nagaland BCC
September 5 (Nilaini) khan Nagaland Baptist Churches Council (NBCC) hotute leh Mizoram People Forum (MPF) hruaitute nen inkawmna hun tha tak, Synod Office-ah an nei.
Nagaland khawpui, Kohima atanga palai 4 lokalte hi NBCC hnuaia Working Committee on Clean Election member-te an ni. MPF hruaitute bakah hian ni 5.9.2012 vek khan Central YMA hruaitute nen Central YMA Office ah inkawmna hun an nei a; Ni 6.9.2012 zing lam khan Mizoram Synod hruaitute nen inkawmna hun tha tak an nei leh bawk.
Mizoram-a inthlanna felfai leh hlawhtling taka kan neih thin hian pawnlam atangin ngaihven a hlawh hle thin a. NBCC Assembly chuan Mizoram-a Kohhran leh tlawmngai pawlte tihdan dungzuiin, Inthlanna a hmalak ve an duh a. Zirchiang tur bik, Working Committee on Clean Election din a ni a. Anni hian October 2012 hian an hmalakna hi NBCC Assembly-a pharh turin an chhawpchhuak leh dawn a ni.