ISUA HMINGA HNATHAWH
(Kol. 3:17 & Eph. 1:19-21 )
Isua Hminga Hnathawh Awmzia: Pathian Thu chuan, “In tih apiang chu thusawiah emaw thiltihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u” tiin min hrilh. Isua hming kan lam hian, Isua kan ko a ni ringawt lo va, tawngtai hmawrbawkna tangkam a ni ringawt bawk lo. Hming hian a putu nihna a keng a. Isua hmingah hian Isua nihna a tel a, a thiltihtheihna a keng tel bawk a ni. Isua hming kan lam hian a hminga thiltihtheihna chu kan ko a ni. Pathian lalzia leh ropuizia kan puang nghal bawk. He Isua hming hi kan hnathawhna kawng tinrengah, a bikin sumdawnna hna hahthlak takah te hian, thiltihtheihna a ni a, harsatna tinreng hneh theihna a ni.
Tihtakzeta Isua hming hman tur: Bible chuan, “Lalpa i Pathian hming chu i lam mai mai tur a ni lo”, a ti a. Isua hming hi thil tihsual hliahkhuh nan te, thlarau mi anga inlantir nan te a hman theih a. Heng hi a dik lo a ni. Isua nihna hmachhuan chunga hman tur a ni. Isua chu Pathian kan zinga awm, Immanuela, a ni a. Kan thawhrimna te, tuarna te min hriatpuitu a ni a. Hna reng reng Isua Krista kros chhuang chunga thawh tur tihna a ni.
Isua hnena inpumpekna nen hman tur: Isua hming tihtakzeta hmang tur chuan ama hnena intukluhna leh inpumpekna neih hmasak a tul a. Nula leh tlangval inngaizawng chu, an inneih hma chuan, nulain a tlangval hming a hmang thei lo. An inneih hnu chuan a pasal hming chu a hmingah a tel tawh a, a pasal nihna te, hausakna te a tawmpui tawh a. Isua nihna leh thiltihtheihna te tawmpui turin, Isua hnenah inpumpek a, intukluh hmasak a ngai a ni.
Isua chu Hotu ber a ni: Isua nena hna thawhnaah chuan Amah chu thuneitu leh hotu ber a ni. Kan Managing Director a ni a, Chief Executive Officer a ni a. Keini hi a hna thawhna hmanrua kan ni a. A tih tum chauh kan ti ang a, hun a tihah chauh kan che tur a ni. Pathian hun hriatthiam hi a pawimawh hle a. A kaihhruaina hnuaiah thuawina leh rin ngamna nen thawh a ngai a ni.
Zir hun chhung: Hna kan thawh dawn chuan training phawt a ngai thin. Harsatnate hi training hun ang a ni. He hun hi thlai tiak tir, hmuh theih loh hnuai lama zung thlak chuan thlai a tinghet a, chaw thain a chawm ang hi a ni. He tih lai hi dawh thei taka nghah hun a ni. Hna thawh rah leh tawngtaina rah a la lang lo va, hnuai lamah erawh zung a kai nghet thung a ni. Hahdam taka nghah zir thiam a ngai a ni.
Hmanrua: Thil engpawh ti dawn ila, hmanrua a ngai thin. Isua nena hna thawhnaah a hmanraw pawimawh ber chu khawngaihna a ni. Pathian khawngaihna hi kan phu loh duhsakna a ni a. Hei aia hmanraw tha hi a awm lo. Kan chhandamna te, Thlaraua khahna te, Pathian nen inpawlna te, leh malsawmna zawng zawng chu, khawngaihna avanga dawn vek a ni. Khawngaihna lo chuan eng thil mah a tha tluantling lova, khawngaihna nen erawh chuan engkim a tha thin.
Chawl chunga thawhrim: Pathian rinna nei tawk nia inngaiin, tawngtai nasa hle mah ila, hlawhchham a awm; dil dik loh vang a ni fo. Ka rinnaa innghat nge ka nih Pathian khawngaihnaah? tihte hi inenfiah fo tur a ni. Pathian rinnaah ni lovin, kan rinnaah zawk innghah a awl hle. Hetah hian hnehna a awm lo; Pathian hnena kan dil hlawhtlinte hi a khawngaihna avang a ni a. Rinna chu Pathian khawngaihna kan dawnna kut chauh a ni. Thil nei tur chuan mahnia beih ve a tul a, dawng tur chuan a tul ve lo. Neih tumna chuan malsawmna dawn tur chauh a thlir a, a hahthlak thin. Khawngaihna avanga dawn erawh chuan lawmna leh thlamuanna a thlen thung a ni.
Lo neih ang a ni: Isua nena thawh dun hi lo neih angin a sawifiah theih .
(a) Chi tuh: Bible zir te, sawma pakhat pek te, mi rethei hnena thilpek te, inkhawm te hi rinna chi tuh an ni a. Sumdawnnaah pawh kan thiam china a tha thei ang bera thil kan tih hi chi tuhna a ni. Kan mawhphurhna a ni bawk. A hlawhtlinna erawh chu khawngaihnaah a innghat thung ( Mk. 4:26,27).
(b) Thlai tui leih: Thlai chi tiahtirtu leh thantirtu chu Pathian a ni; heng hun chhung hi tui leih hun a ni a, nghah erawh a ngai. Isua nena hna kan thawh hian kan hmaa tihturte ti zel chunga nghah tul hun a awm. Kan tih theih bak erawh chu Pathian kutah kan dah a ni. Pathian ring a, hna kan thawh mai hian lungkham nei lovin kan nghak a. Pathian chunga lawmin, amah kan fak a. Hei hi chakna hnar a ni.
(c) Hnim thlawh fai: Heng chapona te, itsikna te, inrelna te, ngaihdam theih lohna te hi Isua nena hnathawh tibuaitu hnim thlawh fai turte an ni.Hengte hi Pathian ralthuam hrang hrang hmangin a tihbo theih a ni ( Eph. 6:18).
(d) Lei thaa chawm: Sumdawnnaa lei tha chu finna, chawpchilha tih tur leh tih loh tur hriat thiamna hi a ni. Finna hi Thlarau thilpek a ni a, Pathian hnena dil tur a ni (Ja.1:5).Finna mawl ber pakhat chu,Pathian remtih zawng a ni em? tih hi a ni. I hna chu Pathian remtihzawng a ni tih i chian chuan i rilru a hahdam ang; i chian loh erawh chuan i rilru a hahin i mangang fo ang( Isa. 30:20,21).
Hetianga Isua nen hna i thawh chuan rah duhawm tak seng tur i nei ngei ang.