I CHUANNA LAWNG KHA A LA PIL DAWN
Tirh. 27:10,11
British lawng lian ‘Titanic’ an tih kha mihring thil siam zinga ropui ber pawla an sawi a ni a, A chhung chu block li-ah an then phawk a, pindan pakhatah tui lut thei mah se, pindan danga lut tlang thei lo tura duan a ni a, chhawng 11 a ni. A chhungah chuan mi 2000 chuang an chuang a, chung mite chu mi hausa sumdawng te, nuam chen tur te, innei thar honey moon hmang tur te, sipai te an chuang a, mi thenkhat chuan, ‘Nawm chenna lawng’ tiin an vuah hial a; Pathian ringtu mi tlem te an chuang ve bawk. Southampton an chhuahsan dawn chuan Pi Albert Carwell-i chuan, “In lawng hi a pil thei lo tak tak ang maw?” tiin a zawt a. Anni chuan, “Ka pi, i Pathian meuh pawhin a tipil thei lo vang,” tiin an chhang a. New Founland vaukam vel an hrut kual lai chuan California lawng chawlhna hmun atangin “I lawng khalh kha khalh zawi deuh rawh, i hmaah khan vur tlang sut tur a tam hle a ni,” tih thuthawn (message) an dawng a. Nimahsela lawng khalhtu Hichen Robert-a chuan an lawng chu a ring tâwk lutuk a, a khalh zawi duh chuang hauh lo va. Thuthawn chu vawi thum lai an dawng a; nimahsela an ngaihthah luih tlat avangin a thawntute chuan an wireless bawm an khar a, an mutsan ta hmak mai a.
New York atanga Atlantic tuipuiah mel 1600 vel an kal hnu chuan Lawng chuan a khamphei zâwngin vur tlang a su phei ta mai le!! Lawng chu a te tuar mai a, a laiah a tliak a, a mawng lam chu a bungbu ta vuah mai a. W.T. Operator Philip-a chuan hmanhmawh takin a hmaa message rawn thawntu California lawng chawlhna kha, “Min tanpui turin hmanhmawh rawh u,” tiin a va thawn a. Nimahsela anni chuan an W.T chu an off daih tawh a, an muhil tawh si a. An rin em em Titanic Lawng chuan mi tam tak hlau leh khur chungin Tuipuiah chuan a pilpui ta ruah ruah mai a ni. Chutihlaiin, Lawnga chuangte zingah chuan Pathian ring tlat mi, a tul phawt chuan thih pawh huama Krista tana râl dopuitu an awm a. Chung mite chu an dang zak mai. Rimawi an tum a, “I lamah min hip rawh aw ka Pathian, Kraws hrehawm pu pawhin ka lo hnai ang,” tih hla hi muang fân ruihin an sa a. An hmelah zâm hmel a awm ve lo.
Keini ngei pawh hi i inngaihtuah ve ang u. Englai pawhin kan chuanna lawng khawvel hi chhe thut thei a ni a, Kan chuanna chhungkaw lawng hi chhe rup thei a ni bawk. Kan chuanna lawng, kan taksa hi second khat lekah pawh natna hri te tak te avangin khawvel chhuahsan mai thei dinhmunah a ding reng bawk. Chuti chung chuan mi thenkhatte chuan kan chuanna lawng hi chapopuiin kan la hlim phian lehnghal a. A dik tak chuan kan chuanna lawng ngheh lohzia hre chiang apiangte chu an chapo hman lo va, ruk an ru hman lo va, zu an rui hman lo a ni. Keimahni theuh hi lawng khalhtu chu kan ni a, Pathian thu hi fimkhur tur thu min thawntu (message) chu a ni. Mihring tana thil rapthlak ber chu thih mai inring lo kan thi thut thut hi a ni. Nimahsela Pathian thu atang chuan thih thut (accident) a awm ve lo va, engkim hrilh lawk vek kan ni si a. Titanic lawng khalhtu khan California lawng chawlhna atanga thuthawn a hmuh kha a hun laiin zawm sela chuan an him ngei ang, a hun tawh loh hnuah an ngaihven a, an muhil tawh si a. Chutiang bawk chuan keini pawh hian a hun lai takin Pathian thu hi kan ngaihven a pawimawh a, kan thaw chauh an en tawh hnuah chuan a tlai lutuk tawh thin a ni. Hetih lai mek pawha rualawhna leh duhamna avanga Pathian pawh pâwl hman lo khawpa buaina kan la nei tam tial tial a nih chuan Titanic lawng khalhtu kha kan thiam lo thei bik lo vang.
Titanic lawnga pil turte khan tlai khaw hnuah Pathian hming lamin an buai leh si a. Thuhriltu Harpera-te khan Pathian thu an hrilh kim hman tawh reng reng lo. Khatiang bawk khan mi thenkhatte chuan tunah hian Pathian hming kan lam ngai lo va, amah be turin Biak In kan pan hek lo va, Bible kan chhiar ngai bawk hek lo. Nimahsela ngai teh, chutiang mite chuan kan ngam loh pa kan la su ngei dawn si. Doctor-ten, “I cancer-na a rei tawh a, i thin a khawih tawh a nih hi,” an tih chinah chuan a hming kan lam ngai loh Lal Isua hming hi a ni kan lam thin ni. Thi ngei tur nia kan inhriat a, kan khum bulah chhungkhat lainate an thut laih tawh chinah “Eng nge i duh ber?” min tih se, sorkar hna kan thlang tawh reng reng lovang. Chuvangin a tlai hma hian Pathian chu hnaih la, a thupek chu zawm mai rawh, I chuanna lawng kha ala pil ngei dawn si a.