Kristian te nghahfak, kan hunpui Krismas chu kan hma lawk ah khian a lo awm leh ta a, Mahni khaw lama he hunpui hi hman tumin kan haw khawm a, Kumthar hman hnu a, awm bo, he hunpuia hmang tur a rawn haw leh ta chauhte hmel kan hmu a, Naupangte lah Thawmhnaw thar bel chakin an za a, Ruai atana Talh tur Ran lah kan thlung ta ran bawk a, Kan Inchhung khur kan chei a, kan theih ang tawk a thawveng leh nuamin he hunpui hmang tur hian kan inbuatsaih a, lo.Mi neih ang neih leh Fate rual awh hlauin kan phi a, kan neih tlin tawk aia sang deuh a lan pawh kan pawi ti vak lo niin a lang !! Amaherawhchu, Apianchampha kan lawm ber, Lal Isua Krista Pian dan kha kan thinlungah hian hre that leh ila a duhawm hle. Engkim siamtu kha, a siam ate’n hnawlin, mirethei berte pawhin an duh lohna hmun, Mi ranchawpekna thlengah a rawn mu a, Ran In rimchhe tak chu, Chhandamna kan chan theihna tura a zin kawng bul tan na’n a rawn hmang a nih kha. A thil siamte zingah tlawm takin bul arawn tan a, Pathian fapa, he leia a a rawn kal champha hi insengsova, a ropui thei ang ber a lawm chu a phu tak meuh a ni. Amaherawhchu, Krismas hmangtute hian, Tlawm taka he leia a rawn pianna leh a pian chhan kan hriat chian leh a pawimawh hle. A bikin Thalaite hian Krismas hi sual rawngkai pawlh nena nuam taka hmang mai mai mai tur kan ni lova, a pian chhan lawma thianghlim taka hmang tur kan ni tih i hre thar leh ang u.
