KRISMAS THILPEK ROPUI BER
(Fapa pekin kan awm ta!) (Isaia 9:6)
Kan thupui sawi tur hi Krismas thilpek ropui ber, "Fapa pekin kan awm ta," tih a ni a. He tawngkam hi zawlnei Isaia tawngkam, Lal Isua pian tur hrilhlawknaa ngaih a ni a. A lo to chhuahna rilzia leh makzia hi mihring tawnga sawi fiah zawh rual a ni lo va, sawi loh theih lah a ni hek lo.Eden bawh-chhiatna avangin Pathian leh mihring chu kan inthen tawh a. Eden huana kan luh theih tawh lohna turin nunna thing chu mei khandaih vir tawn zawk zawka ven a ni a.Mihringte sualna avangin Pathian nena kan inkarah indaidanna bang pui a awm a, chumi tikiang thei chu tumah an awm lo. Suala tlu tawh mihringte chhandam turin vanah an zawng a, an hmu zo lo va, leiah leh lei hnuai thlengin an luh chilh tawh a, an hmu zo lo. Nakinah chuan ennawm mak tak mai a lo lang ta!! Van ropuina hlipin Lal Isua chuan lei hmun tlawm ber a rawn luhchilh ta a ni.
Pa Pathianin a Fapa lei mite a pek tur thu hi chawpchilha lo thleng thut a ni lo va, zawlneite hnenah khan vawi za chuang a lo hrilh tawh a. Zawlneite kaa Lal Isua chungchang hrilhlawkna thute hi vawi zahnih chuang a lang a ni. Zawlnei Mika chuan Isua pian hma kum 750 velah khan Bethlehema Isua a pian tur thu te, vuak leh chilchhak a tuar tur thute a lo sawi lawk tawh a. Zawlnei Zakaria chuan Isua chu sabengtung chunga a chuan tur thu te, tangka 30-a an hralh tur thu te, a man chu belvawtu ta tur a nihzia te, a zirtirten an phatsan tur thu te, a nâka feia an chhun tur thute a lo sawi lawk a. Zawlnei Hosea chuan Aigupta rama a tlan bo tur thu a lo sawi lawk bawk a. Zawlnei Isaia chuan Isua chu nula thianghlimin a pai tur thu te, a hming tur te, amah hektute hmaa a ngawih reng tur thu te, misualte nena tuar tlang tur a nih thu te, a tiduhdahtute tana a tawngtai tur thu te, mi hausa thlana an zalh tur thute a lo hrilhlawk a ni.
Lei miten Krismas rim kan hriat hma daih khan van mipuite chuan Krismas hi urhsun takin, mak takin, bawkkhup chungin an lo hmang tawh a. Aw ring takin Beram No zahna hla thar an rem a, a chang leh Beram No inpekna chu mak tiin dar chanve lai an reh thuap bawk a. Chu thu lawmawm chu zawlneite hnenah hriattir an ni a, Isua pian hma kum 700 zet kal taah khan Isaia chuan, "Kan tan naupang a lo piang a, fapa pekin kan awm ta a," tiin a lo sawi lawk a ni. Lal Isua Ranthlenga a rawn mut zan khan, vana mipuite chuan "Chungnung berah Pathian ropui takin awm rawh se, lei chunga a lawm em em mihringte hnenah rem thu leng rawh se," tiin lei mite hnenah duhsakna sang ber an rawn hlan a ni.
Fapa pekin kan awm ta : "Fapa pekin kan awm ta," tih hi a sawi awl hle mah se, a lo to chhuahna erawh chu a ril hle. Pa Pathian hmangaihna chuan kan inkara indaidanna bang a rawn su chim a, chhinchhiahna pasarihte a rawn nuai bo va, Sinai tlang Dan thuthlung chu khawngaihna thuthlungin a rawn thlakthleng a, Dan chuan Lal Isua chu kawng lai kianin kawng sir a chuh rawk rawk a. Hmun tlawm ber Bethlehem ranthleng chu a rawn chawimawi a, puithiamte, lalte leh zawlneite Office chu a rawn luahlan a, mi sualten pheichham an man a, mi retheiten thang an chhuah a, tlang tenawm ber Kalvari tlang chu tlang ngainatawm berah a rawn letling a. Lal Isua hmaah chuan mi bawlhhlawh sil fai an ni a, thianghlima inngaiten an bawlhhlawhzia an hre thung thin.
He thilpek ropui ber hi a dawn dan dikin kan dawng em? Mi retheiten an dawn chuan hausakna a ni a, natna tuarten an dawn fuh chuan damna a ni a, chapoten an dawn chuan tlawmna puan an sin a, mi duhamten an dawn fuh chuan thilphal an zir thin. Kumin chhunga lusun chhungkuate pawhin he hun hi hnung lam ngaihna hun atan i hmang ral lo vang u. He thilpek ropui hi la ila, thihna en lovin nunna kan en ang a, hnuai lam entuin chung lam a thlir ang a, hun kal ta thlira lunglengten hmangaihna thar zel tur lam an thlir ang a, chutah chuan kan duh tak kal tate chu van ropuina hain an hmel kan hmu thei ang.
Krismas dawnin thilpek (present) kan inthawn thin a; thian nei tam deuhte phei chuan Krismas Card an tar tlar dul thin a. Hengte hi sawi nepna ni lovin, mi dangte hnen atanga thilpek dawng teuhtute hian Krismas thilpek ropui ber, ‘Fapa pekin kan awm ta’ tih hi kan dawng lo palh hlauh vang e. He thilpek dawngte chuan, "Van Lalreng, ro- pialral lunghlu ka chhar ta," tiin ro hlu ber chhar hmel an pu a. Chu thilpek chu an bangah tar mawi lovin, an nunah an tar mawi thin. FAPA PEKIN KAN AWM TA! Amen.