Synod Social Front Committee : Nov. 6 khan Synod Office-a JM Lloyd Hall-ah Synod Social Front Committee an thu a, member 38 an kal. Meeting zawhah HIV/AIDS chungchang inzirtirna atana an film siam chu Rev. Thangzauva, Synod Moderator-in a tlangzarh. He film hi Zarkawt Branch KTP an buatsaihtir a, a senso atan Rs.50,000/- an pe a ni. A film hi HIV/AIDS inzirtirna hmanrua atana siam, zawrh chhuah loh tur a ni.
Kohhran Hmeichhia : November 9 - 11 chhung hian Shillong Mizo Kohhranah Kohhran Hmeichhe Golden Jubilee lawmna neih mek a ni a, hemi hmanpui tur hian Central Kohhran Hmeichhe hruaitu Pi Khawlvuani, Vice Chairman; Pi Liankimi, Fin. Secretary leh Pi Ramngaihsangi, Committee Member-te an kal.
Kristian Thalai Pawl : Nov. 8 - 11 chhung hian Lairam Isua Krista Baptist Kohhran (LIKBK) Thalai Pawl Inkhawmpui, Vawmbukah neih mek a ni a, heta tel tur hian Central KTP hruaitu Tv. V.L. Muanchhana, Asst. Secretary leh Upa Zothangzuala Chhangte, Treasurer-te an kal.
Synod Music Committee: Nov. 7 khan Synod Office-a JM Lloyd Hall-ah Synod Music Committee a thu a, Rev. Thangzauva, Moderator-in kaihruaiin member 66 an tel thei. Tun tum Music Committee thu khawm hian thu ngaihtuah panga an nei a ni. Mizo kristiante zinga Kohhran Zaipawl zai hmasak ber hun chu Dec. 25, 1912 niin Music Committee hian a zir chhuak a ni.