Bangalore KTP atangin chibai bukna:
from: samuel lalrozama Hmar <sammylrza@gmail.com> Nov 2, 2012
Chibai,
Sakawrdai KTP lam chu in thawk tha hle mai, website tha tak in enkawl hi keini Bangalore lam KTP te chuan lawmawm kan ti a, kan chhuang a che u. Kei hi Samuel Lalrozama Hmar ka ni a, Bangalore-a Aircraft Maintenance engineer thawk lai mek. Kei leh kan KTP General Secretary Fela Khawlhring (Law student) te chuan a remchan chuan in KTP AW ah article te la rawn thawh ve theih kan chak khawp mai.
Dam takin.
Samuel, 09886447684
Khawvel Sunday School Ni Vawi 68-na:
November 4 (Pathianni) Khawvel Sunday School Ni chu Mizoram Presbyterian Kohhran chuan thupui ‘Puitling - Jonathan Edwards (1703 - 1758) - By Upa C. Thanga’ leh ‘Naupang - Helen Keller (1880 - 1968) - By Lalrindiki Ralte’ hmangin Khawvel Sunday School Ni hman a ni a. Kan Kohhran bikah chuan Kohhran chhungkua a chhiat tawhna avangin Programme ruahman ang erawh kan hmang kim thei lova, Pathianni chawhma programme chauh kan hmang thei a ni. Khawvel Sunday School Ni hi Mizoramah chuan kum 1944 atang khan serh tan a ni a. Kum 1949 atangin Khawvel Sunday School Ni chu Thupui neiin November Pathianni hmasa berah hman thin a ni ta a ni.
Family Guidance & Counselling Centre:
Family Guidance & Counselling Centre (FG&CC) chuan November 14 - 28 chhung hian Pastor-te pualin Intensive Residential Pastoral Care & Counselling Training vawi 22-na, Synod Conference Centre-ah a buatsaih dawn a, training a tel tur hian kum 2010-a nemngheh Pastor 18 koh an ni. Training hawnna programme hi November 14 (Nilaini) tlai dar 5:00-ah neih a ni ang a, Rev. Lalzuithanga, Executive Secretary i/c FG&CC-in inkhawm a kaihruai ang. Rev. R. Lalhmingthanga, FG&CC Director-in Reports & Introduction hun a hmang ang a, Synod Moderator Rev. Thangzauvan Training hawngin thuchah a sawi ang.
MSSU Residential Trainers’ Training:
Mizo Sunday School Union (MSSU) chuan November 8 -10 chhung khan Synod Conference Centre-ah Residential Trainers’ Training vawi 9-na neih a ni. November 8 zan dar 6:00-ah Synod Moderator Rev. Thangzauvan Training hi a hawng a ni. Training-ah hian Aizawl khawpui chhung Pastor Bial tin aiawh pakhat theuh tel tura sawm an ni. Training hi riah chilha neih a ni a. November 10 (Inrinni) chawhnu dar 1:00-ah MSSU Coordinator Pi Lalfakmawii kaihhruaiin Training Kharna Inkhawm neih a ni. MSSU hian Bial leh Kohhran mal hmun 50 velah kum tin training hi an neihpui thin a, MSSU-a thawktute leh trainerten training hi an neihpui thin. Tuna training pawh hi zirtirtute training pe chhawng thei tura trainer-te buatsaihna a ni. MSSU hnuaiah hian Sunday School 901, zirtirtu 41,177 leh zirtu 3,53,359 an awm mek a. Mizoram chhung bakah India hmar chhak state hrang hrang atangin MSSU zawmtu hi an awm. MSSU hian zirtirtute training pek leh Sunday School exam buatsaih bakah rawngbawlna peng hrang hrang a kalpui mek a. Sunday School rawngbawlna kaihhnawih lehkhabu ringawt pawh, kum tin bu 18 vel an tichhuak thin a ni.
Board/Committee tluang takin thu zo:
Mizoram Presbyterian Church Synod hnuaia Board leh Committee hrang hrangte kum tawp rorel thutkhawm chu a zo ta a, November 13 -15 chhungin Synod Executive Committee (SEC) a thu ang a, November 20 -22 chhungin Finance Committee a thu leh ang a, November 28 & 29-ah SEC Budget Session a thu ang a, November 30-ah Pastoral Committee-in Pro Pastor Interview a nei ang.